ಕೊಪ್ಪಳ: ರಸಗೊಬ್ಬರ ಅಂಗಡಿಯಲ್ಲಿನ ಬಾಕಿ ಹಣ ತೀರಿಸಲಾಗದೇ ಅದೇ ಅಂಗಡಿಯಲ್ಲಿ ರೈತರೊಬ್ಬರು ಕ್ರಿಮಿನಾಶಕ ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಕೊಪ್ಪಳ ನಗರದ ಗಂಜ್ನಲ್ಲಿರುವ ಅಂಗಡಿಯಲ್ಲಿ ಹನಕಟಿ ಗ್ರಾಮದ ರೈತ ರವಿ ಲಕ್ಕುಂಡಿ(38) ಆತ್ಮಹತ್ಯೆ ಮಾಡಿಕೊಂಡವರು.
ಇವರು ಮೆಕ್ಕೆಜೋಳದ ಬೀಜ ಹಾಗೂ ಗೊಬ್ಬರವನ್ನು ರಸಗೊಬ್ಬರ ಅಂಗಡಿಯಲ್ಲಿ ಸಾಲವಾಗಿ ಪಡೆದುಕೊಂಡು, ಬಳಿಕ ಬೆಳೆಯಿಂದ ಬಂದ ಆದಾಯದಿಂದ ಸ್ವಲ್ಪಮಟ್ಟಿನ ಸಾಲ ತೀರಿಸಿದ್ದರಂತೆ. ಆದ್ರೆ ಇನ್ನಷ್ಟು ಬಾಕಿ ಹಣ ತೀರಿಸಬೇಕಿತ್ತಂತೆ. ಈ ಮಧ್ಯೆ ರೈತ ಮತ್ತೆ ಸಾಲ ಕೇಳಲು ಬಂದಾಗ ಅಂಗಡಿಯವರು ನೀಡಿರಲಿಲ್ಲವಂತೆ. ಇದರಿಂದ ನೊಂದ ರೈತ ಅಲ್ಲೇ ಕ್ರಿಮಿನಾಶಕ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲಾಗುತ್ತಿದೆ.
ಎರಡು ದಿನಗಳ ಹಿಂದೆ ಕ್ರಿಮಿನಾಶಕ ಸೇವಿಸಿದ್ದ ರೈತನನ್ನು ಆ ಕೂಡಲೇ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಇಂದು ಸಾವಿಗೀಡಾಗಿದ್ದಾರೆ. ಕೊಪ್ಪಳ ನಗರ ಠಾಣೆ ವ್ಯಾಪ್ತಿಯಲ್ಲಿ ಘಟನೆ ಜರುಗಿದೆ.
(ಇದನ್ನೂ ಓದಿ: ಬ್ಯಾಂಕ್ ಮುಂದೆ ರೈತನ ಶವವಿಟ್ಟು ಪ್ರತಿಭಟನೆ ಯತ್ನ: ರೈತರು - ಪೊಲೀಸರ ನಡುವೆ ವಾಗ್ವಾದ)
