ಕುಷ್ಟಗಿ (ಕೊಪ್ಪಳ): ತಾಲೂಕಿನ ತಾವರಗೇರಾ ಹೋಬಳಿ ವ್ಯಾಪ್ತಿಯಲ್ಲಿ ಕನ್ನಾಳ ಸೀಮಾ ಮೀಸಲು ಅರಣ್ಯ ಪ್ರದೇಶದಲ್ಲಿ ಎರಡು ಕರಡಿಗಳು ಪ್ರತ್ಯಕ್ಷವಾಗಿದ್ದು, ಜನರಲ್ಲಿ ಆತಂಕ ಮೂಡಿಸಿವೆ. ಸದ್ಯ ಈ ವಿಡಿಯೋ ವೈರಲ್ ಆಗಿದೆ.
ಕಳೆದ ರಾತ್ರಿ ಸಂಗನಾಳ ಗ್ರಾಪಂ ಬಿಲ್ ಕಲೆಕ್ಟರ್ ಮೌಲಾಸಾಬ್ ಅವರು ತಾವರಗೇರಾದಿಂದ ಸ್ವಗ್ರಾಮ ಸಂಗನಾಳ ಗ್ರಾಮಕ್ಕೆ ಕಾರಿನಲ್ಲಿ ಹೋಗುವಾಗ ಈ ಜೋಡಿ ಕರಡಿ ಪ್ರತ್ಯಕ್ಷವಾಗಿದೆ. ಕಾರಿನ ಹೆಡ್ಲೈಟ್ ಬೆಳಕು ಕಂಡು ಓಡುತ್ತಿರುವ ಕರಡಿಗಳನ್ನು ಮೊಬೈಲ್ನಲ್ಲಿ ಸೆರೆ ಹಿಡಿಯಲಾಗಿದೆ.
ಕರಡಿಗಳು ಕಾಣಿಸಿಕೊಂಡ ಪರಿಣಾಮ ಈ ಭಾಗದ ರೈತರು ತಮ್ಮ ಜಮೀನುಗಳಿಗೆ ಹೋಗಲು ಹೆದರುತ್ತಿದ್ದಾರೆ. ಈ ಕುರಿತು ಬಿಲ್ ಕಲೆಕ್ಟರ್ ಮೌಲಾಸಾಬ್ ಪ್ರತಿಕ್ರಿಯಿಸಿ, ಈ ಭಾಗದಲ್ಲಿ ಕರಡಿಗಳ ಓಡಾಟದ ಬಗ್ಗೆ ಹೇಳುತ್ತಿದ್ದರೂ ಖಚಿತವಾಗಿರಲಿಲ್ಲ. ನಾನೇ ನೋಡಿ ಖಚಿತಪಡಿಸಿಕೊಂಡೆ ಎಂದರು.
ಅರಣ್ಯಾಧಿಕಾರಿ ರಿಯಾಜ್ ಗಣಿ ಹಾಗೂ ವನ ಪಾಲಕ ಶಂಕ್ರಗೌಡ ಅವರು ಈಟಿವಿ ಭಾರತದೊಂದಿಗೆ ಮಾತನಾಡಿ, ಈ ಭಾಗದಲ್ಲಿ ಕರಡಿಗಳಿರುವುದು ಮಾಹಿತಿ ಇತ್ತು. ಆದರೆ, ಖಚಿತವಾಗಿರಲಿಲ್ಲ. ವಿಡಿಯೋ ಗಮನಿಸಿದ್ದೇವೆ.
ಈ ಹಿನ್ನೆಲೆ ಮೇಲಾಧಿಕಾರಿಗಳೊಂದಿಗೆ ಚರ್ಚಿಸಿ, ಅವುಗಳ ಹಿಡಿಯಲು ಚರ್ಚಿಸುತ್ತೇನೆ. ಗ್ರಾಮಸ್ಥರು ರಾತ್ರಿ ವೇಳೆ ಸಂಚರಿಸದಂತೆ ಮತ್ತು ವನ್ಯಜೀವಿ ಕರಡಿಗಳು ಕಂಡು ಬಂದರೆ ಅರಣ್ಯ ಇಲಾಖೆಗೆ ಮಾಹಿತಿ ನೀಡಬೇಕು ಎಂದು ಕೋರಿದರು.
