ಹಾವೇರಿ: ಜಿಲ್ಲೆ ಕೊರೊನಾ ಲಸಿಕೆ ಅಭಿಯಾನದಲ್ಲಿ ಹಿಂದುಳಿದಿದೆ ಎಂಬ ಮಾತುಗಳು ಕೇಳಿಬಂದಿದ್ದವು. ಸಿಎಂ ಬೊಮ್ಮಾಯಿ ತವರಲ್ಲೇ ಕೊರೊನಾ ಲಸಿಕೆ ನಿಧಾನಗತಿಯಲ್ಲಿ ಸಾಗಿತ್ತು ಎಂಬ ಆರೋಪ ಎದುರಾಗಿತ್ತು. ಆದರೆ ಅಧಿಕಾರಿಗಳ ಪರಿಶ್ರಮದಿಂದಾಗಿ ಇದೀಗ ಜಿಲ್ಲೆಯ ಗ್ರಾಮಗಳಲ್ಲಿ ನೂರಕ್ಕೆ ನೂರರಷ್ಟು ಲಸಿಕೆ ವಿತರಣೆಯಾಗಿದೆ.
ಜಿಲ್ಲೆಯ 28 ಗ್ರಾಮಗಳು ಸಂಪೂರ್ಣ ಲಸಿಕಾಕರಣಗೊಂಡಿವೆ. ಬ್ಯಾಡಗಿ, ಹಾನಗಲ್ ಶಿಗ್ಗಾವಿ ಮತ್ತು ರಾಣೆಬೆನ್ನೂರು ತಾಲೂಕುಗಳಲ್ಲಿ ತಲಾ 4 ಗ್ರಾಮಗಳು ಲಸಿಕಾಕರಣಗೊಂಡಿವೆ. ಹಾವೇರಿ ತಾಲೂಕಿನ 6 ಗ್ರಾಮಗಳು. ಹಿರೇಕೆರೂರು ಮತ್ತು ಸವಣೂರು ತಾಲೂಕಿನ ತಲಾ 3 ಗ್ರಾಮಗಳು ಸಂಪೂರ್ಣ ಲಸಿಕಾಕರಣಗೊಂಡಿವೆ.
ಈ ಗ್ರಾಮಗಳಲ್ಲಿ ಸಹ ಮೊದ ಮೊದಲು ಜನರಿಂದ ಲಸಿಕೆಗೆ ವಿರೋಧ ವ್ಯಕ್ತವಾಗಿತ್ತು. ಗ್ರಾಮಸ್ಥರು ಲಸಿಕೆ ಹಾಕಿಸಿಕೊಳ್ಳಲು ಹಿಂದೇಟು ಹಾಕಿದ್ದರು. ಆದರೆ ಗ್ರಾಮ ಪಂಚಾಯತ್ ಸದಸ್ಯರು ಆರೋಗ್ಯ ಇಲಾಖೆ ಸಿಬ್ಬಂದಿ, ಅಂಗನವಾಡಿ ಕಾರ್ಯಕರ್ತೆಯರು ಮನೆ ಮನೆಗೆ ತೆರಳಿ ಲಸಿಕೆ ಕುರಿತಂತೆ ಜಾಗೃತಿ ಮೂಡಿಸಿದ್ದರು. ಹಾವೇರಿ ತಾಲೂಕಿನ ಬಿದರಗಡ್ಡಿಯಲ್ಲಿ ಎಲ್ಲರ ಸಹಕಾರದಿಂದ ಗ್ರಾಮಕ್ಕೆ ಗ್ರಾಮವೇ ಕೊರೊನಾ ಲಸಿಕೆ ಪಡೆದುಕೊಂಡಿದೆ.
18 ವರ್ಷ ಮೇಲ್ಪಟ್ಟ ಎಲ್ಲರಿಗೂ ಲಸಿಕೆ
ಬಿದರಗಡ್ಡಿ ಗ್ರಾಮಕ್ಕೆ ಮೊದಲು 100 ಡೋಸ್ ಲಸಿಕೆ ತರಿಸಲಾಗಿತ್ತು. ಆರಂಭದಲ್ಲಿ ಸಾಕಷ್ಟು ಹೆದರಿದ್ದ ಗ್ರಾಮಸ್ಥರು ಲಸಿಕೆ ಹಾಕಿಸಿಕೊಳ್ಳಲು ಹಿಂದೇಟು ಹಾಕಿದ್ದರು. 2ನೇ ಬಾರಿ 350 ಲಸಿಕೆ ತರಿಸಲಾಯಿತು. ಇದೀಗ ಗ್ರಾಮದಲ್ಲಿ 18 ವರ್ಷಕ್ಕಿಂತ ಮೇಲ್ಪಟ್ಟ ಎಲ್ಲರೂ ಲಸಿಕೆ ಪಡೆದಿದ್ದಾರೆ. ಅಲ್ಲದೆ ಗ್ರಾಮಗಳಲ್ಲಿ ಇದೀಗ 2ನೇ ಡೋಸ್ ಪಡೆಯಲು ಸಹ ಜನ ಉತ್ಸುಕರಾಗಿದ್ದು, ಅವಧಿಗೆ ಅನುಗುಣವಾಗಿ 2ನೇ ಡೋಸ್ ಹಾಕಿಸಿಕೊಳ್ಳಲು ಇಂಗಿತ ವ್ಯಕ್ತಪಡಿಸಿದ್ದಾರೆ.
ಗ್ರಾಮದಲ್ಲಿ ಕೊರೊನಾ ಲಸಿಕಾಕರಣದಿಂದ ಯಾವುದೇ ಅಡ್ಡಪರಿಣಾಮವಾಗಿಲ್ಲ. ಚಿಕ್ಕಪುಟ್ಟ ಅನಾರೋಗ್ಯ ಸಮಸ್ಯೆಗಳಿದ್ದವರು ವೈದ್ಯರ ಸಲಹೆ ಪಡೆದು ಆರೋಗ್ಯವಾಗಿದ್ದಾರೆ. ಈ 28 ಗ್ರಾಮಗಳು ಇದೀಗ ಬೇರೆ ಗ್ರಾಮಗಳಿಗೂ ಮಾದರಿಯಾಗಿವೆ.
ಇದನ್ನೂ ಓದಿ: ಕಡಲಾಳದೊಳಗೇನೋ ಕೋಲಾಹಲ.. ದಂಡೆಗಪ್ಪಳಿಸಿದ ಜಲಚರಗಳು ವಿಲವಿಲ..
