ಮೈಸೂರು: ಕೋವಿಡ್ ಮಹಾಮಾರಿ ಜಗತ್ತನ್ನೇ ತಲ್ಲಣಗೊಳಿಸಿದ ಸಂದರ್ಭದಲ್ಲಿ ತುರ್ತು ಚಿಕಿತ್ಸೆಗಾಗಿ ಹಳೆಯ ರೈಲ್ವೆ ಬೋಗಿಗಳಲ್ಲಿ ನಿರ್ಮಾಣವಾದ ಕೋವಿಡ್ ಸೆಂಟರ್ಗಳು ರೋಗಗಳ ಸೇವೆಗೆ ಲಭ್ಯವಾಗದೆ ತುಕ್ಕು ಹಿಡಿದಿವೆ.
ಮೈಸೂರು ನೈಋತ್ಯ ರೈಲ್ವೆ ವಿಭಾಗದಲ್ಲಿ ಕಷ್ಟಪಟ್ಟು ನಿರ್ಮಾಣ ಮಾಡಿದ್ದ ರೈಲು ಬೋಗಿ ಕೋವಿಡ್ ಸೆಂಟರ್ಗಳ ಬಳಕೆಗಾಗಿ ರಾಜ್ಯ ಸರ್ಕಾರ ಯಾವುದೇ ಮನವಿ ಸಲ್ಲಿಸದ ಹಿನ್ನೆಲೆಯಲ್ಲಿ ಕೋವಿಡ್ಗಾಗಿ ನಿರ್ಮಾಣವಾಗಿದ್ದ ರೈಲ್ವೆ ಬೋಗಿ ಕೋವಿಡ್ ವಾರ್ಡ್ಗಳು ಬಳಕೆಯಾಗದೆ ಮೂಲೆಗುಂಪಾಗಿವೆ.
ಇನ್ನು ಮೈಸೂರು ರೈಲ್ವೆ ವಿಭಾಗದ ವತಿಯಿಂದ ಕೋವಿಡ್ ತುರ್ತು ಚಿಕಿತ್ಸೆಗಾಗಿ 20 ವರ್ಷ ಸರ್ವಿಸ್ ಮುಗಿಸಿದ ಕೋಚ್ಗಳನ್ನು ಕೋವಿಡ್ ಸೆಂಟರ್ಗಳಾಗಿ ಪರಿವರ್ತನೆ ಮಾಡಲಾಗಿತ್ತು. ಇದರಲ್ಲಿ ಮೈಸೂರು ರೈಲ್ವೆ ವಿಭಾಗದಿಂದ 32 ಕೋಚ್, ಅಶೋಕಪುರಂ ವರ್ಕ್ ಶಾಪ್ನಿಂದ 96 ಕೋಚ್ ಸೇರಿ ಒಟ್ಟು ಮೈಸೂರು ಡಿವಿಜನ್ನಿಂದ 128 ರೈಲ್ವೆ ಕೋಚ್ಗಳನ್ನು ಕೋವಿಡ್ ಸೆಂಟರ್ಗಳಾಗಿ ಪರಿವರ್ತನೆ ಮಾಡಲಾಗಿತ್ತು.
ಇವುಗಳನ್ನು ಮೈಸೂರು ರೈಲ್ವೆ ವಿಭಾಗ ವ್ಯಾಪ್ತಿಯಲ್ಲಿ ಬರುವ ಹಾಸನ, ಶಿವಮೊಗ್ಗ ಟೌನ್, ಅರಸಿಕೆರೆ, ಹಾಗೂ ಮೈಸೂರು ಫ್ಲಾಟ್ ಫಾರಂನಲ್ಲಿ ಇಡಲು ಪ್ಲಾನ್ ಮಾಡಲಾಗಿದ್ದು, ಆ ರೀತಿಯಲ್ಲಿ ಪ್ರತಿಯೊಂದು ಬೋಗಿಯ ಕೋವಿಡ್ ಸೆಂಟರ್ನಲ್ಲಿ 9 ಮಂದಿ ಕೋವಿಡ್ ಸೋಂಕಿತರು ಹಾಗೂ ಮೆಡಿಕಲ್ ಸ್ಟಾಫ್ ಇರಲು ಇದರ ಜೊತೆಗೆ ಆಕ್ಸಿಜನ್ ಸಿಲಿಂಡರ್ ಇಡಲು ಎಲ್ಲಾ ರೀತಿಯ ಡಿವೈಸ್ ಅನ್ನು ಇಡಲಾಗಿತ್ತು.
ಒಂದೊಂದು ರೈಲ್ವೆ ಬೋಗಿಯನ್ನು ಕೋವಿಡ್ ಸೆಂಟರ್ ಆಗಿ ಪರಿವರ್ತಿಸಲು 35 ರಿಂದ 36 ಸಾವಿರ ರೂಪಾಯಿ ಖರ್ಚು ಮಾಡಲಾಗಿದೆ. ಆದರೆ ಸೋಂಕು ಕಡಿಮೆಯಾಗುತ್ತಿರುವುದರಿಂದ ಕೋವಿಡ್ಗಾಗಿ ಪರಿವರ್ತನೆಯಾಗಿದ್ದ ಹಳೆಯ ರೈಲ್ವೆ ಬೋಗಿಗಳು ಒಂದು ಸಹ ಬಳಕೆಯಾಗಿಲ್ಲ ಎಂದು ರೈಲ್ವೆ ಇಲಾಖೆಯ ವರ್ಕ್ ಶಾಪ್ ಮ್ಯಾನೇಜರ್ ಶಾಂತಿಬಾಬು ಮಾಹಿತಿ ನೀಡಿದ್ದಾರೆ.
