ಕುಷ್ಟಗಿ(ಕೊಪ್ಪಳ): ಒಂದೆರಡು ದಿನ ಕೊರೊನಾ ಪ್ರಕರಣಗಳಿಲ್ಲ ಎಂದು ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದ ಕುಷ್ಟಗಿ ತಾಲೂಕಿನ ಜನತೆಗೆ ಕೊರೊನಾ ಮಹಾಮಾರಿ ಶಾಕ್ ನೀಡಿದೆ. ಗುರುವಾರ ಒಂದೇ ದಿನ 13 ಪ್ರಕರಣ ಪತ್ತೆಯಾಗಿ ಕುಷ್ಟಗಿ ಜನತೆಗೆ ಆತಂಕ ಮೂಡಿಸಿದೆ.
ತಾಲೂಕಿನ ಟಕ್ಕಳಕಿ, ಬಳೂಟಗಿ, ಕಂದಕೂರ, ವೀರಾಪುರ, ಅಮರಾಪುರ, ಕಿಲ್ಲಾರಹಟ್ಟಿ, ಗರ್ಜನಾಳ, ಶಾಡ್ಲಗೇರಿ, ಮಾಲಗಿತ್ತಿ, ಹನುಮಸಾಗರದಲ್ಲಿ ತಲಾ ಒಬ್ಬರಿಗೆ ಸೋಂಕು ದೃಢವಾಗಿದೆ. ಸೋಂಕು ದೃಢವಾಗುತ್ತಿದ್ದಂತೆ ಆಯಾ ಗ್ರಾಪಂ ವ್ಯಾಪ್ತಿಯಲ್ಲಿ ಸೋಂಕಿತರ ಮನೆ ಸುತ್ತಲಿನ ರಸ್ತೆ ಸೀಲ್ ಡೌನ್ ಮಾಡಲು ಕ್ರಮ ಕೈಗೊಳ್ಳಲಾಗಿದೆ.
ಹನುಮಸಾಗರ ಠಾಣೆಯ ಪೊಲೀಸ್ ಸಿಬ್ಬಂದಿಗೂ ಕೊರೊನಾ ವಕ್ಕರಿಸಿದೆ. ಈ ಪ್ರಕರಣಗಳಲ್ಲಿ 8 ಮಂದಿ ಸೋಂಕಿತರು ಬೆಂಗಳೂರಿನಿಂದ ಬಂದವರಾಗಿದ್ದಾರೆ. ಜೊತೆಗೆ ತುಮಕೂರು, ಬಳ್ಳಾರಿಯಿಂದ ತಲಾ ಒಬ್ಬೊಬ್ಬರು ಬಂದಿದ್ದಾರೆ. ಮತ್ತೊಬ್ಬರು ಸ್ಥಳೀಯ ಖಾಸಗಿ ಆಸ್ಪತ್ರೆ ಸಿಬ್ಬಂದಿಯಾಗಿದ್ದಾರೆ. ಇನ್ನೊಬ್ಬ ವ್ಯಕ್ತಿ ಅಸ್ಸಾಂನಿಂದ ಸ್ವಗ್ರಾಮಕ್ಕೆ ಬಂದಿದ್ದರು.
ಕಳೆದೆರಡು ದಿನಗಳಿಂದ ತಾಲೂಕಿನಲ್ಲಿ ಸೋನೆ ಮಳೆ ಹಿನ್ನೆಲೆಯಲ್ಲಿ ತಂಪು ವಾತವರಣವಿದ್ದು, ಸಹಜವಾಗಿ ಜನರಲ್ಲಿ ನೆಗಡಿ, ಕೆಮ್ಮು, ಜ್ವರ ಕಾಣಿಸುತ್ತಿದ್ದು ಮತ್ತಷ್ಟು ಭೀತಿ ಮೂಡಿಸಿದೆ.
