ಮೈಸೂರು: ಕಾಲಿಗೆ ಪೆಟ್ಟಾಗಿ ಮೇಲೇಳಲಾರದ ಸ್ಥಿತಿಯಲ್ಲಿರುವ ಬಸವನಿಗೆ ದರ್ಶನ್ ತಮ್ಮ ಆಪ್ತರನ್ನು ಕಳುಹಿಸಿ ವೈದ್ಯರ ಮೂಲಕ ಚಿಕಿತ್ಸೆ ಕೊಡಿಸುವ ಮೂಲಕ ಪ್ರಾಣಿ ಪ್ರಿಯ ಅನ್ನೋದನ್ನು ಮತ್ತೆ ಸಾಬೀತುಪಡಿಸಿದ್ದಾರೆ.
ಇದನ್ನೂ ಓದಿ: ಅನಾರೋಗ್ಯದಿಂದ ಬಳಲುತ್ತಿರುವ ಈ ಮೂಕ ಬಸವ ನಟ ದರ್ಶನ್ ಬಂದ್ರೆ ಹುಷಾರಾಗುತ್ತಂತೆ
ಜಿಲ್ಲೆಯ ಕಾಳಮ್ಮನಕೊಪ್ಪಲಿನಲ್ಲಿ ಅನಾರೋಗ್ಯದಿಂದ ಬಳಲುತ್ತಿದ್ದ ಮೂಕ ಬಸವ, ನಟ ದರ್ಶನ್ ಬಂದರೆ ಹುಷಾರಾಗುತ್ತದೆ ಎಂಬ ಸುದ್ದಿಯನ್ನು ಈಟಿವಿ ಭಾರತ್ ಮೊದಲ ಬಾರಿಗೆ ಪ್ರಸಾರ ಮಾಡಿತ್ತು. ಈ ಸುದ್ದಿಗೆ ಸ್ಪಂದಿಸಿದ ನಟ ದರ್ಶನ್, ಲಾಕ್ಡೌನ್ ಇದ್ದುದರಿಂದ ತಮ್ಮ ಪರವಾಗಿ ಆಪ್ತರನ್ನು ಕಳುಹಿಸಿ ವೈದ್ಯರ ಮೂಲಕ ಚಿಕಿತ್ಸೆ ಕೊಡಿಸಿದ್ದಾರೆ. ಈ ಮೂಲಕ ಈಟಿವಿ ಭಾರತ ವರದಿಗೆ ಸ್ಪಂದನೆ ಸಿಕ್ಕಿದೆ. ಅಲ್ಲದೆ ಶೀಘ್ರದಲ್ಲೇ ಅಲ್ಲಿಗೆ ಬಂದು ಆರೋಗ್ಯ ವಿಚಾರಿಸುವುದಾಗಿ ಹೇಳಿದ್ದಾರೆ ಎನ್ನಲಾಗಿದೆ.
ಈ ಬಸವ ಕಳೆದ ಬಾರಿ ಲೋಕಸಭಾ ಚುನಾವಣಾ ಸಂದರ್ಭದಲ್ಲಿ ನಟ ದರ್ಶನ್ ಪ್ರಚಾರ ವಾಹನಕ್ಕೆ ಅಡ್ಡಲಾಗಿ ಬಂದು ನಿಂತಿದ್ದಾಗ ದರ್ಶನ್ ವಾಹನದಿಂದ ಕೆಳಗಿಳಿದು ಬೆನ್ನು ಸವರಿ ಬಸವನನ್ನು ಕಳುಹಿಸಿದ್ದರು. ಈಗ ಅದೇ ಬಸವ ಅನಾರೋಗ್ಯಕ್ಕೆ ತುತ್ತಾಗಿದ್ದು, ಗ್ರಾಮಸ್ಥರು ದರ್ಶನ್ ಬರಬೇಕೆಂದು ಮನವಿ ಮಾಡಿದ್ದರು. ಈ ಸುದ್ದಿಯನ್ನು ಈಟಿವಿ ಭಾರತ ಪ್ರಸಾರ ಮಾಡಿತ್ತು. ಇದಕ್ಕೆ ಸ್ಪಂದಿಸಿದ ದರ್ಶನ್ ಸಹಾಯ ಮಾಡಿದ್ದು, ಮತ್ತೊಮ್ಮೆ ದರ್ಶನ್ ಪ್ರಾಣಿ ಪ್ರೀತಿ ತೋರಿದ್ದಾರೆ.
