ಹಾವೇರಿಯಲ್ಲಿ ರಾಜ್ಯಮಟ್ಟದ ಹೋರಿ ಬೆದರಿಸುವ ಸ್ಪರ್ಧೆ

ಹಾವೇರಿಯಲ್ಲಿ ರಾಜ್ಯಮಟ್ಟದ ಹೋರಿ ಬೆದರಿಸುವ ಸ್ಪರ್ಧೆ ಏರ್ಪಡಿಸಲಾಗಿತ್ತು. ಉತ್ತರ ಕರ್ನಾಟಕ ಸೇರಿದಂತೆ ವಿವಿಧ ಜಿಲ್ಲೆಯ ಹೋರಿಗಳು ಗಮನ ಸೆಳೆದವು.

ಹಾವೇರಿ: ಜಿಲ್ಲೆಯ ಹೊರಭಾಗದಲ್ಲಿರುವ ಅಜ್ಜಯ್ಯನ ದೇವಸ್ಥಾನದ ಮುಂಭಾಗದಲ್ಲಿಂದು ರಾಜ್ಯಮಟ್ಟದ ಹೋರಿ ಬೆದರಿಸುವ ಸ್ಪರ್ಧೆ ನಡೆಯಿತು. ಸ್ಪರ್ಧೆಗೆ ಉತ್ತರ ಕರ್ನಾಟಕದ ವಿವಿಧ ಜಿಲ್ಲೆಗಳಿಂದ ನೂರಾರು ಹೋರಿಗಳನ್ನು ಮಾಲೀಕರು ಕರೆತಂದಿದ್ದರು. ಸುಮಾರು 500 ಮೀಟರ್ ಉದ್ದದ ಆಖಾಡದಲ್ಲಿ ಎತ್ತುಗಳನ್ನು ಓಡಿಸಲಾಯಿತು.

ಮೂರು ವಿಭಾಗಗಳಲ್ಲಿ ಸ್ಪರ್ಧೆ ನಡೆಯಿತು. ಬಲೋನ್, ಗಗ್ಗರಿ ಮತ್ತು ಸಾದಾ ವಿಭಾಗಗಳಲ್ಲಿ ಹೋರಿಗಳ ಸ್ಪರ್ಧೆ ಏರ್ಪಡಿಸಲಾಗಿತ್ತು. ಪೀಪಿ ವಿಭಾಗದಲ್ಲಿ ಎತ್ತುಗಳಿಗೆ ಆಳೆತ್ತರದ ಬಲೋನ್ ಕಟ್ಟಲಾಗಿತ್ತು. ಸಾದಾದಲ್ಲಿ ಹೋರಿಗಳಿಗೆ ಮುಖಚಟ್ಟು, ಕೊಬ್ಬರಿ ಹೋರಿಗೆ ಸಾಮಾನ್ಯ ಅಲಂಕಾರ ಮಾಡಲಾಗಿತ್ತು. ಗಗ್ಗರಿ ವಿಭಾಗದಲ್ಲಿ ಹೋರಿಗಳ ಮೈಮೇಲೆ ಒಣ ಕೊಬ್ಬರಿಗಳಿಂದ ಅಲಂಕರಿಸಲಾಗಿತ್ತು. ಹೋರಿಗಳಿಗೆ ಬಲೋನ್, ಹೂವುಗಳ ಕೊಂಬಣಸು, ಜೋಲಾ, ಕಾಲ್ಗೆಜ್ಜೆ, ಕೊರಳುಗಂಟೆ ಕೊಬ್ಬರಿ ಗಿಟುಕ ಮತ್ತು ಮುಖಚಟ್ಟುಗಳಿಂದ ವಿಶೇಷ ಅಲಂಕರ ಮಾಡಲಾಗಿತ್ತು. ಕೆಲವು ಹೋರಿಗಳ ಕೋಡುಗಳಿಗೆ ಬಣ್ಣ ಬಳಿಯಲಾಗಿತ್ತು. ಹೋರಿಗಳ ಹೆಸರಿರುವ ನಾಮಫಲಕಗಳು ವಿಶೇಷವಾಗಿ ಗಮನ ಸೆಳೆದವು.

ಸೋಲಿಲ್ಲದ ಸರದಾರ, ಅನಾಹುತ, ಮೈಲಾರಿ, ಮದಗಜ, ಕಿಲಾಡಿ ಆಂಬ್ಯುಲೆನ್ಸ್ ಸೇರಿದಂತೆ ವಿವಿಧ ಹೆಸರುಗಳ ಹೋರಿಗಳು ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು. ಮುಂಜಾನೆಯಿಂದ ಆರಂಭವಾದ ಈ ಸ್ಪರ್ಧೆ ಸಂಜೆಯವರೆಗೂ ಮುಂದುವರೆಯಿತು. ವಿಜೇತ ಎತ್ತುಗಳಿಗೆ ಬೈಕ್, ಬಂಗಾರ, ಫ್ರಿಡ್ಜ್, ಟಿಜೋರಿ ಸೇರಿದಂತೆ ವಿವಿಧ ವಸ್ತುಗಳನ್ನು ಬಹುಮಾನವಾಗಿ ನೀಡಲಾಗಿದೆ. ಸ್ಫರ್ಧೆಗಾಗಿ ಮಾಲೀಕರು ಎತ್ತುಗಳನ್ನು ಕಟುಮಸ್ತಾಗಿ ಬೆಳೆಸಿ ತಂದಿದ್ದರು. ಈ ಹೋರಿಗಳಿಗೆ ದಿನನಿತ್ಯ ಹುರುಳಿಕಾಳು, ಮೆಕ್ಕೆಜೋಳದ ಹಿಟ್ಟು ತಿನ್ನಿಸಿ ಸ್ಪರ್ಧೆಗೆ ತಯಾರು ಮಾಡಲಾಗುತ್ತದೆ. ಅಲ್ಲದೇ ಏಳೆಂಟು ಕಿ.ಮಿ ಓಡಿಸಲಾಗುತ್ತದೆ. ಕೆರೆ, ಹೊಂಡಗಳಲ್ಲಿ ಈಜು ಹೊಡೆಸಬೇಕು. ಹೋರಿಗೆ ಆಯಾಸವಾಗದಂತೆ ಓಡಿಸಿದ ನಂತರ ಸ್ಪರ್ಧೆಗೆ ತರಲಾಗುತ್ತದೆ. ಸ್ಪರ್ಧೆಯ ವಿಜೇತ ಎತ್ತುಗಳನ್ನು ಗ್ರಾಮಕ್ಕೆ ಕರೆದೊಯ್ಯುತ್ತಿದ್ದಂತೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಮಾಡಲಾಗುತ್ತದೆ.

ಉತ್ತರ ಕರ್ನಾಟಕದ ಜಾನಪದ ಸೊಗಡಿನ ಕ್ರೀಡೆಗಳೆಂದರೆ ಅದು ಹೋರಿ ಬೆದರಿಸುವ ಸ್ಪರ್ಧೆ, ಗಾಡಾ ಓಡಿಸುವ ಸ್ಪರ್ಧೆ ಮತ್ತು ಟಗರು ಕಾಳಗ. ಈ ಮೂರು ಸ್ಪರ್ಧೆಗಳಲ್ಲಿ ಹೋರಿ ಬೆದರಿಸುವ ಸ್ಪರ್ಧೆ ಹೆಚ್ಚು ಪ್ರಸಿದ್ದಿ ಪಡೆದಿದೆ. ರೈತಾಪಿ ವರ್ಗ ಸುಗ್ಗಿ ಮುಗಿಯುತ್ತಿದ್ದಂತೆ ಈ ರೀತಿಯ ಹಬ್ಬಗಳಲ್ಲಿ ಪಾಲ್ಗೊಳ್ಳುತ್ತಾರೆ. ದೀಪಾವಳಿಯಿಂದ ಆರಂಭವಾಗುವ ಇಂಥ ಸ್ಪರ್ಧೆಗಳು ಮುಂಗಾರು ಹಂಗಾಮು ಆರಂಭವಾಗುವರೆಗೂ ಜಿಲ್ಲೆಯಲ್ಲಿ ನಡೆಯುತ್ತಲೇ ಇರುತ್ತವೆ.

ಹೋರಿ ಬೆದರಿಸುವ ಸ್ಪರ್ಧೆಗಾಗಿ ತಮಿಳುನಾಡಿನಿಂದ ಎತ್ತುಗಳನ್ನು ತಂದು ಸಾಕಲಾಗುತ್ತದೆ. ತಮಿಳುನಾಡಿನಲ್ಲಿ ನಡೆಯುವ ಜಲ್ಲಿಕಟ್ಟು ಸ್ಪರ್ಧೆಗೆ ಹಾವೇರಿ ಜಿಲ್ಲೆಯಿಂದ ಹೋರಿಗಳನ್ನು ತಗೆದುಕೊಂಡು ಹೋಗಲಾಗುತ್ತದೆ. ಈ ರೀತಿಯ ಸ್ಪರ್ಧೆಗಳಲ್ಲಿ ರೈತಾಪಿ ವರ್ಗ ಭಾಗವಹಿಸುವ ಮೂಲಕ ಮನರಂಜನೆ ಪಡೆಯುತ್ತದೆ. ಹೋರಿಗಳ ಮೈಮೇಲೆ ಹಾಕಿರುವ ಕೊಬ್ಬರಿಯನ್ನು ಪೈಲ್ವಾನರು ಹರಿಯುತ್ತಾರೆ. ಈ ರೀತಿ ಸ್ಪರ್ಧೆಯಲ್ಲಿ ಹೋರಿಯಿಂದ ಹರಿದ ಕೊಬ್ಬರಿಗೆ ಹಲವು ಔಷಧೀಯ ಗುಣಗಳಿರುತ್ತವೆ ಎನ್ನುತ್ತಾರೆ ರೈತರು.

ಇದನ್ನೂ ಓದಿ: ಶಿಕಾರಿಪುರದಲ್ಲಿ ರಾಷ್ಟ್ರಮಟ್ಟದ ಕುಸ್ತಿ ಪಂದ್ಯಾವಳಿ; ವಿವಿಧ ರಾಜ್ಯಗಳ ಸ್ಪರ್ಧಿಗಳು ಭಾಗಿ