ಮಂಡ್ಯ: ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಜಿಲ್ಲೆಯ ಅಭಿಮಾನಿಯೊಬ್ಬ ಬಿ.ಎಸ್.ಯಡಿಯೂರಪ್ಪ ಸಿಎಂ ಆಗಲೆಂದು ಹರಕೆ ಕಟ್ಟಿಕೊಂಡಿದ್ದ. ಆದರೆ, ಬಿಎಸ್ವೈ ಸಿಎಂ ಆಗಿದ್ದು ಕೆಲವೇ ದಿನಗಳು ಮಾತ್ರ. ಮತ್ತೆ ಸಿಎಂ ಆಗಲು ಒಂದೂವರೆ ವರ್ಷ ಕಾಲಿಗೆ ಚಪ್ಪಲಿಯನ್ನೇ ಧರಿಸಿರಲಿಲ್ಲ. ಈಗ ಅಭಿಮಾನಿ ಹರಕೆ ಫಲಿಸಿದ್ದು, ಸಿಎಂ ಯಡಿಯೂರಪ್ಪ ಅವರು ಅಭಿಮಾನಿಗೆ ವಿಶೇಷ ಉಡುಗೊರೆ ನೀಡಲಿದ್ದಾರಂತೆ.
ಮಂಡ್ಯ ತಾಲೂಕಿನ ಉಪ್ಪರಕನಹಳ್ಳಿಯ ಬಿಜೆಪಿ ಕಾರ್ಯಕರ್ತ ಶಿವಕುಮಾರ್ ಆರಾಧ್ಯ ಕಾಳಿಕಾಂಬ ದೇವಿಗೆ ಬಿಎಸ್ವೈ ಸಿಎಂ ಆಗುವ ತನಕ ಕಾಲಿಗೆ ಪಾದರಕ್ಷೆ ಹಾಕುವುದಿಲ್ಲ ಎಂದು ಶಪಥ ಮಾಡಿದ್ದ. ಚುನಾವಣೆ ಮುಗಿದ ಬಳಿಕ ಸಿಎಂ ಆದರು. ಆಗ ಬಹುಮತ ಸಾಬೀತುಪಡಿಸುವಲ್ಲಿ ವಿಫಲರಾದರು. ಈಗ ಯಡಿಯೂರಪ್ಪ ಮತ್ತೆ ಸಿಎಂ ಆದ ಹಿನ್ನೆಲೆ ಹರಕೆ ತೀರಿದೆ. ಆದರೆ ಕಾಲಿಗೆ ಇನ್ನೂ ಪಾದರಕ್ಷೆ ಹಾಕಿಲ್ಲ. ಮೊನ್ನೆ ಮೇಲುಕೋಟೆಗೆ ಬಂದಿದ್ದ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರು ಅಭಿಮಾನಿಗೆ ಪಾದರಕ್ಷೆ ಕೊಡಿಸುವ ಭರವಸೆ ನೀಡಿದ್ದಾರೆ. ಶೀಘ್ರವಾಗಿ ಸಿಎಂ ಉಡುಗೊರೆ ನೀಡಲಿದ್ದು, ಅಂದು ಪಾದರಕ್ಷೆ ಹಾಕಲು ಅಭಿಮಾನಿ ನಿರ್ಧಾರ ಮಾಡಿದ್ದಾರೆ.
