ಕುಷ್ಟಗಿ (ಕೊಪ್ಪಳ): ಲಾಕ್ಡೌನ್ ವೇಳೆ ಸಂಕಷ್ಟಕ್ಕೀಡಾಗಿದ್ದ ಆಫ್ಸೆಟ್ ಪ್ರಿಂಟಿಂಗ್ ಪ್ರೆಸ್ ಉದ್ಯಮ ಗ್ರಾಮ ಪಂಚಾಯಿತಿ ಚುನಾವಣೆಯಿಂದ ಚೇತರಿಸಿಕೊಂಡಿದೆ.
ಕಳೆದ ಮಾರ್ಚ್ ತಿಂಗಳ ಬಳಿಕ ಕೊರೊನಾ ವೈರಸ್ನಿಂದ ಸ್ಥಗಿತಗೊಂಡಿದ್ದ ಆಫ್ಸೆಟ್ ಪ್ರಿಂಟಿಂಗ್ ಪ್ರೆಸ್ ಉದ್ಯಮಗಳು ಅನ್ಲಾಕ್ನಿಂದ ಕೊಂಚ ಸುಧಾರಣೆ ಕಂಡಿದ್ದು, ಇದೀಗ ಗ್ರಾಮ ಪಂಚಾಯಿತಿ ಎಲೆಕ್ಷನ್ನಿಂದ ಮತ್ತೆ ಹುಮ್ಮಸ್ಸು ಪಡೆದುಕೊಂಡಿವೆ.
ಕೋವಿಡ್ ಮಾರ್ಗಸೂಚಿ ನಿಬಂಧನೆಗಳ ಹಿನ್ನೆಲೆಯಲ್ಲಿ ಮದುವೆ ಸಮಾರಂಭಗಳು, ಇತರೆ ಕಾರ್ಯಕ್ರಮಗಳು ಸ್ಥಗಿತಗೊಂಡಿದ್ದವು. ಆದರೆ ಅನ್ಲಾಕ್ ಬಳಿಕ ಆಮಂತ್ರಣ ಪತ್ರಗಳನ್ನು ತಯಾರಿ ಮಾಡುವುದರಿಂದ ತಕ್ಕಮಟ್ಟಿನ ಕೆಲಸ ಪ್ರಾರಂಭವಾಗಿದೆ. ಇದೀಗ ಗ್ರಾಮ ಪಂಚಾಯಿತಿ ಚುನಾವಣೆ ಬಳಿಕ ಪ್ರಿಂಟಿಂಗ್ ಕೆಲಸ ಬಿಡುವಿಲ್ಲದ ನಡೆಯುತ್ತಿದೆ.
ಯಲಬುರ್ಗಾ ತಾಲೂಕಿನ ಬಹುತೇಕ ಗ್ರಾಮ ಪಂಚಾಯಿತಿಗಳ ಚುನಾವಣಾ ಉಮೇದುವಾರರು ಕುಷ್ಟಗಿ ಪ್ರಿಂಟಿಂಗ್ ಪ್ರೆಸ್ಗಳಲ್ಲಿ ಮಾದರಿ ಮತ ಪತ್ರ ಮುದ್ರಿಸಿಕೊಳ್ಳಲು ಮುಂದಾಗಿದ್ದಾರೆ. ಇಲ್ಲಿನ ಪ್ರಿಂಟಿಂಗ್ ಪ್ರೆಸ್ಗಳ ಕೆಲಸಗಾರರು ಹಗಲು ರಾತ್ರಿ ಎನ್ನದೇ ಕೆಲಸದಲ್ಲಿ ನಿರತರಾಗಿದ್ದರು.
ಇಲ್ಲಿನ ಚಿರಂಜೀವಿ ಪ್ರಿಂಟಿಂಗ್ ಪ್ರೆಸ್ ಮಾಲೀಕ ನಾಗರಾಜ್ ಹಿರೇಮಠ ಈ ಬಗ್ಗೆ ಮಾತನಾಡಿ, "ಗ್ರಾಮ ಪಂಚಾಯಿತಿ ಚುನಾವಣೆ ಹಿನ್ನೆಲೆಯಲ್ಲಿ ಹೆಚ್ಚು ಕೆಲಸ ಸಿಗುತ್ತಿದೆ. ಗ್ರಾ. ಪಂ. ಚುನಾವಣೆ ಜೊತೆಯಲ್ಲಿ ಮದುವೆ ಕಾರ್ಯಕ್ರಮಗಳು ಶುರುವಾಗಿದ್ದು, ಬಿಡುವಿಲ್ಲದ ಕೆಲಸ ಸಿಕ್ಕಿದೆ" ಎನ್ನುತ್ತಾರೆ.
ಕುಷ್ಟಗಿಯಲ್ಲಿ ಡಿ.27ರಂದು ಎರಡನೇ ಹಂತದ ಚುನಾವಣೆ ನಡೆಯಲಿದ್ದು, ಅಭ್ಯರ್ಥಿಗಳು ಮನೆ ಮನೆಗೆ ತೆರಳಿ ಮತಯಾಚನೆ ಮಾಡುತ್ತಿದ್ದಾರೆ.
