ಮಂಡ್ಯ: ಅಂಬಿ ಎಂದರೆ ಅನ್ನ ಹಾಗೂ ಅಭಿಮಾನ ಎಂದು ಕನ್ನಡ ಚಿತ್ರರಂಗದ ಹಿರಿಯ ನಟ ದೊಡ್ಡಣ್ಣ ತಮ್ಮ ಆತ್ಮೀಯ ಸ್ನೇಹಿತ ಅಂಬರೀಶ್ ಅವರ ಗುಣಗಾನ ಮಾಡಿದ್ದಾರೆ.
ನಗರದ ಸಿಲ್ವರ್ ಜ್ಯೂಬ್ಲಿ ಪಾರ್ಕ್‌ನಲ್ಲಿ ನಡೆಯುತ್ತಿರುವ ಸ್ವಾಭಿಮಾನಿ ಸಮಾವೇಶದಲ್ಲಿ ಮಾತಾನಾಡಿದ ಅವರು, ಅಂಬಿಯ ಗುಣಗಾನದ ಜೊತೆಗೆ ಮಂಡ್ಯ ಜನರ ಹೃದಯವಂತಿಕೆಗೆ ಅಭಿನಂದನೆ ಸಲ್ಲಿಸಿದರು. ಚುನಾವಣೆಯಲ್ಲಿ ಟೀಕೆ ಮಾಡಿದ ಕೆಲವರಿಗೆ ನೀವು ಸರಿಯಾದ ಉತ್ತರ ನೀಡಿದ್ದೀರಿ. ಸುಮಲತಾ ಮಂಡ್ಯದ ಗೌಡ್ತಿ ಎಂದು ಒಪ್ಪಿಕೊಂಡಿದ್ದೀರಿ. ಅಂಬಿ ರೀತಿಯೇ ಸುಮಲತಾ ಅಂಬರೀಶ್ ಕೆಲಸ ಮಾಡುತ್ತಾರೆ. ಅಪ ಪ್ರಚಾರಗಳಿಗೆ ಕಿವಿಗೊಡಬೇಡಿ ಎಂದರು
ಮಂಡ್ಯ ಜನ ಅಧಿಕಾರದ ದರ್ಪಕ್ಕೆ ಬಗ್ಗುವ, ದುಡ್ಡಿಗೋಸ್ಕರ ಬದುಕುವ ಜನರಲ್ಲ, ಬದಲಾಗಿ ಸ್ವಾಭಿಮಾನಕ್ಕೋಸ್ಕರ ಎಂಬುದನ್ನು ನಿರೂಪಿಸಿದ್ದೀರಿ. ನಿಮ್ಮ ಪಾದಕ್ಕೆ ಧನ್ಯವಾದ ಎಂದರು.
ಇನ್ನು ಚುನಾವಣೆಯಲ್ಲಿ ಬೆಂಬಲ ನೀಡಿದ ದರ್ಶನ್ ಹಾಗೂ ಯಶ್ ಅವರಿಗೂ ಧನ್ಯವಾದ ಹೇಳಿದ ದೊಡ್ಡಣ್ಣ, ವಯಸ್ಸಿನಲ್ಲಿ ಅವರು ನನಗಿಂತ ಚಿಕ್ಕವರಾಗಿದ್ದರೂ, ಅವರಿಗೆ ನಾನು ಕೃತಜ್ಞತೆ ಸಲ್ಲಿಸುತ್ತೇನೆ ಎಂದರು ಹಿರಿಯ ನಟ ದೊಡ್ಡಣ್ಣ.
