ಗಂಗಾವತಿ: ಕಾರಟಗಿ ತಾಲೂಕಿನ ಕಕ್ಕರಗೋಳದಲ್ಲಿ ನಡೆದ ದಲಿತ ಹಾಗೂ ಪತ್ರಿಕೋದ್ಯಮ ವಿದ್ಯಾರ್ಥಿ ರಾಘವೇಂದ್ರ ಚಲುವಾದಿ ಕೊಲೆ ಪ್ರಕರಣದಲ್ಲಿ ಸ್ವತಃ ದಲಿತ ಶಾಸಕ ಬಸವರಾಜ ದಢೇಸಗೂರು ಅಡ್ಡಿಯಾಗಿದ್ದಾರೆ ಎಂದು ಮೃತನ ಚಿಕ್ಕಪ್ಪ ಚಲುವಾದಿ ಮರಿಯಪ್ಪ ಬರಗೂರು ಗಂಭೀರ ಆರೋಪ ಮಾಡಿದರು.
ಈ ಬಗ್ಗೆ ಮಾತನಾಡಿ, ಐದು ತಿಂಗಳ ಹಿಂದೆ ಗ್ರಾಮದಲ್ಲಿ ನಡೆದ ಯುವಕನ ಕೊಲೆ ಪ್ರಕರಣದಲ್ಲಿ ಪ್ರಮುಖ ಆರೋಪಿಗಳು ಹಾಗೂ ಕಾಂಗ್ರೆಸ್ ಪಕ್ಷದ ಪ್ರಭಾವಿ ನಾಯಕರು ಈಗಲೂ ಹೊರಗಿದ್ದಾರೆ ಎಂದರು.
ಚಲುವಾದಿ ಮರಿಯಪ್ಪ
ರಾಜಕೀಯ ಒತ್ತಡದಿಂದ ಅವರ ಬಂಧನಕ್ಕೆ ಪೊಲೀಸರೂ ಹಿಂದೇಟು ಹಾಕುತ್ತಿದ್ದಾರೆ. ಯಾವೊಬ್ಬ ಅಧಿಕಾರಿಯೂ ಸಹಾಯ ಹಸ್ತ ಚಾಚುತ್ತಿಲ್ಲ. ಹೀಗಾಗಿ ಇಂದಿಗೂ ನ್ಯಾಯವೇ ಸಿಕ್ಕಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.
ಈ ಬಗ್ಗೆ ಶಾಸಕರ ಗಮನಕ್ಕೆ ತಂದರೆ ಇದೆಲ್ಲಾ ದೊಡ್ಡ ವಿಷಯವಲ್ಲ. ಊರಿನ ವಿಚಾರ ಅಲ್ಲೆ ಕುಳಿತು ಪರಿಹರಿಸಿಕೊಳ್ಳಿ ಎಂದು ಉಢಾಪೆ ಉತ್ತರ ಕೊಡುತ್ತಿದ್ದಾರೆ ಎಂದರು.
