ಮೈಸೂರು : ನಿವೃತ್ತ ಪ್ರಾಂಶುಪಾಲರ ಕೊಲೆಗೆ ಗಾಯಕಿ ಅನನ್ಯ ಭಟ್ ತಂದೆ ವಿಶ್ವನಾಥ್ ಭಟ್ 7 ಲಕ್ಷ ರೂ. ಸುಪಾರಿ ಜೊತೆಗೆ ಸಂಸ್ಕೃತ ಪಾಠ ಶಾಲೆಯಲ್ಲಿ ಸುಪಾರಿ ಕಿಲ್ಲರ್ಗೆ ಉದ್ಯೋಗ ನೀಡುವುದಾಗಿ ಮಾತುಕತೆಯಾಗಿತ್ತು ಎಂದು ನಗರ ಕಾನೂನು ಮತ್ತು ಸುವ್ಯವಸ್ಥೆ ಡಿಸಿಪಿ ಡಾ.ಪ್ರಕಾಶ್ ಗೌಡ ತಿಳಿಸಿದರು.
ನಿವೃತ್ತ ಪ್ರಾಂಶುಪಾಲ ಪರಶಿವಮೂರ್ತಿ ಸುಪಾರಿ ಕೊಲೆ ಬಗ್ಗೆ ಮಾಹಿತಿ ನೀಡಿದ ಡಿಸಿಪಿ ಪ್ರಕಾಶ್ ಗೌಡ, ಕೊಲೆಯಾದ ಪರಶಿವಮೂರ್ತಿ ವಿಶ್ವಚೇತನ ಸಂಸ್ಕೃತ ಪಾಠ ಶಾಲೆಯನ್ನು ನಡೆಸುತ್ತಿದ್ದು, ಇಲ್ಲಿ ವಿಶ್ವನಾಥ್ ಭಟ್ ಶಿಕ್ಷಕನಾಗಿ ಕೆಲಸ ಮಾಡುತ್ತಿದ್ದ, ಜೊತೆಗೆ ಶಾಲೆಯ ಮೇಲ್ವಿಚಾರಕನಾಗಿಯೂ ಇದ್ದ. ಕೊಲೆಯಾದ ಪ್ರಾಂಶುಪಾಲ ಪರಶಿವಮೂರ್ತಿ ಶಿಕ್ಷಕರಿಗೆ ನೀಡುತ್ತಿದ್ದ ಸಂಬಳದಲ್ಲಿ ಪಾಲು ಬೇಕೆಂದು ಕೇಳುತ್ತಿದ್ದರು, ಜೊತೆಗೆ ಶಿಕ್ಷಕರಿಗೆ ಕಿರುಕುಳ ನೀಡುತ್ತಿದ್ದರು. ಇದರಿಂದ ನೊಂದಿದ್ದ ವಿಶ್ವನಾಥ್ ಭಟ್, ತನ್ನ ಸ್ನೇಹಿತರ ಜೊತೆ ಸೇರಿಕೊಂಡು ಕೊಲೆ ಮಾಡಲು ಸಂಚು ರೂಪಿಸಿದ್ದ. ಅದರಂತೆ ಸಿದ್ದರಾಜು ಮತ್ತು ಪರಶಿವ ಎಂಬುವರಿಗೆ ಈ ಕೆಲಸ ವಹಿಸಿದ್ದ. ಅವರು ನಾಗೇಶ್ ಮತ್ತು ನಿರಂಜನ್ ಎಂಬುವರಿಗೆ 7 ಲಕ್ಷ ಸುಪಾರಿ ನೀಡಿದ್ದು, ಅವರಿಬ್ಬರು ಪರಶಿವಮೂರ್ತಿಯನ್ನು ಕೊಲೆ ಮಾಡಿದ್ದಾರೆ ಎಂದು ತಿಳಿಸಿದರು.
ವಿಶ್ವಚೇತನ ಶಿಕ್ಷಣ ಸಂಸ್ಥೆಯ ಆಡಳಿತ ಮಂಡಳಿ ಜಗಳದ ಬಗ್ಗೆ ಒಂದು ವರ್ಷದ ಹಿಂದೆಯೇ ಎನ್.ಆರ್. ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ವಿಶ್ವನಾಥ್ ಭಟ್ ಅವರ ಮಗಳು ಗಾಯಕಿ ಅನನ್ಯ ಭಟ್ ಕಳೆದ 2 ವರ್ಷಗಳ ಹಿಂದೆ ಮದುವೆಯಾಗಿ ಬೆಂಗಳೂರಿನಲ್ಲಿ ವಾಸವಿದ್ದು , ಅನನ್ಯ ಭಟ್ಗೂ ಈ ಕೊಲೆಗೂ ಯಾವುದೇ ಸಂಬಂಧವಿಲ್ಲ, ತಂದೆಯಷ್ಟೇ ಪ್ರಕರಣದಲ್ಲಿ ಆರೋಪಿ ಎಂದು ಡಿಸಿಪಿ ಪ್ರಕಾಶ್ ಗೌಡ ಮಾಹಿತಿ ನೀಡಿದರು.
ಕೊಲೆ ಆರೋಪಿಗಳು ಸಿಕ್ಕಿ ಬಿದ್ದದ್ದು ಹೇಗೆ?
ಸೆಪ್ಟೆಂಬರ್ 20 ರಂದು ನಿವೇದಿತಾ ನಗರದಲ್ಲಿ ಪರಶಿವಮೂರ್ತಿ ಭೀಕರವಾಗಿ ಕೊಲೆಯಾಗಿದ್ದರು. ಪ್ರಕರಣದ ತನಿಖೆ ನಡೆಸಲು ಪೊಲೀಸರು ವಿಶೇಷ ತಂಡ ರಚನೆ ಮಾಡಿದ್ದರು. ಪೊಲೀಸರು ಆರಂಭದಲ್ಲಿ ಪರಶಿವಮೂರ್ತಿಯ ಹೆಂಡತಿಯ ಬಡ್ಡಿ ವ್ಯವಹಾರದ ಆಯಾಮಗಳಲ್ಲಿ ತನಿಖೆ ಮಾಡಿದಾಗ ಯಾವುದೇ ಸುಳಿವು ಸಿಕ್ಕಿರಲಿಲ್ಲ. ಕೊನೆಗೆ ಕೊಲೆ ಮಾಡಿ ಆರೋಪಿಗಳು ಪರಾರಿಯಾಗಿರುವ ದೃಶ್ಯವನ್ನು ತೆಗೆದು ತನಿಖೆ ಮಾಡಿದಾಗ ಪೊಲೀಸರಿಗೆ ಸುಳಿವು ಸಿಕ್ಕಿತ್ತು. ಆ ಪ್ರಕಾರ, ಸಂಸ್ಕೃತ ಪಾಠ ಶಾಲೆಯ ಶಿಕ್ಷಕರನ್ನು ವಿಚಾರಿಸಿದಾಗ, ಆರೋಪಿಗಳ ಮಾಹಿತಿ ಗೊತ್ತಾಗಿದೆ.
ಕಳೆದ ಒಂದು ತಿಂಗಳ ಹಿಂದೆ ಪರಶಿವಮೂರ್ತಿ ಅವರು, ಅಣ್ಣನ ಜೊತೆ ತಿ.ನರಸೀಪುರ ಕಡೆಯಿಂದ ಕಾರಿನಲ್ಲಿ ಬರುವಾಗ ಕೊಲೆ ಮಾಡಲು ವಿಫಲ ಯತ್ನ ನಡೆದಿರುವುದು ಬೆಳಕಿಗೆ ಬಂದಿದೆ. ವಿಶ್ವನಾಥ್ ಭಟ್ 7 ಲಕ್ಷ ಸುಪಾರಿ ಕೊಟ್ಟು ಪರಶಿವಮೂರ್ತಿಯನ್ನು ಕೊಲೆ ಮಾಡಿಸಿರುವ ವಿಚಾರ ಕೊಲೆ ಮಾಡಿದವರು ಒಪ್ಪಿಕೊಂಡಿದ್ದಾರೆ ಎಂದು ಡಾ.ಪ್ರಕಾಶ್ ಗೌಡ ಹೇಳಿದ್ದಾರೆ.
