ವಿರಾಜಪೇಟೆ: ದಶಕಗಳಿಂದ ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆ ಹಾಳಾಗಿದೆ. ಇದರಿಂದ ಜನ ಸಂಚಾರಕ್ಕೆ ತೊಂದರೆಯಾಗಿದೆ. ರಸ್ತೆಯ ತುಂಬೆಲ್ಲಾ ಗುಂಡಿಗಳಿದ್ದು, ಗ್ರಾಮಸ್ಥರು ಓಡಾಟ ನಡೆಸಲು ಭಯಪಡುತ್ತಿದ್ದಾರೆ. ಈ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳ ಗಮನಕ್ಕೆ ತಂದರೂ ರಸ್ತೆ ಸರಿ ಹೋಗಿಲ್ಲ. ಇದರಿಂದ ಬೇಸತ್ತ ಗ್ರಾಮಸ್ಥರು ಪ್ರತಿಭಟನೆಗೆ ಮುಂದಾಗಿದ್ದಾರೆ.
ಇದು ದಕ್ಷಿಣ ಕೊಡಗಿನ ವಿರಾಜಪೇಟೆ ತಾಲೂಕಿನ ಬಿಟ್ಟಂಗಾಲ ಗ್ರಾಮ ಪಂಚಾಯತಿ ವ್ಯಾಪ್ತಿಯ ಪೆಗ್ಗರಿಕಾಡು ಕಾಲೋನಿಯ ರಸ್ತೆಯ ಅವ್ಯವಸ್ಥೆ. ಪೆಗ್ಗರಿಕಾಡು ಕಾಲೋನಿಯಲ್ಲಿ ಶೇ 90 ರಷ್ಟು ಜನ ದಿನಕೂಲಿ ಅವಲಂಬಿತ ಕುಟುಂಬಗಳಿವೆ. ಇಲ್ಲಿ ಸುಮಾರು 40-50 ರಿಂದ ಮನೆಗಳಿದ್ದು 150 ಮತದಾರರಿದ್ದಾರೆ.
ರಸ್ತೆ ಸರಿಮಾಡುವ ಬಗ್ಗೆ ಸಂಸದರು, ಶಾಸಕರು ಭೇಟಿ ನೀಡಿ ಭರವಸೆ ನೀಡಿದ್ದಾರೆಯೇ ಹೊರತು ಮತ್ತೇನೂ ಮಾಡಿಲ್ಲ ಅನ್ನೋದು ಗ್ರಾಮಸ್ಥರ ಆರೋಪ.
ಬಿಟ್ಟಂಗಾಲ ಮುಖ್ಯರಸ್ತೆಯಿಂದ ಪೆಗ್ಗರಿಕಾಡು ಕಾಲೋನಿವರೆಗಿನ ರಸ್ತೆ ಮರು ಡಾಂಬರಿಕಾರಣಗೊಳ್ಳದೆ ಹಲವು ವರ್ಷಗಳಾಗಿದೆ. ಹೀಗಾಗಿ ಇಲ್ಲಿನ ಜನರು ಅಗತ್ಯ ಕೆಲಸಗಳಿಗಾಗಿ ಪಟ್ಟಣಕ್ಕೆ ತೆರಳಲು ಸಾಧ್ಯವಾಗುತ್ತಿಲ್ಲ. ಈ ಕೂಡಲೇ ಸಂಬಂಧಿಸಿದ ಇಲಾಖೆಗಳು, ಜನಪ್ರತಿನಿಧಿಗಳು ರಸ್ತೆ ದುರಸ್ತಿಗೊಳಿಸಬೇಕು ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
