ಹಾವೇರಿ: ಯುಟಿಪಿ ಕಾಲುವೆಯಲ್ಲಿ ಮೈತೊಳೆಯುತ್ತಿದ್ದ ಸಂದರ್ಭದಲ್ಲಿ ಕಾಲುವೆಯಲ್ಲಿ ಒಮ್ಮಿದೊಮ್ಮೆಲೇ ಅಧಿಕ ನೀರು ಬಂದಿದ್ದರಿಂದ ಎತ್ತುಗಳು ನೀರು ಕುಡಿದು ಸಾವನ್ನಪ್ಪಿರುವ ಘಟನೆ ಹಾವೇರಿ ಸಮೀಪದ ಭೂಕೋಡಿಹಳ್ಳಿಯಲ್ಲಿ ನಡೆದಿದೆ.
ಭೂಕೋಡಿಹಳ್ಳಿಯ ವೀರಪ್ಪ ಮತ್ತಿಹಳ್ಳಿ ಎಂಬುವವರಿಗೆ ಸೇರಿದ ಎತ್ತುಗಳಿಗೆ ಶನಿವಾರ ಯುಟಿಪಿ ಕಾಲುವೆಯಲ್ಲಿ ಮೈ ತೊಳೆಯಲಾಗುತ್ತಿತ್ತು. ಈ ಸಂದರ್ಭದಲ್ಲಿ ಕಾಲುವೆಯಲ್ಲಿ ಒಮ್ಮಿದೊಮ್ಮೆಲೇ ಅಧಿಕ ನೀರು ಬಂದಿದ್ದರಿಂದ ಈ ಘಟನೆ ಸಂಭವಿಸಿದೆ. ತನ್ನ ನೆಚ್ಚಿನ ಎತ್ತುಗಳು ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ್ದನ್ನ ಕಂಡ ಬಾಲಕ ಬಿಕ್ಕಿ ಬಿಕ್ಕಿ ಅತ್ತಿದ್ದಾನೆ. ಬಾಲಕ ಅಳುವುದನ್ನು ಕಂಡು ಗ್ರಾಮಸ್ಥರು ಸಹ ದುಃಖ ವ್ಯಕ್ತಪಡಿಸಿದ್ದಾರೆ. ಸ್ಥಳೀಯರು ಬಾಲಕನನ್ನ ಸಮಾಧಾನ ಮಾಡಿದ ಬಳಿಕ ಬಾಲಕ ಅಳುವುದನ್ನ ನಿಲ್ಲಿಸಿದ್ದಾನೆ.
ಈ ಘಟನೆಯಲ್ಲಿ ಲಕ್ಷಾಂತರ ರೂಪಾಯಿ ಮೌಲ್ಯದ ಎತ್ತುಗಳು ಸಾವನ್ನಪ್ಪಿದ್ದರೂ ಯಾವ ಅಧಿಕಾರಿಗಳು ಬರದ ಕಾರಣ ರೈತರು ಪ್ರತಿಭಟನೆ ನಡೆಸಿದರು. ಅಲ್ಲದೆ ಕಾಲುವೆಯನ್ನ ಅವೈಜ್ಞಾನಿಕವಾಗಿ ನಿರ್ಮಿಸಿದ್ದೇ ಅವಘಡಕ್ಕೆ ಕಾರಣ ಎಂದು ಆರೋಪಿಸಿದರು.
