ಮೈಸೂರು: ಎರಡೂ ಉಪ ಚುನಾವಣೆಯನ್ನು ಗೆಲ್ಲುತ್ತೇವೆ, ಈಗಾಗಲೇ ಶಿರಾದಲ್ಲಿ ಜಯಚಂದ್ರ ಸೋಲನ್ನು ಒಪ್ಪಿಕೊಂಡು ಹತಾಶೆಯಿಂದ ಹೇಳಿಕೆ ನೀಡುತ್ತಿದ್ದಾರೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಎಸ್.ಟಿ.ಸೋಮಶೇಖರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇಂದು ಜಿಲ್ಲಾ ಪಂಚಾಯಿತಿಯಲ್ಲಿ ತಲಕಾಡು ಪಂಚಲಿಂಗ ದರ್ಶನದ ಪೂರ್ವಭಾವಿ ಸಭೆಗೆ ಆಗಮಿಸಿದ ಸಚಿವ ಎಸ್.ಟಿ.ಸೋಮಶೇಖರ್ ಮಾತನಾಡಿ, ಶಿರಾ ಹಾಗೂ ಆರ್ಆರ್ ನಗರ ಎರಡೂ ಕಡೆಯೂ ನೂರಕ್ಕೆ ನೂರರಷ್ಟು ಗೆಲ್ಲುತ್ತೇವೆ. ಶಿರಾದಲ್ಲಿ 15,000ಕ್ಕೂ ಹೆಚ್ಚಿನ ಮತಗಳಿಂದ ಗೆಲುವು ಸಾಧಿಸುತ್ತೇವೆ, ಜಯಚಂದ್ರ ಈಗಾಗಲೇ ಸೋಲು ಒಪ್ಪಿಕೊಂಡಿದ್ದಾರೆ. ಎರಡೂ ಕಡೆ ಬಿಜೆಪಿ ಜಯಭೇರಿ ಬಾರಿಸುತ್ತದೆ ಎಂದರು.
ಆರ್ಆರ್ ನಗರದಲ್ಲಿ ಕಡಿಮೆ ಮತದಾನ ಆಗಿದ್ದು, ಇದು ಬಿಜೆಪಿಗೆ ಗೆಲ್ಲಲು ತೊಂದರೆಯಾಗುತ್ತದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ಇಲ್ಲ, ಹಿಂದೆ ಶೇಕಡಾವಾರು ಮತದಾನ ಕಡಿಮೆಯಾದರೆ ಬಿಜೆಪಿಗೆ ಕಷ್ಟ ಆಗುತ್ತಿತ್ತು. ಆದರೆ, ಈಗ ಅದು ಇಲ್ಲ, ನಾವು ಆರ್ಆರ್ ನಗರವನ್ನು 20,000 ಲೀಡ್ನಿಂದ ಗೆಲ್ಲುತ್ತೇವೆ. ಕೋವಿಡ್ ನಡುವೆಯೂ ಶೇ. 45ರಷ್ಟು ಮತದಾನ ನಡೆದಿರುವುದು ಹೆಚ್ಚೇ ಎಂದರು.
ಶಿರಾದ ಕಾಂಗ್ರೆಸ್ ಅಭ್ಯರ್ಥಿ ಜಯಚಂದ್ರ ಇವಿಎಂ ಮಿಷನ್ಗಳ ಬಗ್ಗೆ ಸಂಶಯ ವ್ಯಕ್ತಪಡಿಸಿರುವುದನ್ನು ನೋಡಿದರೆ ಸೋಲು ಒಪ್ಪಿಕೊಂಡ ಹಾಗೆ ಕಾಣಿಸುತ್ತದೆ, ಎಲೆಕ್ಷನ್ ಕೌಂಟಿಂಗ್ ಸಾರ್ವಜನಿಕವಾಗಿ ನಡೆದಿದೆ, 15 ರಿಂದ 20,000 ಲೀಡ್ನಲ್ಲಿ ಜಯಚಂದ್ರ ಸೋಲುತ್ತೇನೆ ಎಂದು ಗೊತ್ತಾಗಿದೆ ಅದಕ್ಕೆ ಈ ರೀತಿ ಹೇಳುತ್ತಿದ್ದಾರೆ ಎಂದರು.
ಇನ್ನು ಡಿಸೆಂಬರ್ನಲ್ಲಿ ತಲಕಾಡು ಪಂಚಲಿಂಗ ದರ್ಶನ ನಡೆಯಲಿದ್ದು, ದಸರಾದ ರೀತಿಯಲ್ಲಿ ಸರಳವಾಗಿ ಯಾವ ರೀತಿ ನಡೆಸಬೇಕು ಎಂಬುದನ್ನು ಇಂದಿನ ಸಭೆಯಲ್ಲಿ ತೀರ್ಮಾನ ಕೈಗೊಂಡು ನಂತರ ಸಿಎಂ ಜೊತೆ ಚರ್ಚೆ ಮಾಡುತ್ತೇವೆ ಎಂದರು.
