ರಾಣೆಬೆನ್ನೂರು ಕ್ಷೇತ್ರದಲ್ಲಿ ಈ ಬಾರಿ ಯಾರಿಗೆ ಪಂಚ್‌, ಯಾರಿಗೆ ಕಜ್ಜಾಯ?

ಹಾವೇರಿ ಜಿಲ್ಲೆಯ ಪ್ರಮುಖ ವಿಧಾನಸಭಾ ಕಣವಾಗಿರುವ ರಾಣೆಬೆನ್ನೂರು ಕ್ಷೇತ್ರ ನೋಟ ಇಲ್ಲಿದೆ.

ಹಾವೇರಿ: ಜಿಲ್ಲೆಯಲ್ಲಿ ಅತಿ ಹೆಚ್ಚು ಮತದಾರರಿರುವ ವಿಧಾನಸಭಾ ಕ್ಷೇತ್ರ ರಾಣೆಬೆನ್ನೂರು. 2008ರಲ್ಲಿ ಇಲ್ಲಿ ಬಿಜೆಪಿಯ ಶಿವಣ್ಣ ಗೌಡಶಿವಣ್ಣನವರ್ ಶಾಸಕರಾಗಿದ್ದರು. 2013ರಲ್ಲಿ ಕಾಂಗ್ರೆಸ್​ನ ಕೆ.ಬಿ.ಕೋಳಿವಾಡ್ ಶಾಸಕರಾಗಿ ಅಯ್ಕೆಯಾಗಿದ್ದರು. 2018ರಲ್ಲಿ ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿಯಾಗಿ ಆರ್.ಶಂಕರ್ ಶಾಸಕರಾದರು. ಆರ್.ಶಂಕರ್ ಶಾಸಕ ಸ್ಥಾನದಿಂದ ಅನರ್ಹರಾದ ಕಾರಣ 2019ರಲ್ಲಿ ರಾಣೆಬೆನ್ನೂರಿಗೆ ಉಪಚುನಾವಣೆ ಎದುರಾಗಿತ್ತು.

ಅರುಣಕುಮಾರ್‌

ಉಪಚುನಾವಣೆಯಲ್ಲಿ ಬಿಜೆಪಿ ಅರುಣಕುಮಾರ್‌ಗೆ ಟಿಕೆಟ್ ನೀಡಿದ್ದರೆ, ಕಾಂಗ್ರೆಸ್ ಕೆ.ಬಿ.ಕೋಳಿವಾಡ್‌ರನ್ನು ಕಣಕ್ಕಿಳಿಸಿತ್ತು. ಭಾರಿ ಪೈಪೋಟಿಯಿಂದ ನಡೆದ ಉಪಚುನಾವಣೆಯಲ್ಲಿ ಅರುಣಕುಮಾರ್ ಗೆದ್ದು ಬೀಗಿದ್ದರು. ಈ ಬಾರಿಯ ಚುನಾವಣೆಯಲ್ಲಿ ಬಿಜೆಪಿಯಿಂದ ಅರುಣಕುಮಾರ್, ಕಾಂಗ್ರೆಸ್‌ನಿಂದ ಪ್ರಕಾಶ್ ಕೋಳಿವಾಡ್, ಜೆಡಿಎಸ್‌ನಿಂದ ಮಂಜುನಾಥ ಗೌಡಶಿವಣ್ಣನವರ್, ಎನ್‌ಸಿಪಿಯಿಂದ ಆರ್.ಶಂಕರ್ ಮತ್ತು ಪಕ್ಷೇತರರಾಗಿ ಸಂತೋಷ ಪಾಟೀಲ್ ಅಖಾಡದಲ್ಲಿದ್ದಾರೆ.

ಪ್ರಕಾಶ ಕೋಳಿವಾಡ್

ಕ್ಷೇತ್ರ ವಿಶ್ಲೇಷಣೆ: ರಾಣೆಬೆನ್ನೂರು ಉತ್ತರ ಕರ್ನಾಟಕದ ಹೆಬ್ಬಾಗಿಲು. ಇಲ್ಲಿಂದಲೇ ಉತ್ತರ ಕರ್ನಾಟಕ ಆರಂಭವಾಗುತ್ತೆ. ಏಷ್ಯಾ ಖಂಡದಲ್ಲಿ ಅತಿಹೆಚ್ಚು ಕಾರ್ಖಾನೆಗಳಿರುವ ತಾಲೂಕು ಕೂಡಾ ಇದೇ ರಾಣೆಬೆನ್ನೂರು. ರಾಣೆಬೆನ್ನೂರನ್ನು ಏಷ್ಯಾ ಖಂಡದ ಬೀಜೋತ್ಪಾದನೆಯ ಬಟ್ಟಲು ಎಂದೂ ಕರೆಯಲಾಗುತ್ತದೆ. ಜಿಲ್ಲೆಯಲ್ಲಿಯೇ ಅತಿ ಹೆಚ್ಚು ವಾಣಿಜ್ಯ ಕೇಂದ್ರೀಕೃತ ತಾಲೂಕು ರಾಣೆಬೆನ್ನೂರು. ಇಲ್ಲಿ ಹೆಳವನಕಟ್ಟಿ ಗಿರಿಯಮ್ಮ, ಹಾನಗಲ್ ಕುಮಾರೇಶ್ವರ ಜನಿಸಿದ್ದು ರಾಣೆಬೆನ್ನೂರಿನ ಜೋಯಿಸಿರಹರಳಹಳ್ಳಿಯಲ್ಲಿ. ಈ ತಾಲೂಕಿನಿಂದಲೇ ವೀರಶೈವ ಪಂಚಪೀಠಗಳಿಗೆ ಇಬ್ಬರು ಮಠಾಧಿಪತಿಯಾಗಿದ್ದಾರೆ. ಧಾರ್ಮಿಕ, ಆರ್ಥಿಕ ಮತ್ತು ಸಾಮಾಜಿಕವಾಗಿ ಸುಭೀಕ್ಷೆಯಲ್ಲಿರುವ ಕ್ಷೇತ್ರ ರಾಣೆಬೆನ್ನೂರು.

ಆರ್​ ಶಂಕರ್​

ರಾಣೆಬೆನ್ನೂರು ವಿಧಾನಸಭಾ ಕ್ಷೇತ್ರ:

ಕ್ಷೇತ್ರದ ಒಟ್ಟು ಮತದಾರರ ಸಂಖ್ಯೆ - 2,35,074

ಪುರುಷ ಮತದಾರರು - 1,18,714

ಮಹಿಳಾ ಮತದಾರರು - 1,16,345

ಜಾತಿವಾರು ಮತದಾರರ ವಿವರ:
ಲಿಂಗಾಯತ - 58,505
ಮುಸ್ಲಿಂ - 36,580
ಕುರುಬ - 34,939
ಪರಿಶಿಷ್ಟ ಜಾತಿ - 32,067
ಪರಿಶಿಷ್ಟ ಪಂಗಡ - 21,000
ಇತರೆ - 35,057

ಮಂಜುನಾಥ ಗೌಡಶಿವಣ್ಣನವರ್

ಕಳೆದ ನಾಲ್ಕು ಚುನಾವಣೆ..: 2008 ರ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಯಿಂದ ಸ್ಪರ್ಧಿಸಿದ್ದ ಜಿ.ಶಿವಣ್ಣ ಕಾಂಗ್ರೆಸ್ಸಿನ ಕೆ.ಬಿ.ಕೋಳಿವಾಡ್‌ ಅವರನ್ನು 2732 ಮತಗಳ ಅಂತರದಿಂದ ಸೋಲಿಸಿದ್ದರು. 2013ರ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್​ನಿಂದ ಸ್ಪರ್ಧಿಸಿದ್ದ ಕೆ.ಬಿ.ಕೋಳಿವಾಡ ಪಕ್ಷೇತರ ಅಭ್ಯರ್ಥಿಯಾಗಿದ್ದ ಆರ್.ಶಂಕರ್​ ಅವರನ್ನು 6788 ಮತಗಳ ಅಂತರದಿಂದ ಸೋಲಿಸಿದ್ದರು. 2018 ರಲ್ಲಿ ಪಕ್ಷೇತರರಾಗಿ ಸ್ಪರ್ಧಿಸಿದ್ದ ಆರ್.ಶಂಕರ್ ಕಾಂಗ್ರೆಸ್​ನ ಕೆ.ಬಿ.ಕೋಳಿವಾಡ್‌ ಅವರನ್ನು ಸೋಲಿಸಿದ್ದರು. 2019 ನಡೆದ ಉಪಚುನಾವಣೆಯಲ್ಲಿ ಬಿಜೆಪಿಯಿಂದ ಸ್ಪರ್ಧಿಸಿದ್ದ ಅರುಣಕುಮಾರ್ ಕಾಂಗ್ರೆಸ್​ನ ಕೆ.ಬಿ ಕೋಳಿವಾಡ್‌ ಅವರನ್ನು ಸೋಲಿಸಿದ್ದರು. 2023ರ ವಿಧಾನಸಭಾ ಚುನಾವಣೆಯಲ್ಲಿ ರಾಣೆಬೆನ್ನೂರು ಕ್ಷೇತ್ರದಲ್ಲಿ ಪಂಚಕೋನ ಹಣಾಹಣಿ ಏರ್ಪಟ್ಟಿದ್ದು ಬಿಜೆಪಿಯಿಂದ ಅರುಣಕುಮಾರ್, ಕಾಂಗ್ರೆಸ್​ ನಿಂದ ಪ್ರಕಾಶ ಕೋಳಿವಾಡ್, ಜೆಡಿಎಸ್‌ನಿಂದ ಮಂಜುನಾಥ ಗೌಡಶಿವಣ್ಣನವರ್, ಎನ್​ಸಿಪಿಯಿಂದ ಆರ್​ ಶಂಕರ್ ಮತ್ತು ಪಕ್ಷೇತರ ಅಭ್ಯರ್ಥಿ ಸಂತೋಷ ಪಾಟೀಲ್ ಅಖಾಡದಲ್ಲಿ ಸೆಣೆಸಲು ಸಜ್ಜಾಗಿದ್ದಾರೆ.

ಇದನ್ನೂ ಓದಿ: ಉಪಸಮರ ಗೆದ್ದ ಕಾಂಗ್ರೆಸ್ ಮಹಾಸಮರ ಗೆಲ್ಲುವುದೇ? : ಹಾನಗಲ್‌ ಕ್ಷೇತ್ರದಲ್ಲಿ ತ್ರಿಕೋನ ಸ್ಪರ್ಧೆ