ಮೈಸೂರು: ಶಿಥಿಲಗೊಂಡಿರುವ ಮೆಡಿಕಲ್ ಹಾಸ್ಟೆಲ್ ಛಾವಣಿ ಕುಸಿದ್ದಿದ್ದು, ವಿದ್ಯಾರ್ಥಿಗಳು ಪ್ರಾಣಾಪಾಯದಿಂದ ಪಾರಾಗಿರುವ ಘಟನೆ ನಡೆದಿದೆ. ನಗರದ ಜೆಎಲ್ಬಿ ರಸ್ತೆಯಲ್ಲಿರುವ ಮೆಡಿಕಲ್ ಹಾಸ್ಟೆಲ್ನಲ್ಲಿ ಒಟ್ಟು 300 ವಿದ್ಯಾರ್ಥಿಗಳು ನೆಲೆಸಿದ್ದು, ತಡರಾತ್ರಿ ಸುರಿದ ಭಾರಿ ಮಳೆಯಿಂದ ಛಾವಣಿ ಕುಸಿದು ಬಿದ್ದಿದೆ.
ಘಟನೆ ಕುರಿತು ಮಾತನಾಡಿರುವ ಹಾಸ್ಟೆಲ್ ವಾರ್ಡನ್ ಚಂದ್ರಶೇಖರ್, ಈ ಹಾಸ್ಟೆಲ್ ಅನ್ನು 1962ರಲ್ಲಿ ನಿರ್ಮಿಸಲಾಗಿದೆ. ಮಳೆ ಬಂದ ಕಾರಣ ಮೇಲೆ ಇರುವ ರೂಮ್ನಲ್ಲಿ ಛಾವಣಿ ಕುಸಿದಿದ್ದು, ವಿದ್ಯಾರ್ಥಿಗಳನ್ನು ಬೇರೆಡೆಗೆ ಸ್ಥಳಾಂತರಿಸಿದ್ದೇವೆ. ಹಾಗೂ ಮುಂದೆ ಬರುವ ವಿದ್ಯಾರ್ಥಿಗಳಿಗೆ ವಿಶ್ವವಿದ್ಯಾಲಯ ಗೆಸ್ಟ್ ಹೌಸ್ನಲ್ಲಿ ಪರ್ಯಾಯ ವ್ಯವಸ್ಥೆ ಕಲ್ಪಿಸಿದ್ದು, ಈ ಹಾಸ್ಟೆಲ್ ಕಟ್ಟಡ ಸರಿಪಡಿಸುವಂತೆ ನಾವು ಹಾಗೂ ಅಧಿಕಾರಿಗಳು ಸಭೆ ನಡೆಸಿ ದರಸ್ತಿ ಕಾರ್ಯ ಕುರಿತು ಚರ್ಚೆ ಮಾಡಿ ಕ್ರಮ ಕೈಗೊಳ್ಳುತ್ತೇವೆ ಎಂದರು.
ಇನ್ನು ಘಟನೆಯಲ್ಲಿ ಗಾಯಗೊಂಡಿದ್ದ ವಿದ್ಯಾರ್ಥಿ ಯಶವಂತ್ ಮಾತನಾಡಿ, ರೂಮ್ನಲ್ಲಿ ಓದುತ್ತಿರುವಾಗ ಇದ್ದಕ್ಕಿದ್ದಂತೆ ಗೋಡೆ ಬಿದ್ದಿದ್ದು, ತಲೆಗೆ ಸ್ವಲ್ಪ ಪೆಟ್ಟಾಗಿದೆ, ನಾನು ಕೆಲಸ ಮುಗಿಸಿಕೊಂಡು ಆಗಾ ತಾನೆ ರೂಮ್ಗೆ ಬಂದಿದ್ದೆ, ನನ್ನ ಇನ್ನೊಬ್ಬ ಸ್ನೇಹಿತ ರೂಮ್ನಲ್ಲಿ ಮಲಗಿದ್ದ, ಛಾವಣಿ ಬೀಳುವಾಗ ಯಾವುದೇ ಶಬ್ದವಾಗಲಿಲ್ಲ, ಏಕಾಏಕಿ ಬಿದ್ದ ಕಾರಣ ಸ್ವಲ್ಪ ಪೆಟ್ಟಾಗಿದ್ದು, ನಾವು ತಕ್ಷಣ ರೂಮಿನಿಂದ ಹೊರ ಬಂದೆವು ಎಂದಿದ್ದಾರೆ.
ಈ ಘಟನೆ ಬಗ್ಗೆ ಸಚಿವರು ಹೇಳಿದ್ದೇನು ?
ಈ ಬಗ್ಗೆ ಪ್ರತಿಕ್ರಿಯಿಸಿದ ಜಿಲ್ಲಾ ಉಸ್ತುವಾರಿ ಸಚಿವ ಎಸ್.ಟಿ.ಸೋಮಶೇಖರ್ ನನಗೆ ಈ ಘಟನೆ ಬಗ್ಗೆ ಮಾಹಿತಿ ಇಲ್ಲ. ಆದರೆ, ನಾನು ಸ್ಥಳಕ್ಕೆ ಹೋಗಿ ಖಂಡಿತ ಪರಿಶೀಲನೆ ನಡೆಸುತ್ತೇನೆ, ವಿದ್ಯಾರ್ಥಿಗಳಿಗೆ ಯಾವುದೇ ತೊಂದರೆಯಾಗಬಾರದು ಇದರ ಬಗ್ಗೆ ಕ್ರಮ ಕೈಗೊಳ್ಳುತ್ತೇನೆ ಎಂಬ ಭರವಸೆ ನೀಡಿದ್ದಾರೆ.
