ಶಿವಮೊಗ್ಗ: ಕುಶಲೋಪರಿ ವಿಚಾರಿಸಲು, ತುರ್ತು ಸಂದೇಶ ರವಾನಿಸಲು ಬಳಸುತ್ತಿದ್ದ 166 ವರ್ಷಗಳ ಇತಿಹಾಸ ಹೊಂದಿರುವ ಭಾರತೀಯ ಅಂಚೆ ಇಲಾಖೆಯು ಇಂಡಿಯಾ ಪೋಸ್ಟ್ ಪೇಮೆಂಟ್ ಬ್ಯಾಂಕ್ (ಐಪಿಪಿಬಿ) ಸೇವೆ ಪ್ರಾರಂಭಿಸಿದೆ. ಆದರೆ, ಗ್ರಾಮೀಣ ಪ್ರದೇಶದ ಎಷ್ಟೋ ಜನರಿಗೆ ಈ ಐಪಿಪಿಬಿ ಆ್ಯಪ್ನ ಕುರಿತು ಪರಿಚಯವೇ ಇಲ್ಲ!
ಅಂಚೆ ಇಲಾಖೆಯು ಗ್ರಾಮೀಣ ಭಾಗದಲ್ಲಿ ಯಾರು ಬ್ಯಾಂಕ್ ಸೇವೆ ಪಡೆಯುತ್ತಿಲ್ಲವೋ ಅವರ ಮನೆ ಬಾಗಿಲಿಗೇ ಆ (ಐಪಿಪಿಬಿ ಆ್ಯಪ್) ಸೇವೆ ಒದಗಿಸುತ್ತಿದೆ. ಪೋಸ್ಟ್ ಮ್ಯಾನ್ಗಳು ಜನರ ಮನೆ ಬಾಗಿಲಿಗೆ ಬಂದು ಅಂಚೆ ಖಾತೆ ತೆರೆದು ಕೊಡುತ್ತಾರೆ. ಅದಕ್ಕೆ ಆಧಾರ್ ಕಾರ್ಡ್ ಹಾಗೂ ಹೆಬ್ಬೆಟ್ಟು ಪಡೆಯುತ್ತಾರೆ. ಆದರೆ, ಯಾವೊಬ್ಬ ಪೋಸ್ಟ್ ಮ್ಯಾನ್ ಕೂಡ ಈ ಕೆಲಸ ಮಾಡುತ್ತಿಲ್ಲ. ಹೀಗಾಗಿ, ಹಳ್ಳಿ ಜನರಿಗೆ ಆ್ಯಪ್ ಪರಿಚಯವಾಗಿಲ್ಲ.
ಆ್ಯಪ್ನ ವಿಶೇಷತೆ: ಐಪಿಪಿಬಿ ಆ್ಯಪ್ ಅನ್ನು ಗೂಗಲ್ ಪೇ ರೀತಿ ಬಳಸಬಹುದು. ವಿದ್ಯುತ್ ಬಿಲ್, ನೀರಿನ ಬಿಲ್, ಕೇಬಲ್ ಬಿಲ್ ಸೇರಿದಂತೆ ಇತರ ಸೇವೆಗಳ ಬಿಲ್ಗಳನ್ನು ಪಾವತಿಸಬಹುದು. ಇತರ ಬ್ಯಾಂಕ್ ಖಾತೆಯಿಂದ ಹಣ ಕೂಡ ವರ್ಗಾಯಿಸಬಹುದು. ವರ್ಚ್ಯುಯಲ್ ಕಾರ್ಡ್ಗಳ ಮೂಲಕ ಹಣ ವರ್ಗಾವಣೆ ಸೇವೆ ಇದೆ. ಸುಕನ್ಯಾ ಸಮೃದ್ಧಿ ಯೋಜನೆ ಹಣವನ್ನು ಈ ಆ್ಯಪ್ ಮೂಲಕ ಪಾವತಿಸಬಹುದು. ಐಪಿಪಿಬಿ ಬ್ಯಾಂಕ್ ಖಾತೆ ತೆರೆದವರಿಗೆ ಒಂದು ಕಾರ್ಡ್ ನೀಡಲಾಗುತ್ತದೆ. ಅದನ್ನು ಸ್ಕ್ಯಾನ್ ಮಾಡಿ ಅಂಚೆ ಕಚೇರಿಯಲ್ಲಿ ಹಣ ಪಾವತಿಸಬಹುದು.
ಜೊತೆಗೆ ಗೋಲ್ಡ್ ಬಾಂಡ್ ಯೋಜನೆ ತಂದಿದೆ. ಈ ಯೋಜನೆಯ ಫಲಾನುಭವಿಗಳು ಬಾಂಡ್ ಪಡೆಯುವ ದಿನ ಚಿನ್ನಕ್ಕೆ ಮಾರುಕಟ್ಟೆ ದರ ಏನಿದೆಯೋ ಅದರಂತೆ ಖರೀದಿಸಬಹುದು. ಇದು ನಿರ್ದಿಷ್ಟ ಅವಧಿಗೆ ಬಾಂಡ್ (ಕನಿಷ್ಠ 5 ವರ್ಷ-ಗರಿಷ್ಠ 7 ವರ್ಷ) ನೀಡಲಾಗುತ್ತದೆ. ಪ್ರತಿ 6 ತಿಂಗಳಿಗೊಮ್ಮೆ ಬಾಂಡ್ ಮೇಲೆ ಶೇ.2.50ರಷ್ಟು ಬಡ್ಡಿ ನೀಡಲಾಗುತ್ತದೆ. ನಿವೃತ್ತ ನೌಕರರು ಪಡೆಯುವ ಪಿಂಚಣಿಯನ್ನು ಮುಂದೆ ಅಂಚೆ ಇಲಾಖೆಯ ಮೂಲಕ ನೀಡಲಾಗುತ್ತದೆ. ಅದಕ್ಕಾಗಿ ಪಿಂಚಣಿ ಪಡೆಯುವವರು ವರ್ಷಕ್ಕೊಮ್ಮೆ ಲೈಫ್ ಸರ್ಟಿಫಿಕೇಟ್ (ಜೀವಿತ ಪ್ರಮಾಣ ಪತ್ರ) ಮಾಡಿಸಬೇಕು.
ಅಂಚೆ ಇಲಾಖೆಯ ಸೇವೆಗಳು: ಇಲಾಖೆಯು ಅಂಚೆ ಸೇವೆ, ಪಾರ್ಸಲ್, ಮನಿ ಆರ್ಡರ್‌, ಆರ್ಡಿ, ಪೋಸ್ಟಲ್ ಲೈಪ್ ಇನ್ಸೂರೆನ್ಶ್, ರೂರಲ್ ಪೋಸ್ಟ್ ಲೈಫ್ ಇನ್ಸೂರೆನ್ಶ್ ಸೇವೆ ನೀಡುತ್ತಿದೆ. ಇಷ್ಟೆಲ್ಲಾ ಸೇವೆಗಳಿದ್ದರೂ ಅಂಚೆ ಇಲಾಖೆಯು ಗ್ರಾಮೀಣ ಭಾಗದ ಜನರಿಗೆ ಈ ಕುರಿತು ಅರಿವು ಮೂಡಿಸುವ ಕ್ರಮಕ್ಕೆ ಮುಂದಾಗದಿರುವುದು ಬೇಸರದ ಸಂಗತಿಯಾಗಿದೆ.
