ನಾವ್ ಹೆಂಗ್‌ ಬಿತ್ಬೇಕೋ ಮಳೆರಾಯ.. ಹಿಂಗಾದ್ರ್‌ ಹೆಂಗ್‌ ಅಂತೀನಿ ಬಾಳ್ವೆ..!

ಈ ಬಾರಿ ರಾಜ್ಯದೆಲ್ಲೆಡೆ ಮುಂಗಾರು ಕೈಕೊಟ್ಟಿದ್ದು, ರಾಯಚೂರು ಜಿಲ್ಲೆಯಲ್ಲಿ ಲಕ್ಷಾಂತರ ಹೆಕ್ಟೇರ್ ಪ್ರದೇಶದಲ್ಲಿ ನಡೆಯಬೇಕಿದ್ದ ಬಿತ್ತನೆ ಕಾರ್ಯ ಕೇವಲ ಸಾವಿರ ಹೆಕ್ಟೇರ್ ಪ್ರದೇಶಕ್ಕೆ ಸೀಮಿತವಾಗಿದೆ.

ರಾಯಚೂರು: ಇಷ್ಟೊತ್ತಿಗಾಗಲೇ ಮುಂಗಾರು ಪೈರು ಕಾಣ್ಬೇಕಿತ್ತು. ಆದರೆ, ಇನ್ನೂ ಭೂಮಿ ಹದಗೊಳಿಸಲಾಗ್ತಿದೆ. ಎತ್ತುಗಳಲ್ಲಾಗಲಿ, ಈ ರೈತನಿಗಾಗಲಿ ಖುಷಿಯಿಲ್ಲ. ಕಸವೂ ಕಾಣಿಸ್ತಿಲ್ಲ. ಯಾಕಂದ್ರೇ, ಮುಂಗಾರು ಮಳೆ ಕೊರತೆ.

ರಾಯಚೂರು ಜಿಲ್ಲೆಯಲ್ಲಿ ಈ ಬಾರಿಯೂ ಮುಂಗಾರು ಕೈಕೊಟ್ಟಿದೆ. ಈಗಾಗಲೇ ಲಕ್ಷಾಂತರ ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆಯಾಗ್ಬೇಕಿತ್ತು. ಆದರೆ, ಇಲ್ಲೊಂದಿಷ್ಟು, ಅಲ್ಲೊಂದಿಷ್ಟು ಕಡೆ ಬಿತ್ತನೆಯಾಗಿದೆ. ವಾರ್ಷಿಕ ವಾಡಿಕೆ ಮಳೆ 632 ಮಿ.ಮೀ. ಜನವರಿ 1ರಿಂದ ಜುಲೈ 2ರವರೆಗೆ ವಾಡಿಕೆಯಂತೆ 154 ಮಿ.ಮೀ. ಮಳೆಯಾಗಬೇಕು. ಆದರೆ, ಆಗಿದ್ದು ಬರೀ 80 ಮಿ.ಮೀ. ಅಂದ್ರೇ ಶೇ.48ರಷ್ಟು ಮಳೆ ಕೊರತೆ ಕಾಣಿಸಿದೆ. ಮುಂಗಾರಿನಲ್ಲಿ 3,50,500 ಹೆಕ್ಟರ್ ಪ್ರದೇಶದಲ್ಲಿ ಬಿತ್ತನೆ ಗುರಿಯಿತ್ತು. ಆದರೆ, ಈಗ ಕೇವಲ 6,133 ಹೆಕ್ಟೇರ್​​​​​ನಲ್ಲಿ ಬಿತ್ತಲಾಗಿದೆ.

ಭತ್ತ, ತೊಗರಿ, ಹೆಸರು, ಸಜ್ಜೆ, ಮೆಕ್ಕೆಜೋಳ ಹಾಗೂ ಸೂರ್ಯಕಾಂತಿ ಸೇರಿ 8,677 ಕ್ವಿಂಟಾಲ್‌ನಷ್ಟು ಬಿತ್ತನೆ ಬೀಜ ಬೇಡಿಕೆಯಿತ್ತು. ಕೃಷಿ ಇಲಾಖೆ ಈಗಾಗ್ಲೇ 2938.29 ಕ್ವಿಂಟಾಲ್‌ನಷ್ಟು ಬೀಜ ನೀಡಿದೆ. 1561 ಕ್ವಿಂಟಾಲ್‌ನಷ್ಟು ಬೀಜ 4,565 ರೈತರಿಗೆ ವಿತರಿಸಲಾಗಿದೆ. ನೀರಾವರಿ ಪ್ರದೇಶದಲ್ಲಿ ಮಾತ್ರ ಬಿತ್ತನೆ ಕಾರ್ಯ ನಡೆದಿದೆ ಅಂತಾರೆ ಕೃಷಿ ಇಲಾಖೆ ಅಧಿಕಾರಿಗಳು. ಮುಂಗಾರು ಮುನಿದಿದೆ. ಹಾಗಾಗಿ ಬಿಸಿಲೂರಿನ ರೈತರಲ್ಲಂತೂ ಮಂದಹಾಸವೇ ಕಾಣಿಸುತ್ತಿಲ್ಲ. ಅದ್ಯಾವಾಗ ಮಳೆಯಾಗುತ್ತೋ.. ಅನ್ನದಾತರ ಕಷ್ಟ ಇನ್ಯಾವಾಗ ದೂರವಾಗ್ತವೋ ದೇವ್ರೇ ಬಲ್ಲ.