ಹಾವೇರಿ: ಹಾವೇರಿ ಜಿಲ್ಲೆಯ ಸವಣೂರು ತಾಲೂಕಿನ ಕಳಸೂರು ಗ್ರಾಮದಲ್ಲಿನ ನದಿ ಬಳಿಯ ಮರಗಳಲ್ಲಿ 30ಕ್ಕೂ ಅಧಿಕ ಮಂಗಗಳು ಸಿಲುಕಿಗೊಂಡಿವೆ. ಪ್ರವಾಹ ಬಂದಾಗಿನಿಂದ ಈ ಮಂಗಗಳು ಇಲ್ಲಿ ವಾಸ್ತವ್ಯವಾಗಿದ್ದು, ಗ್ರಾಮಸ್ಥರು ಈ ಮಂಗಗಳಿಗೆ ನಿತ್ಯ ಮೂರು ಬಾರಿ ಆಹಾರ ನೀಡಿ ಬರುತ್ತಿದ್ದಾರೆ.
ಹಣ್ಣು, ತರಕಾರಿ ಸೇರಿದಂತೆ ಮಂಗಗಳಿಗೆ ಬೇಕಾಗಿರುವ ಆಹಾರ ಪದಾರ್ಥಗಳನ್ನು ಗ್ರಾಮಸ್ಥರು ತೆಪ್ಪದಲ್ಲಿ ತಗೆದುಕೊಂಡು ಹೋಗುತ್ತಾರೆ. ನಂತರ ಮರದಲ್ಲಿ ಹಣ್ಣು ಮತ್ತು ತರಕಾರಿಗಳನ್ನು ಚೀಲದಲ್ಲಿ ಕಟ್ಟಿ ಬರುತ್ತಾರೆ. ಗ್ರಾಮಸ್ಥರು ಆಹಾರ ಕಟ್ಟಿ ಬರುತ್ತಿದ್ದಂತೆ ಮಂಗಗಳು ಹಣ್ಣು, ತರಕಾರಿ ಸೇವಿಸಿ ಹೊಟ್ಟೆ ತುಂಬಿಸಿಕೊಳ್ಳುತ್ತವೆ.
ನದಿ ಬಳಿಯ ಮರಗಳಲ್ಲಿ ಸಿಲುಕಿದ ಮಂಗಗಳು:
ಹಾವೇರಿ ಜಿಲ್ಲೆಯಲ್ಲಿ ಮಳೆರಾಯ ಮಂಗಳವಾರ ಸಹ ಬಿಡುವು ನೀಡಿದ್ದಾನೆ. ಪ್ರವಾಹ ಪರಿಸ್ಥಿತಿ ದಿನದಿಂದ ದಿನಕ್ಕೆ ಸ್ವಲ್ಪ ಕಡಿಮೆಯಾಗುತ್ತಿದೆ. ಈ ಮಧ್ಯೆ ಸವಣೂರು ತಾಲೂಕಿನ ಕಳಸೂರು ಗ್ರಾಮದಲ್ಲಿನ ನದಿ ಬಳಿಯ ಮರಗಳಲ್ಲಿ 30ಕ್ಕೂ ಅಧಿಕ ಮಂಗಗಳು ಸಿಲುಕಿಗೊಂಡಿವೆ. ಪ್ರವಾಹ ಬಂದಾಗಿನಿಂದ ಈ ಮರಗಳಲ್ಲಿ ಸಿಲುಕಿರುವ ಈ ಮಂಗಗಳಿಗೆ ಸುತ್ತಲೂ ನೀರು ಆವರಿಸಿದ್ದು, ಬೇರೆ ಕಡೆ ಹೋಗಲು ಸಾಧ್ಯವಾಗುತ್ತಿಲ್ಲ.
ಮಂಗಗಳಿಗೆ ಆಹಾರ ಪೂರೈಕೆ:
ಈ ಮಂಗಗಳಿರುವುದು ಜಾಲಿಮರಗಳ ಸಾಲಿನಲ್ಲಿ. ಇಲ್ಲಿ ಇವಕ್ಕೆ ಆಹಾರ ಮರೀಚಿಕೆಯಾಗಿತ್ತು. ಆದರೆ, ಗ್ರಾಮದ ಹಿರಿಯರೊಬ್ಬರು ಈ ಮಂಗಗಳನ್ನು ನೋಡಿ ತೆಪ್ಪದ ಮೂಲಕ ಆಹಾರ ಪೂರೈಸಲು ಮುಂದಾಗಿದ್ದಾರೆ. ವಿಷಯ ತಿಳಿಯುತ್ತಿದ್ದಂತೆ ಗ್ರಾಮಸ್ಥರು ಸೇರಿಕೊಂಡು ಕಳೆದ ನಾಲ್ಕು ದಿನದಿಂದ ಈ ಮಂಗಗಳಿಗೆ ಆಹಾರ ಪೂರೈಸುತ್ತಿದ್ದಾರೆ.
ಬಾಳೆಹಣ್ಣು, ಪೇರಲಹಣ್ಣು ಮತ್ತು ತರಕಾರಿಗಳನ್ನು ತೆಪ್ಪದಲ್ಲಿ ತಗೆದುಕೊಂಡು ಹೋಗಿ ಮರದಲ್ಲಿ ಚೀಲ ಕಟ್ಟಿ, ಅಲ್ಲಿ ಹಾಕಿ ಬರುತ್ತಾರೆ. ಗ್ರಾಮಸ್ಥರು ಹಣ್ಣು, ತರಕಾರಿ ಹಾಕಿ ಮರಳುತ್ತಿದ್ದಂತೆ ಮಂಗಗಳು ಹಣ್ಣು ಮತ್ತು ತರಕಾರಿ ತಿನ್ನುತ್ತವೆ.
ಗ್ರಾಮಸ್ಥರಿಗೆ ಅರಣ್ಯ ಇಲಾಖೆ ಸಿಬ್ಬಂದಿ ಸಾಥ್:
ಗ್ರಾಮಸ್ಥರ ಈ ಕಾರ್ಯಕ್ಕೆ ಅರಣ್ಯ ಇಲಾಖೆ ಸಿಬ್ಬಂದಿ ಸಹ ಸಾಥ್ ನೀಡಿದ್ದಾರೆ. ನಿತ್ಯ ತಮ್ಮ ವಾಹನದಲ್ಲಿ ತರಕಾರಿ ತಂದು ಗ್ರಾಮಸ್ಥರಿಗೆ ನೀಡುತ್ತಿದ್ದಾರೆ. ಸಾಧ್ಯವಾದರೆ ವಲಯ ಅರಣ್ಯಾಧಿಕಾರಿ ರಮೇಶ ಶೇತಸನದಿ ತೆಪ್ಪ ಹತ್ತಿ ಮಂಗಗಳಿಗೆ ಆಹಾರ ನೀಡಲು ಹೋಗಿ ಬರುತ್ತಾರೆ.
ಕೆಲ ವರ್ಷಗಳ ಹಿಂದಿನ ಘಟನೆ ಮರುಕಳಿಸಿತೆ?
ಕಳೆದ ಕೆಲ ವರ್ಷಗಳ ಹಿಂದೆ ಸಹ ಪ್ರವಾಹ ಬಂದಾಗ ಇದೇ ರೀತಿ ಮಂಗಗಳು ನೀರಿನ ಮಧ್ಯೆ ಸಿಲುಕಿದ್ದವಂತೆ. ಆಗ ಸಹ ಗ್ರಾಮಸ್ಥರು ಈ ರೀತಿ ಆಹಾರ ನೀಡಿ ಮಂಗಗಳನ್ನು ಸಂರಕ್ಷಿಸಿದ್ದರಂತೆ.
ಇದನ್ನೂ ಓದಿ: ಕುಸಿದ ಸೂಳೆಕೆರೆ ಏರಿ.. ಏಷ್ಯಾದ 2ನೇ ಅತಿದೊಡ್ಡ ಕೆರೆಗೆ ಬೇಕಿದೆ ಕಾಯಕಲ್ಪ
ಪ್ರಸ್ತುತ ಪ್ರವಾಹ ಇಳಿಯುವವರೆಗೆ ಆಹಾರ ಪೂರೈಸುವದಾಗಿ ಗ್ರಾಮಸ್ಥರು ತಿಳಿಸಿದ್ದಾರೆ. ಇನ್ನೊಂದೆರಡು ದಿನಗಳಲ್ಲಿ ಪ್ರವಾಹ ಇಳಿಯುತ್ತಿದ್ದಂತೆ ಮಂಗಗಳು ತಮ್ಮ ಆವಾಸ ಸ್ಥಾನದತ್ತ ಹೋಗುತ್ತವೆ ಎನ್ನುತ್ತಾರೆ ಗ್ರಾಮಸ್ಥರು.
