ಮೈಸೂರು: ಅಶ್ವಾರೋಹಿ ದಳದ ಕಮಾಂಡೆಂಟ್ ಕಚೇರಿಯ ಪೊಲೀಸರ ಫೈಲ್ಗಳು ಭಿಕ್ಷುಕಿ ಕೈಗೆ ಸಿಕ್ಕ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.
ನಗರದ ಅಶ್ವಾರೋಹಿ ದಳದ ಕಮಾಂಡೆಂಟ್ ಕಚೇರಿಯಲ್ಲಿ ಕೆಲಸ ಮಾಡುವ ಪೊಲೀಸರ ಸೇವೆಗೆ ಸಂಬಂಧಿಸಿದ ಫೈಲ್ಗಳು ಕಚೇರಿ ಪಕ್ಕದ ರಸ್ತೆಯಲ್ಲಿ ಬಿದ್ದಿವೆ. ಇದನ್ನು ನೋಡಿದ ಭಿಕ್ಷುಕಿ ಆ ಫೈಲ್ಗಳನ್ನು ಎತ್ತಿಕೊಂಡು ಬಂದು ತಾನು ಕುಳಿತುಕೊಳ್ಳುವ ಸೈಕಲ್ ಸ್ಟ್ಯಾಂಡ್ ಬಳಿ ಇಟ್ಟಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಬೆಳಗ್ಗೆ ಟ್ರಿಣ್ ಟ್ರಿಣ್ ಸೈಕಲ್ ನೋಡಿಕೊಳ್ಳುವ ವ್ಯಕ್ತಿಗಳು ಈ ಫೈಲ್ ನೋಡಿ ಪೊಲೀಸರಿಗೆ ವಾಪಸ್ ಕೊಟ್ಟಿದ್ದಾರೆ.
ಪ್ರಮೋಷನ್ ತಪ್ಪಿಸಲು ನಡೆದಿತ್ತಾ ಈ ಕೃತ್ಯ?
ಮೌಂಟೆಡ್ ಕಮಾಂಡೆಂಟ್ ಕಚೇರಿಯಲ್ಲಿ ಕೆಲಸ ಮಾಡುವ ಮೂವರು ಕಾನ್ಸ್ಟೇಬಲ್ಗಳಿಗೆ ಸೇರಿದ ಫೈಲ್ ಇವಾಗಿದ್ದು, ಈ ಕಚೇರಿಯಲ್ಲಿ ಕೆಲಸ ಮಾಡುವ ಆಡಳಿತಾಧಿಕಾರಿಗಳು, ಕೆಳ ಹಂತದ ಸಿಬ್ಬಂದಿಗೆ ಪ್ರಮೋಷನ್ ತಪ್ಪಿಸಲು ಫೈಲ್ ಹೊರಗೆ ಎಸೆದರಾ? ಎಂಬ ಅನುಮಾನ ಮೂಡಿಸಿದೆ. ಈ ಬಗ್ಗೆ ಮೌಂಟೆಡ್ ಪೊಲೀಸ್ ಕಮಾಂಡೆಂಟ್ ಡಿಸಿಪಿ ನಾಗರಾಜು ಅವರನ್ನು ಈಟಿವಿ ಭಾರತ ದೂರವಾಣಿಯಲ್ಲಿ ಸಂಪರ್ಕಿಸಿದಾಗ, ಘಟನೆ ನಡೆದಿರುವುದು ನಿಜ. ಈ ಬಗ್ಗೆ ಮಾಧ್ಯಮಗಳ ಜೊತೆ ನಂತರ ಮಾತನಾಡುತ್ತೇನೆ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.
