ಪಾಟೀಲ ಪುಟ್ಟಪ್ಪ ನಿಧನ: ವಿವಿಧ ಸಂಘಟನೆಗಳಿಂದ ಶ್ರದ್ಧಾಂಜಲಿ

ಬಳ್ಳಾರಿ ಕನ್ನಡ ಸಾಹಿತ್ಯ ಪರಿಷತ್ ಹಾಗೂ ಗಂಗಾವತಿ ಹಿರಿಯ ಪತ್ರಕರ್ತರ ಸಂಘದಿಂದ ಸಾಹಿತಿ ನಾಡೋಜ ಪ್ರಶಸ್ತಿ ಪುರಸ್ಕೃತ ಪಾಟೀಲ ಪುಟ್ಟಪ್ಪ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.

ಬಳ್ಳಾರಿ: ನಗರದ ಕನ್ನಡ ಭವನದಲ್ಲಿ ಕನ್ನಡ ಸಾಹಿತ್ಯ ಪರಿಷತ್​ ಹಾಗೂ ಜಿಲ್ಲಾ ಘಟಕದಿಂದ ಪಾಟೀಲ ಪುಟ್ಟಪ್ಪ ಅವರ ನುಡಿ ನಮನ ಕಾರ್ಯಕ್ರಮ ನಡೆಯಿತು.

ಸಮಾರಂಭದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ನಿರ್ದೇಶಕ ಸಿದ್ದಲಿಂಗಯ್ಯ ಮಾತನಾಡಿ, ನಾಲ್ಕು ವರ್ಷಗಳ ಕಾಲ ಪಾಟೀಲ ಪುಟ್ಟಪ್ಪ ಅವರೊಂದಿಗೆ ಬೆಳೆದವನು ನಾನು. ಕನ್ನಡಕ್ಕಾಗಿ ಅವರು ಮಾಡಿರುವೆ ಸೇವೆ ಅನನ್ಯ. ಅವರ ಅಗಲಿಕೆ ಬಹಳ ನೋವನ್ನು ಉಂಟು ಮಾಡಿದೆ ಎಂದರು. ಉಪನ್ಯಾಸಕ ಡಾ.ಬಸಪ್ಪ ಮಾತನಾಡಿ, ಭಾಷಾ ವಿಜ್ಞಾನ ರೀತಿಯಲ್ಲಿ ಉಪಸ್ಥಿತಿ ಎನ್ನುವ ಪದಕ್ಕೆ ಪರ್ಯಾಯವಾಗಿ ಶೌಚಾಲಯದಲ್ಲಿ‌ ಕುಳಿತುಕೊಳ್ಳುವುದು ಎನ್ನುವ ಅರ್ಥವನ್ನು ನೀಡುತ್ತದೆ ಎಂಬ ಅಂಶವನ್ನು ಪುಟ್ಟಪ್ಪ ಅರಿತಿದ್ದರು. ಇದು ಭಾಷೆಯ ಮೇಲೆ ಅವರು ಹಿಡಿತ ಸಾಧಿಸಿದವರಾಗಿದ್ದರು ಎಂಬುದಕ್ಕೆ ಸಾಕ್ಷಿ ಎಂದರು.

ಬಳ್ಳಾರಿ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್​ ಅಧ್ಯಕ್ಷ ಸಿದ್ದರಾಮ ಕಲ್ಮಠ್ ಮಾತನಾಡಿ ಹೆಸರು ಪುಟ್ಟದಾಗಿದೆ. ಆದ್ರೆ ಅವರ ಕಾರ್ಯ ಬಹಳ ದೊಡ್ಡದು. ಕನ್ನಡ ನಾಡು ನುಡಿ, ಭಾಷೆಗೆ ಹೆಚ್ಚಿನ ಆದ್ಯತೆ ನೀಡಿ, ಕನ್ನಡಿಗರ ಏಳಿಗೆಗಾಗಿ ಶ್ರಮಿಸಿದ ಜೀವಿ ಪಾಪು ಎಂದರು. ಇನ್ನು ಮೌನಾಚರಣೆ ಸಮಯದಲ್ಲಿ ವಿದ್ಯಾರ್ಥಿಯೊಬ್ಬ ಕೊರೊನಾ ವೈರಸ್ ಬಗ್ಗೆ ಜಾಗೃತರಾಗಿ ಎನ್ನುವ ಸಂದೇಶ ಸಾರಿದರು.

ಗಂಗಾವತಿ: ಕಾರ್ಯನಿರತ ಪತ್ರಕರ್ತರ ಸಂಘದಿಂದ ಪಾಟೀಲ್ ಪುಟಪ್ಪ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು. ಸಂಘಟನೆಯ ಗಂಗಾವತಿ ತಾಲೂಕು ಘಟಕದ ಅಧ್ಯಕ್ಷ ವಿಶ್ವನಾಥ ಬೆಳಗಲ್ ಮಠ ಅವರ ನೇತೃತ್ವದಲ್ಲಿ ಸಭೆ ಸೇರಿದ್ದ ಪತ್ರಕರ್ತರು, ಒಂದು ನಿಮಿಷದ ಮೌನಾಚರಣೆ ಆಚರಿಸಿದರು.