ಮೈಸೂರು: ಮಹಾನಗರ ಪಾಲಿಕೆಯ ಮೇಯರ್ ಮತ್ತು ಉಪ ಮೇಯರ್ ಸ್ಥಾನಕ್ಕಾಗಿ ಮೂರು ಪಕ್ಷಗಳಿಂದ ನಾಮಪತ್ರ ಸಲ್ಲಿಕೆಯಾಗಿದೆ. ಅತಂತ್ರ ಪಾಲಿಕೆಯ ಮೇಯರ್ ಸ್ಥಾನ ಯಾರ ಪಾಲಾಗುತ್ತದೆ ಎಂಬುದೀಗ ಕುತೂಹಲದ ಸಂಗತಿಯಾಗಿದೆ.
ಇಂದು ಮೈಸೂರು ಮಹಾನಗರ ಪಾಲಿಕೆಯ ಮೇಯರ್ ಹಾಗೂ ಉಪಮೇಯರ್ ಸ್ಥಾನಕ್ಕಾಗಿ ನಡೆಯುತ್ತಿರುವ ಚುನಾವಣೆಯಲ್ಲಿ ಕಾಂಗ್ರೆಸ್ನಿಂದ ಮೇಯರ್ ಸ್ಥಾನಕ್ಕೆ ಸಯ್ಯದ್ ಹಸ್ರತ್ ಉಲ್ಲಾ ಹಾಗೂ ಗೋಪಿ ಇಬ್ಬರೂ ನಾಮಪತ್ರ ಸಲ್ಲಿಸಿದ್ದಾರೆ. ಜೆಡಿಎಸ್ನಿಂದ ಕೆ.ವಿ.ಶ್ರೀಧರ್ ಹಾಗೂ ಬಿಜೆಪಿಯಿಂದ ಮೇಯರ್ ಸ್ಥಾನಕ್ಕೆ ಶಿವಕುಮಾರ್ ನಾಮಪತ್ರ ಸಲ್ಲಿಸಿದ್ದಾರೆ.
ಉಪ ಮೇಯರ್ ಸ್ಥಾನಕ್ಕೆ ಕಾಂಗ್ರೆಸ್ನಿಂದ ಶೋಭಾ ಸುನಿಲ್, ಜೆಡಿಎಸ್ನಿಂದ ರೇಷ್ಮಾ ಭಾನು ಹಾಗೂ ಬಿಜೆಪಿಯಿಂದ ರೂಪ ನಾಮಪತ್ರ ಸಲ್ಲಿಸಿದ್ದು, ಅತಂತ್ರ ಪಾಲಿಕೆಯಲ್ಲಿ ಯಾರು ಅಧಿಕಾರ ಹಿಡಿಯುತ್ತಾರೆ ಎಂಬುದನ್ನು ಕಾದು ನೋಡಬೇಕು.
ಸದಸ್ಯರ ಬಲಾಬಲ ಹೀಗಿದೆ: ಮೈಸೂರು ಮಹಾನಗರ ಪಾಲಿಕೆಯಲ್ಲಿ ಒಟ್ಟು 65 ಸದಸ್ಯರಿದ್ದಾರೆ. ಇದರಲ್ಲಿ ಸಂಸದರು, ಎಂಎಲ್ಎ ಹಾಗೂ ಎಂಎಲ್ಸಿ ಸೇರಿ ಒಟ್ಟು 76 ಮಂದಿ ಮತದಾರರಿದ್ದಾರೆ. ಬಿಜೆಪಿಯ 22 ಪಾಲಿಕೆ ಸದಸ್ಯರು ಹಾಗೂ ಸಂಸದ ಪ್ರತಾಪ್ ಸಿಂಹ, ಎಂಎಲ್ಎ ರಾಮದಾಸ್ ಹಾಗೂ ನಾಗೇಂದ್ರ ಮತ್ತು ಎಂಎಲ್ಸಿ ವಿಶ್ವನಾಥ್ ಸೇರಿ ಒಟ್ಟು 26 ಮಂದಿ ಬಿಜೆಪಿ ಸದಸ್ಯರಿದ್ದು, ಕಾಂಗ್ರೆಸ್ನ 20 ಜನ ಪಾಲಿಕೆಯ ಸದಸ್ಯರು ಎಂಎಲ್ಎ ತನ್ವಿರ್ ಸೇಠ್ ಹಾಗೂ ಎಂಎಲ್ಸಿಗಳಾದ ಡಾ.ಬಿ.ತಿಮ್ಮಯ್ಯ ಮಧು ಜಿ ಮದೇಗೌಡ ಹಾಗೂ ದಿನೇಶ್ ಗುಳಿಗೌಡ ಸೇರಿ ಒಟ್ಟು 24 ಮಂದಿ ಕಾಂಗ್ರೆಸ್ ಸದಸ್ಯರಿದ್ದಾರೆ.
ಜೆಡಿಎಸ್ನ 17 ಜನ ಪಾಲಿಕೆ ಸದಸ್ಯರು ಹಾಗೂ ಶಾಸಕ ಜಿ.ಟಿ.ದೇವೇಗೌಡ ಎಂಎಲ್ಸಿ ಮಂಜೇಗೌಡ ಮತ್ತು ಮರಿತಿಬ್ಬೇ ಗೌಡ ಸೇರಿ 20 ಮಂದಿ ಸದಸ್ಯರಿದ್ದು, ಇದರಲ್ಲಿ ಮರಿತಿಬ್ಬೇ ಗೌಡ ಯಾವ ಪಕ್ಷ ಬೆಂಬಲಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ. ಇದರ ಜೊತೆಗೆ ಬಿಎಸ್ಪಿಯ ಒಬ್ಬ ಸದಸ್ಯೆ ಸೇರಿದಂತೆ ಐವರು ಪಕ್ಷೇತರರು ಇದ್ದು, ಇವರ ಬೆಂಬಲ ಯಾರಿಗೆ ಎಂಬುದು ಕುತೂಹಲಕ್ಕೆ ಕಾರಣವಾಗಿದೆ.
ಮೂರು ಪಕ್ಷಗಳ ಅಭ್ಯರ್ಥಿಗಳು ಪ್ರತ್ಯೇಕವಾಗಿ ನಾಮಪತ್ರ ಸಲ್ಲಿಸಿದ್ದು, ಯಾವುದೇ ಮೈತ್ರಿ ಏರ್ಪಡದಿದ್ದರೆ ಕಾಂಗ್ರೆಸ್ ಅಥವಾ ಬಿಜೆಪಿ ಮೇಯರ್ ಹಾಗೂ ಉಪಮೇಯರ್ ಸ್ಥಾನ ಗೆಲ್ಲಬಹುದು. ಆದರೆ ಕೊನೆಯ ಕ್ಷಣದ ತಂತ್ರಗಾರಿಕೆಯಿಂದ ಫಲಿತಾಂಶ ಬದಲಾಗಲೂಬಹುದು.
ಇದನ್ನೂ ಓದಿ: ಮೈಸೂರು ಮಹಾನಗರ ಪಾಲಿಕೆಯ ಮೇಯರ್ ಚುನಾವಣಾ ಮೈತ್ರಿ ಬಗ್ಗೆ ಶಾಸಕರುಗಳು ಹೇಳಿದ್ದೇನು ?
