ಕೊಪ್ಪಳ: ಗಂಗಾವತಿ ತಾಲೂಕಿನ ಐತಿಹಾಸಿಕ ಅಂಜನಾದ್ರಿ ಬೆಟ್ಟಕ್ಕೆ ಭೇಟಿ ಕೊಟ್ಟ ಗಂಗಾವತಿಯ ಶಾಸಕ ಪರಣ್ಣ ಮುನವಳ್ಳಿ ಹಾಗೂ ಬಿಜೆಪಿ ಪಕ್ಷದ ಕಾರ್ಯಕರ್ತರು, ನೂರಾರು ಕೋತಿಗಳಿಗೆ ಆಹಾರ ನೀಡುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ.
ಹಣ್ಣು-ಹಂಪಲಗಳೊಂದಿಗೆ ತೆರಳಿದ್ದ ಶಾಸಕ ಮುನವಳ್ಳಿ, ಕೋತಿಗಳಿಗೆ ಆಹಾರ ನೀಡಿದರು. ಆರಂಭದಲ್ಲಿ ಒಂದೆರಡು ಕೋತಿಗಳು ಆಹಾರಕ್ಕಾಗಿ ಆಗಮಿಸಿದವು. ಆ ನಂತರ ಕೋತಿಗಳು ಹಿಂಡು ಹಿಂಡಾಗಿ ಬಂದು ಆಹಾರ ಸೇವಿಸಿದವು.
ಕಳೆದ ಎರಡು ವಾರದಿಂದ ಲಾಕ್ಡೌನ್ ಆದ ಪರಿಣಾಮ ದೇಗುಲಕ್ಕೆ ಬರುತ್ತಿದ್ದ ಭಕ್ತರ ಸಂಖ್ಯೆ ಸ್ಥಗಿತವಾಗಿದೆ. ಹೀಗಾಗಿ ಭಕ್ತರು ನೀಡುತ್ತಿದ್ದ ಆಹಾರದ ಮೇಲೆ ಅವಲಂಬಿತವಾಗಿದ್ದ ವಾನರ ಸೇನೆ ಇದೀಗ ಆಹಾರವಿಲ್ಲದೇ ಕಂಗಾಲಾಗಿದೆ.
