ಕುಷ್ಟಗಿ (ಕೊಪ್ಪಳ): ತಾಲೂಕಿನ ಹನುಮಸಾಗರ ಕರ್ನಾಟಕ ಗ್ರಾಮೀಣ ಬ್ಯಾಂಕ್, ದಾಳಿಂಬೆ ಬೆಳೆಗಾಗಿ ಸಾಲ ಮಾಡಿದ್ದ ರೈತರಿಗೆ ನೋಟಿಸ್ ನೀಡಿ ಕಿರುಕುಳ ನೀಡುತ್ತಿದ್ದಾರೆ ಎಂದು ದಾಳಿಂಬೆ ಹೋರಾಟ ಸಮಿತಿ ಅಧ್ಯಕ್ಷ ಅಬ್ದುಲ್ ನಯೀಮ್ ದೂರಿದ್ದಾರೆ.
ಕುಷ್ಟಗಿ ತಾಲೂಕಿನ ಕುಂಬಳಾವತಿ ಗ್ರಾಮದ ರೈತ ಫಕೀರ ಸಿಂಗ್ ರಜಪೂತ ಹಾಗೂ ಮಂಜುನಾಥ ಸಿಂಗ್ ರಜಪೂತ ಸಹೋದರರಿಬ್ಬರು ಹನುಮಸಾಗರ ಪ್ರಗತಿ ಗ್ರಾಮೀಣ ಬ್ಯಾಂಕಿನಲ್ಲಿ 2007ರ ಸೆಪ್ಟಂಬರ್ 11ರಂದು 4,40,000 ರೂ. ಸಾಲ ಮಾಡಿದ್ದರು. ಆದರೆ, ಹವಾಮಾನ ವೈಪರಿತ್ಯ ಹಾಗೂ ದುಂಡಾಣು ಅಂಗಮಾರಿ ರೋಗದಿಂದಾಗಿ ದಾಳಿಂಬೆ ಬೆಳೆ ಸಂಪೂರ್ಣ ನಾಶವಾಗಿತ್ತು. ಇದರಿಂದ ರೈತರಿಗೆ ಸಾಲ ತೀರಿಸಲು ಸಾಧ್ಯವಾಗಿರಲ್ಲಿಲ್ಲ. ಈ ಸಾಲದ ಅಸಲು, ಬಡ್ಡಿ ಸೇರಿ 2020ರ ಸೆಪ್ಟಂಬರ್ಗೆ 20,75,621 ರೂ. ಆಗಿದೆ.
ಈಗಾಗಲೇ ಸಾಲದ ಹೊರೆಯಿಂದ ತತ್ತರಿಸಿರುವ ರೈತರಿಗೆ ಬ್ಯಾಂಕಿನವರು ಫೋನ್ ಹಾಗೂ ಪದೇ-ಪದೇ ನೋಟಿಸ್ ನೀಡಿ ಕಿರುಕುಳಕ್ಕೆ ನೀಡುತ್ತಿದ್ದಾರೆ. ಜೊತೆಗೆ ಇವರ ಸಾಲಕ್ಕೆ ಜಾಮೀನು ನೀಡಿದ ದ್ಯಾಮಪ್ಪ ಗಾಣದಾಳ ಎಂಬ ರೈತನಿಗೂ ಕಿರುಕುಳ ನೀಡಿದ್ದಾರೆಂದು ಆರೋಪಿಸಿದ್ದಾರೆ.
ಹೆಚ್.ಡಿ.ಕುಮಾರಸ್ವಾಮಿ ಸಿಎಂ ಆಗಿದ್ದಾಗ ದಾಳಿಂಬೆ ಸಾಲದ ಪರಿಹಾರವಾಗಿ 150 ಕೋಟಿ ರೂ. ಮೀಸಲಿಟ್ಟಿದ್ದರು. ಈ ಮೊತ್ತವನ್ನು ಸಾಲದ ಕಿರುಕುಳ ಎದುರಿಸುವ ರೈತರ ಖಾತೆಗೆ ವರ್ಗಾಯಿಸಿ ರೈತರ ಜೀವ ಉಳಿಸಲು ಈಗಿನ ಸಿಎಂ ಯಡಿಯೂರಪ್ಪ ಪ್ರಯತ್ನಿಸಬೇಕು ಎಂದು ಅಬ್ದುಲ್ ನಯೀಮ್ ಒತ್ತಾಯಿಸಿದ್ದಾರೆ.
