ಸಾರ್ವಜನಿಕ ಸಾರಿಗೆ ಬಳಕೆಗೆ ಜನರ ಹಿಂದೇಟು: ಹಳೆ ಕಾರುಗಳಿಗೆ ಬಂತು ಹೊಸ ರೇಟು

ಕೊರೊನಾ ಕಾಲದಲ್ಲಿ ಆರ್ಥಿಕ ಸಂಕಷ್ಟ ಎದುರಾದರೂ ಜನತೆ ಹಳೆಯ ಕಾರು ಕೊಳ್ಳುವಲ್ಲಿ ಆಸಕ್ತಿ ತೋರುತ್ತಿದ್ದಾರೆ. ಸಾರ್ವಜನಿಕ ಸಂಚಾರಿ ವ್ಯವಸ್ಥೆಯಿಂದ ಕೊರೊನಾ ಭೀತಿ ಎದುರಾಗಿದ್ದು, ಸ್ವಂತ ವಾಹನ ಹೊಂದಲು ಜನತೆ ಮುಂದಾಗಿದ್ದಾರೆ.

ಮೈಸೂರು: ಲಾಕ್​​ಡೌನ್ ನಂತರ ಜನರು ಸಾರ್ವಜನಿಕ ಸಾರಿಗೆಯನ್ನು ಬಳಸಲು ಹಿಂದೇಟು ಹಾಕುತ್ತಿದ್ದು , ಇದರಿಂದ ಹಳೆಯ ಕಾರ್​ಗಳಿಗೆ ಇನ್ನಿಲ್ಲದ ಬೇಡಿಕೆ ಬಂದಿದೆ.

ಮೈಸೂರಲ್ಲಿ ಸೋಂಕಿತರ ಸಂಖ್ಯೆಯಲ್ಲಿ ಏರಿಕೆಯಾಗುತ್ತಿದ್ದು, ಇದರಿಂದ ಜನರು ಭಯಭೀತರಾಗಿದ್ದಾರೆ. ಅಲ್ಲದೆ ಸಾರ್ವಜನಿಕ ಸಾರಿಗೆಗಳಾದ ಬಸ್​, ಟ್ಯಾಕ್ಸಿ, ಆಟೋ ಬಳಸಲು ಜನರು ಹಿಂದೇಟು ಹಾಕುತ್ತಿದ್ದಾರೆ. ಅಲ್ಲದೆ ಸಾಲ ಆದರೂ ಮಾಡಿ ಸ್ವಂತ ಹಳೆಯ ಕಾರ್​​​ಗಳನ್ನು ಕೊಳ್ಳಲು ಮುಗಿಬೀಳುತ್ತಿದ್ದಾರೆ.

ಈ ಕುರಿತು ಮಾತನಾಡಿರುವ ಹಳೆಯ ಕಾರುಗಳ ಮಾರಾಟ ಸಂಘದ ಅಧ್ಯಕ್ಷ ಇರ್ಫಾನ್ ಷರಿಫ್, ಲಾಕ್​​​ಡೌನ್ ಮುನ್ನ ಚಿಕ್ಕ ಗಾಡಿಗಳನ್ನು ಯಾರು ಕೇಳುತ್ತಿರಲಿಲ್ಲ, ಆದರೆ ಲಾಕ್​ಡೌನ್ ನಂತರ ಸಾರ್ವಜನಿಕ ಸಂಚಾರಿ ವ್ಯವಸ್ಥೆ ಬಳಕೆ ಕಡಿಮೆಯಾಗಿದೆ. ಸಾಲ ಅಥವಾ ಚಿನ್ನಾವನ್ನಾದರೂ ಮಾರಿ 5 ಲಕ್ಷ ಒಳಗಿನ ಕಾರ್​​​ಗಳನ್ನು ಕೊಳ್ಳಲು ಜನರು ಮುಗಿಬೀಳುತ್ತಿದ್ದಾರೆ ಎಂದಿದ್ದಾರೆ.

ಇವರಲ್ಲದೆ, ಮೈಸೂರು ಕಾರ್ ಅಸೋಸಿಯೇಷನ್​ ಪ್ರಧಾನ ಕಾರ್ಯದರ್ಶಿ ರೆಹಮತ್​ ಬೇಗ್ ಮಾತನಾಡಿ, ಲಾಕ್​​ಡೌನ್ ನಂತರ ಹಳೆಯ ಕಾರುಗಳು ಮಾರಾಟ ಆಗುತ್ತವಾ ಎಂಬ ಭಯ ಇತ್ತು. ಆದರೆ ಈಗ ಲಾಕ್​​ಡೌನ್ ನಂತರ ಜನರು ಸಣ್ಣ ಕಾರ್​​ಗಳನ್ನು ಕೊಳ್ಳಲು ಬರುತ್ತಿದ್ದಾರೆ, ಅಲ್ಲದೆ ಬೇಡಿಕೆ ಸಹ ಹೆಚ್ಚಿದೆ ಎಂದಿದ್ದಾರೆ.

ಒಟ್ಟಾರೆ ಕೊರೊನಾ ಎಫೆಕ್ಟ್​​ನಿಂದಾಗಿ ಹಳೆಯ ಕಾರುಗಳಿಗೆ ಬೇಡಿಕೆ ಹೆಚ್ಚಿದ್ದು, ಹಳೆಯ ಕಾರು​ ಮಾರಾಟಗಾರರು ಸಂತಸಗೊಂಡಿದ್ದಾರೆ.