ಲಾಭ ದೂರದ ಮಾತು, ಹಾನಿಯೇ ಹೆಚ್ಚು: ಗಂಗಾವತಿ, ಕಾರಟಗಿ ರೈತರ ಅಳಲು

ಸರ್ಕಾರ ಘೋಷಣೆ ಮಾಡಿರುವ ಕನಿಷ್ಠ ಬೆಂಬಲ ಬೆಲೆಯಲ್ಲಿ ಲಾಭ ನಿರೀಕ್ಷಿಸಲು ಸಾಧ್ಯವಿಲ್ಲ ಎಂದು ಗಂಗಾವತಿ ಹಾಗೂ ಕಾರಟಗಿ ಅಸಮಾಧಾನ ಹೊರ ಹಾಕಿದ್ದಾರೆ.

ಗಂಗಾವತಿ: ರೈತರು ಬೆಳೆದ ಬೆಳೆಗೆ ಮಾರುಕಟ್ಟೆಯಲ್ಲಿ ಸೂಕ್ತ ಬೆಲೆ ಸಿಗಲೆಂಬ ಕಾರಣಕ್ಕಾಗಿ ಸರ್ಕಾರ ಇದೀಗ ಕನಿಷ್ಠ ಬೆಂಬಲ ಬೆಲೆ (ಎಂಎಸ್ಪಿ) ಯೋಜನೆಯಡಿ ಗಂಗಾವತಿ ಹಾಗೂ ಕಾರಟಗಿ ತಾಲೂಕಿನಲ್ಲಿ ಭತ್ತ ಖರೀದಿ ಕೇಂದ್ರವನ್ನು ಆರಂಭಿಸಿದೆ. ಆದರೆ ಸರ್ಕಾರ ತೆರೆದಿರುವ ಈ ಭತ್ತ ಖರೀದಿ ಕೇಂದ್ರದಿಂದ ಯಾವುದೇ ಲಾಭ ರೈತರಿಗೆ ಆಗುತ್ತಿಲ್ಲ. ಬದಲಿಗೆ ಮಾರುಕಟ್ಟೆಯಲ್ಲಿ ಧಾರಣೆ ಕುಸಿತಕ್ಕೆ ಕಾರಣವಾಗುತ್ತಿದೆ ಎಂದು ರೈತರು ಆಕ್ಷೇಪಿಸಿದ್ದಾರೆ.

ಸರ್ಕಾರ ಘೋಷಣೆ ಮಾಡಿರುವ ಬೆಲೆಯಲ್ಲಿ ಅಂದರೆ, ಸಾಮಾನ್ಯ ಭತ್ತ ಕ್ವಿಂಟಲ್​ಗೆ ರೂ.1800 ಹಾಗೂ ಗ್ರೇಡ್-ಎಗೆ ರೂ. 1880 ರೈತರಿಗೆ ಆಗುವ ಹಾನಿಯನ್ನು ಸರಿದೂಗಿಸಲಾರದು. ಕನಿಷ್ಠ 2,200 ರಿಂದ 2,300 ರೂಪಾಯಿ ಇದ್ದರೆ ಮಾತ್ರ ರೈತರು ಆರ್ಥಿಕ ಹಾನಿಯಿಂದ ಪಾರಾಗಬಹುದು ಎಂಬುವುದು ರೈತರ ಲೆಕ್ಕಾಚಾರ.

ಇದನ್ನೂ ಓದಿ: ಬಿಲ್​ಕಟ್ಟಿ, ಇಲ್ಲದಿದ್ರೆ ಮೃತ ದೇಹ ಕೊಡೋಲ್ಲ: ಖಾಸಗಿ ಆಸ್ಪತ್ರೆ ವಿರುದ್ಧ ಪ್ರತಿಭಟನೆ

ಕಳೆದ ವರ್ಷ 75 ಕೆಜಿ ಭತ್ತಕ್ಕೆ ಮಾರುಕಟ್ಟೆಯಲ್ಲಿ 1500-1600 ಇದ್ದು, ಕಳೆದ ಬಾರಿಯೇ ಹಾನಿಯಾಗಿತ್ತು. ಈ ಬಾರಿಯೂ ತಾವು ಬೆಳೆದ ಬೆಳೆಗೆ ಲಾಭವಿರಲಿ, ಹಾನಿಯೇ ಹೆಚ್ಚಾಗಲಿದೆ. ಹೂಡಿದ ಬಂಡವಾಳವೂ ಸಿಗುತ್ತಿಲ್ಲ ಎಂದು ರೈತರು ಅಳಲು ತೋಡಿಕೊಂಡರು.