ಕೆಎಫ್​ಡಿ ಲ್ಯಾಬ್​ನಲ್ಲಿ ನಡೆಯಲಿದೆ ಕೊರೊನಾ ಪರೀಕ್ಷೆ : ಜಿಲ್ಲಾಧಿಕಾರಿ ಸ್ಪಷ್ಟನೆ

ಬಿ.ಹೆಚ್. ರಸ್ತೆಯ ಜಿಲ್ಲಾ ಆರೋಗ್ಯಾಧಿಕಾರಿ ಕಚೇರಿಯ ಪಕ್ಕದಲ್ಲಿರುವ ಲ್ಯಾಬ್​ನಲ್ಲಿ ಮಂಗನ ಕಾಯಿಲೆ ವೈರಾಣು ಪರೀಕ್ಷೆ ನಡೆಸಲಾಗುತ್ತಿತ್ತು. ಇದೀಗ ಈ ಲ್ಯಾಬ್​ನಲ್ಲಿ ಕೊರೊನಾ ಪರೀಕ್ಷೆ ನಡೆಸಲು ಸರ್ಕಾರ ಅನುಮತಿ ನೀಡಿದೆ. ಇದರಿಂದ ಸಿಮ್ಸ್​ನ ಲ್ಯಾಬ್ ಮೇಲಿದ್ದ ಭಾರ ಕೊಂಚ ಕಡಿಮೆಯಾಗಲಿದೆ.

ಶಿವಮೊಗ್ಗ : ಜಿಲ್ಲೆಯಲ್ಲಿ ಕೊರೊನಾ ಪರೀಕ್ಷೆಯನ್ನು ಕೇವಲ ಸಿಮ್ಸ್ ಆಸ್ಪತ್ರೆಯ​​ ಲ್ಯಾಬ್​ನಲ್ಲಿ ಮಾತ್ರ ನಡೆಸಲಾಗುತ್ತಿತ್ತು, ಆದರೆ, ಇನ್ನು ಮುಂದೆ ಕೆಎಫ್​ಡಿ ವೈರಸ್​ ಪರೀಕ್ಷೆಗೆ ನಿರ್ಮಾಣವಾಗಿರುವ ಲ್ಯಾಬ್​ನಲ್ಲಿ ಕೂಡ ಕೊರೊನಾ ವೈರಸ್​ ಪರೀಕ್ಷೆ ನಡೆಸಲಾಗುವುದು ಎಂದು ಜಿಲ್ಲಾಧಿಕಾರಿ ಕೆ.ಬಿ.ಶಿವಕುಮಾರ್ ತಿಳಿಸಿದ್ದಾರೆ.

ಬಿ.ಹೆಚ್. ರಸ್ತೆಯ ಜಿಲ್ಲಾ ಆರೋಗ್ಯಾಧಿಕಾರಿ ಕಚೇರಿಯ ಪಕ್ಕದಲ್ಲಿರುವ ಲ್ಯಾಬ್​ನಲ್ಲಿ ಮಂಗನ ಕಾಯಿಲೆ ವೈರಾಣು ಪರೀಕ್ಷೆ ನಡೆಸಲಾಗುತ್ತಿತ್ತು. ಇದೀಗ ಈ ಲ್ಯಾಬ್​ನಲ್ಲಿ ಕೊರೊನಾ ಪರೀಕ್ಷೆ ನಡೆಸಲು ಸರ್ಕಾರ ಅನುಮತಿ ನೀಡಿದೆ. ಇದರಿಂದ ಸಿಮ್ಸ್​ನ ಲ್ಯಾಬ್ ಮೇಲಿದ್ದ ಭಾರ ಕೊಂಚ ಕಡಿಮೆಯಾಗಲಿದೆ. ಸಿಮ್ಸ್ ಲ್ಯಾಬ್​ನಲ್ಲಿ ಶಿವಮೊಗ್ಗ, ಉತ್ತರ ಕನ್ನಡ, ಚಿಕ್ಕಮಗಳೂರು ಜಿಲ್ಲೆಯ ಜನರ ಕೊವಿಡ್​ -19 ಪರೀಕ್ಷೆ ನಡೆಸಲಾಗುತ್ತಿತ್ತು.

ಇದೀಗ ಇನ್ನೊಂದು ಲ್ಯಾಬ್ ದೊರಕಿರುವುದರಿಂದ ಬೇಗ ಫಲಿತಾಂಶ ಬರಲು ಅನುಕೂಲಕರವಾಗಲಿದೆ.

ಜಿಲ್ಲೆಯಲ್ಲಿ ಮತ್ತೊಂದು ಕೊರೊನಾ ಪಾಸಿಟಿವ್ :

ಭದ್ರಾವತಿಯ 35 ವರ್ಷದ ಮಹಿಳೆಯಲ್ಲಿ ಕೊರೊನಾ ಪಾಸಿಟಿವ್ ಬಂದಿದೆ. ಇವರು ದೆಹಲಿಯಿಂದ ವಾಪಸ್ ಆಗಿ ಭದ್ರಾವತಿಯ ಲಾಡ್ಜ್​ನಲ್ಲಿ ವಾಸವಾಗಿದ್ದರು. ಮೇ 14 ರಂದು ದೆಹಲಿಯಿಂದ ಶ್ರಮಿಕ್ ರೈಲಿನ ಮೂಲಕ ಮೇ 17 ಕ್ಕೆ ಹುಬ್ಬಳ್ಳಿಗೆ ಬಂದು, ನಂತರ ಅಲ್ಲಿಂದ ಬಸ್​ ಮೂಲಕ ಶಿವಮೊಗ್ಗಕ್ಕೆ ಬಂದಿದ್ದರು.

ಕುಟುಂಬದ ಪ್ರತಿಯೊಬ್ಬರ ಗಂಟಲು‌ ದ್ರವವನ್ನು ಪರೀಕ್ಷೆ ನಡೆಸಲಾಗಿತ್ತು, ಕುಟುಂಬದ ಎಲ್ಲರ ವರದಿ ನೆಗಟಿವ್ ಬಂದಿತ್ತು.‌ ನಂತರ ಇವರನ್ನು ಭದ್ರಾವತಿಯ ಲಾಡ್ಜ್ ನಲ್ಲಿ ಕ್ವಾರಂಟೈನ್ ಮಾಡಲಾಗಿತ್ತು. ಸರ್ಕಾರದ ಹೊಸ‌ ಆದೇಶದಂತೆ ಕ್ವಾರಂಟೈನ್ ಕೇವಲ 7 ದಿನ ಮಾತ್ರ ಎಂದಾಗ, ಎಲ್ಲರನ್ನು ಮನೆಗೆ ಕಳುಹಿಸುವ ಮುನ್ನ ಗಂಟಲ‌ದ್ರವ ಪರೀಕ್ಷೆಗೆ ಕಳುಹಿಸಿದಾಗ ಮಹಿಳೆಯಲ್ಲಿ ಪಾಸಿಟಿವ್ ಬಂದಿದೆ.

ಇದೀಗ ಮಹಿಳೆಯನ್ನು ನಗರದ ಕೋವಿಡ್ ಆಸ್ಪತ್ರೆಗೆ ರವಾನೆ ಮಾಡಲಾಗಿದೆ, ‌ಮಹಿಳೆಯ ಜೊತೆಗಿದ್ದವರನ್ನು ಪ್ರಾಥಮಿಕ ಸಂಪರ್ಕಿತರು ಎಂದು ಪ್ರತ್ಯೇಕವಾಗಿರಿಸಿ ಕ್ವಾರಂಟೈನ್ ಮಾಡಲಾಗಿದೆ ಎಂದರು.