ಶಿವಮೊಗ್ಗ: ತಾನು ಕಲಿತ ವಿದ್ಯೆಯಿಂದ ಬೇರೆಯವರಿಗೂ ಸಹ ಒಳ್ಳೆಯದಾಗಬೇಕು ಎಂದು ತಿಳಿದುಕೊಂಡವರು ಭಾರತದವರು ಮಾತ್ರ. ಈಗ ಎಲ್ಲವ‌ನ್ನು ಹಣಕ್ಕಾಗಿ ಬಳಕೆ ಮಾಡಲಾಗುತ್ತಿದೆ ಎಂದು ಇಸ್ರೋ ಮಾಜಿ ಅಧ್ಯಕ್ಷ ಡಾ. ಕಿರಣ್ ಕುಮಾರ್ ನಗರದಲ್ಲಿ ವಿಷಾದ ವ್ಯಕ್ತಪಡಿಸಿದ್ದಾರೆ.
ನಗರದಲ್ಲಿ ಇಂದು ಕುವೆಂಪು ರಂಗಮಂದಿರದಲ್ಲಿ ನಡೆದ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ ಆಯೋಜಿಸಿದ್ದ ವೈಜ್ಞಾನಿಕ ಸಮ್ಮೇಳನ 2021 ಅನ್ನು ಹಾಲು ಉಕ್ಕಿಸುವ ಮೂಲಕ ಚಾಲನೆ ನೀಡಿ ಮಾತನಾಡಿದ ಅವರು, ಈಗ ವಿದ್ಯೆ ಒಳ್ಳೆಯದಕ್ಕೆ ಬಳಸದೇ ಯುದ್ದಕ್ಕೆ ಬಳಕೆ ಮಾಡಲಾಗುತ್ತಿದೆ ಎಂದರು.
ಮನುಷ್ಯ ವಿಜ್ಞಾನ ಹಾಗೂ ತಂತ್ರಜ್ಞಾನಗಳಿಂದ ತಮ್ಮ ಜೀವನ ಸುಧಾರಿಸಿಕೊಳ್ಳುವ ಪ್ರಯತ್ನ ನಡೆಸುತ್ತಿದ್ದಾನೆ. ನಮ್ಮ ಸುತ್ತಮುತ್ತಲಿನ ಪರಿಸರ ಹೇಗೆ ಇರಬೇಕು ಎಂದು ತಿಳಿದು ಕೊಳ್ಳಬೇಕಿದೆ. ತಂತ್ರಜ್ಞಾನವನ್ನು ಕೆಲವರು ಎಲ್ಲರ ಒಳ್ಳೆಯದಕ್ಕೆ ಬಳಸಿದರೆ, ಮತ್ತೆ ಕೆಲವರು ವೈಯಕ್ತಿಕವಾಗಿ ಬಳಸಿಕೊಳ್ಳುತ್ತಿದ್ದಾರೆ ಎಂದು ಹೇಳಿದರು.
ದೈಹಿಕವಾಗಿ ಯಾರು ಬಲಿಷ್ಟರಾಗಿದ್ದರೂ ಅವರು ತಮ್ಮ ಜನಾಂಗ ಹಾಗೂ ತಮ್ಮವರ ನೇತೃತ್ವ ಮಾಡುತ್ತಿದ್ದರು. ಹಿಂದಿನ ಶತಮಾನಗಳಲ್ಲಿ ಮೈಟ್ ಇಸ್ ರೈಟ್ ಅಂತ ಇದ್ದರೆ, ಈಗ ಯಂತ್ರಗಳ ಬಳಕೆ ಮಾಡಲಾಗುತ್ತಿದೆ.
ವಿಜ್ಞಾನ ಬಂದ ಹಾಗೆ ಹೊಸ ಆವಿಷ್ಕಾರ ಪ್ರಾರಂಭವಾದವು. ಭೂಮಿ ಅಗಾಧವಾದ ಬಾಹ್ಯಕಾಶ ನೌಕೆಯಾಗಿದೆ. ಪ್ರತಿ‌ಗಂಟೆಗೆ 500 ಮೀಟರ್ ಚಲಿಸುತ್ತಿದ್ದೇವೆ. ಅದೇ ರೀತಿ ಸೂರ್ಯ ಸಹ ಓಡುತ್ತಿದ್ದಾನೆ. ಆದರೆ, ಇವೆಲ್ಲ ನಮಗೆ ಗೋಚರಿಸುವುದಿಲ್ಲ. ಪಾಶ್ಚಾತ್ಯರು ನಮಗಿಂತ ಮುಂದೆ ಇದ್ದಾರೆ. 50 ವರ್ಷದ ಹಿಂದೆ ನಿಮ್ಮ ಕೈಯಲ್ಲಿ ಒಂದು ಉಪಕರಣ ಬಂದು ಬೇಕಾದ ಮಾಹಿತಿ ನೀಡುತ್ತೆ ಅಂತ ಹೇಳಿದರೆ ಹುಚ್ಚ ಎನ್ನುತ್ತಿದ್ದರು ಎಂದರು.
ನಾವು ಬೇರೆಯವರ ಆಳ್ವಿಕೆಯಲ್ಲಿ ಉಳಿದ ರಾಷ್ಟ್ರ. ಬೇರೆಯವರ ಜೀವ ಉಳಿಸಲು ಹೇಗೆ ಇರಬೇಕು ಅಂತ ತಿಳಿದಿದೆ. ಕೈಗಾರಿಕಾ ಕ್ರಾಂತಿ ನಡೆದಾಗ ನಮ್ಮಲ್ಲಿನ ಕಚ್ಚಾ ವಸ್ತುಗಳನ್ನು ತೆಗೆದುಕೊಂಡು ಹೋಗಿ ಸಿದ್ದ ವಸ್ತುಗಳನ್ನು ಮಾಡಿ‌ಕೊಡುತ್ತಿದ್ದರು. ಈ ವೇಳೆ, ಇಸ್ರೋ ಮಾಜಿ ಅಧ್ಯಕ್ಷ ಡಾ. ಕಿರಣ್ ಕುಮಾರ್ ಅವರಿಗೆ ಸನ್ಮಾನ ನಡೆಸಲಾಯಿತು.
ಕುವೆಂಪು ಅವರ ಪಂಚಮಂತ್ರ ಸಾರ್ವಕಾಲಿಕ ಚಿಂತನೆ : ಪ್ರೊ. ಬಿ. ಪಿ ವೀರಭದ್ರಪ್ಪ
ರಾಷ್ಟ್ರಕವಿ ಕುವೆಂಪು ಅವರು ಪ್ರತಿಪಾದಿಸಿದ ಪಂಚಶೀಲ ತತ್ವ ವೈಯಕ್ತಿಕ ಮತ್ತು ಸಾಮುದಾಯಿಕ ಹಂತದಲ್ಲಿ ಸರ್ವರ ಏಳ್ಗೆಯನ್ನು ಬಯಸುವ ಶ್ರೇಷ್ಠ ಚಿಂತನೆಯಾಗಿದೆ ಎಂದು ಕುವೆಂಪು ವಿವಿ ಕುಲಪತಿ ಪ್ರೊ. ಬಿ. ಪಿ ವೀರಭದ್ರಪ್ಪ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಕುವೆಂಪು ವಿಶ್ವವಿದ್ಯಾಲಯದಲ್ಲಿ ಬುಧವಾರ ಆಯೋಜಿಸಲಾಗಿದ್ದ ಕುವೆಂಪು ಅವರ 117ನೇ ಜನ್ಮದಿನಾಚರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಮನುಜಮತವೇ ಮುಖ್ಯ ಎಂಬ ಆದರ್ಶ ಕ್ಷೀಣಿಸಿ ಇಂದು ಜಾತಿ, ಧರ್ಮಗಳ ಸಂಕುಚಿತತೆ ಹೆಚ್ಚಿದೆ. ಮನುಷ್ಯ ಊರು, ರಾಜ್ಯ, ದೇಶಗಳಿಗೆ ಅಂಟಿಕೊಂಡು ವಿಶ್ವಪಥ ಮರೆತಿದ್ದಾನೆ ಎಂದು ವಿಷಾದಿಸಿದರು.
ಕುಲಸಚಿವೆ ಜಿ. ಅನುರಾಧ ಅವರು ಮಾತನಾಡಿ, ಕುವೆಂಪು ಅವರು ಸರ್ವ ಜನಾಂಗಗಳ ಭೌತಿಕ, ಅಧ್ಯಾತ್ಮಿಕ, ಕೌಟುಂಬಿಕ ಹೀಗೆ ಸರ್ವಸ್ತರದ ಅಭಿವೃದ್ಧಿ ಬಯಸಿದವರು. ಈ ದಿಸೆಯಲ್ಲಿ ತಾವು ನಡೆಯುತ್ತಿರುವ ಹಾದಿಯೆಡೆಗೆ ವಿಮರ್ಶಾತ್ಮಕ ದೃಷ್ಟಿಕೋನ ರೂಢಿಸಿಕೊಂಡು ಸಮನ್ವಯತೆಯ ಸೂತ್ರವನ್ನು ಜಗತ್ತಿಗೆ ನೀಡಿದವರು ಎಂದರು.
ಹಣಕಾಸು ಅಧಿಕಾರಿ ಎಸ್. ರಾಮಕೃಷ್ಣ, ಕಾರ್ಯನಿರ್ವಾಹಕ ಇಂಜಿನಿಯರ್ ರಘುಶಂಕರ್, ಡಾ. ಪಾಲಾಕ್ಷನಾಯಕ್, ಡಾ. ಶ್ರೀಶೈಲ, ಡಾ. ಎಂ. ಆರ್ ಸತ್ಯಪ್ರಕಾಶ್, ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿ ಉಪಸ್ಥಿತರಿದ್ದರು.
ಓದಿ: MES ವಿರುದ್ಧ ಕಠಿಣ ಕ್ರಮ ಕೈಗೊಂಡಿದ್ದೇವೆ, ಬಂದ್ಗೆ ಕರೆ ಬೇಡ ಎಂದು ಕನ್ನಡಪರ ಸಂಘಟನೆಗಳಿಗೆ ಬೊಮ್ಮಾಯಿ ಮನವಿ
