ಶಿವಮೊಗ್ಗ : ಲಾಕ್ಡೌನ್ನಿಂದಾಗಿ ಪ್ರತಿ ಜಿಲ್ಲೆಯ ಗಡಿ ಭಾಗದಲ್ಲಿ ಚೆಕ್ಪೋಸ್ಟ್ಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತಿವೆ. ಜಿಲ್ಲೆಯ ಗಡಿ ಭಾಗದ ಚೆಕ್ಪೋಸ್ಟ್ಗಳು ಜಿಲ್ಲಾಡಳಿತದ ನಿಯಂತ್ರಣದಲ್ಲಿವೆ. ಸದ್ಯ ಪೊಲೀಸ್ ಇಲಾಖೆ ಆಧುನಿಕ ತಂತ್ರಜ್ಞಾನ ಬಳಸಿಕೊಂಡ ಗಡಿಭಾಗದ ಚಲನವಲನಗಳನ್ನು ಸೆರೆಹಿಡಿಯುತ್ತಿದೆ.
ಈ ಕುರಿತು ಎಸ್ಪಿ ಶಾಂತರಾಜು, ಪೊಲೀಸ್ ಇಲಾಖೆಯ ಸುಬಾಹು ಆ್ಯಪ್ ಬಳಸಿಕೊಂಡು ಸ್ಮಾರ್ಟ್ ಆಗಿ ಕೆಲಸ ಪ್ರಾರಂಭಿಸಿದೆ. ಗಡಿ ಭಾಗದ ಚೆಕ್ಪೋಸ್ಟ್ನಲ್ಲಿ ಕೆಲಸ ನಿರ್ವಹಿಸುವ ಪೊಲೀಸ್ ಸಿಬ್ಬಂದಿಗೆ ಸುಬಾಹು ಆ್ಯಪ್ ನೀಡಲಾಗಿದೆ. ಸಿಬ್ಬಂದಿ ತಮ್ಮ ಸ್ಮಾರ್ಟ್ ಫೋನ್ನಲ್ಲಿ ಆ್ಯಪ್‌ನ ಇನ್ಸ್ಟಾಲ್ ಮಾಡಿಕೊಳ್ಳಬೇಕು. ಅದಕ್ಕೆ ತಮ್ಮ ಇಲಾಖೆಯ ಐಡಿ ಹಾಗೂ ಪಾಸ್ವರ್ಡ್ ನೀಡಬೇಕು. ಈ ಆ್ಯಪ್ ಮೂಲಕ ಗಡಿ ಭಾಗಕ್ಕೆ ಬೇರೆ ಜಿಲ್ಲೆಯಿಂದ ಬರುವ ವ್ಯಕ್ತಿ‌ಯ ಪಾಸ್ ಪರಿಶೀಲನೆ ನಡೆಸಿ, ಅವರ ಫೋಟೊವನ್ನು ತೆಗೆದುಕೊಳ್ಳಲಾಗುತ್ತದೆ. ಫೋಟೋ ಹಾಗೂ ಮಾಹಿತಿ ಜಿಲ್ಲಾ ಪೊಲೀಸ್ ಇಲಾಖೆಗೆ ಹೋಗುತ್ತದೆ ಎಂದು ಮಾಹಿತಿ ನೀಡಿದರು.
ಈ ಮಾಹಿತಿಯನ್ನು ಪೊಲೀಸ್ ಇಲಾಖೆಯು ಯಾವಾಗ ಬೇಕಾದರೂ ಸಹ ಪಡೆದುಕೊಳ್ಳಬಹುದು. ಸುಬಾಹು ಆ್ಯಪ್ ಇದ್ದರೆ, ಪೊಲೀಸರಿಗೆ ಹೆಚ್ಚಿನ ಸಿಬ್ಬಂದಿಯ ಅವಶ್ಯಕತೆ ಬೀಳುವುದಿಲ್ಲ. ಒಬ್ಬ ವ್ಯಕ್ತಿಯೇ ಪಾಸ್ ಪರಿಶೀಲನೆ ನಡೆಸಿ, ಫೋಟೋ ತೆಗೆದುಕೊಂಡು ಕಳುಹಿಸಬಹುದು. ಇದರಿಂದ ಚೆಕ್ಪೋಸ್ಟ್ನಲ್ಲಿ ತಪಾಸಣೆಯನ್ನು ಬೇಗ ಮುಗಿಸಿ ಕಳುಹಿಸಬಹುದಾಗಿದೆ ಎಂದು ಎಸ್ಪಿ ಶಾಂತರಾಜು ತಿಳಿಸಿದರು.
