ಹಾಸನ: ನೂರಕ್ಕೆ ನೂರರಷ್ಟು ಲಾಕ್ಡೌನ್ ಅನ್ನು ರಾಜ್ಯದಲ್ಲಿ ಜಾರಿ ಮಾಡುವುದಿಲ್ಲ ಎಂದು ಕಂದಾಯ ಸಚಿವ ಆರ್.ಅಶೋಕ್ ಸ್ಪಷ್ಟಪಡಿಸಿದರು.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕಂದಾಯ ಇಲಾಖೆಯಿಂದ ಕೊರೊನಾಗೆ ಸುಮಾರು ₹ 280 ಕೋಟಿ ಹಣ ಕೊಡಲಾಗಿದೆ. ಜಿಲ್ಲೆಗೂ ಎಷ್ಟೇ ಹಣ ಖರ್ಚಾಗಲಿ ಕೊಡಲಾಗುವುದು ಎಂದರು.
ಹೊರಗಿನಿಂದ ಇಲ್ಲಿರುವ ರೆಸಾರ್ಟ್ಗೆ ಬರುವವರ ಕುರಿತು ಹಳ್ಳಿಯ ಜನತೆ ಭಯಭೀತರಾಗಿದ್ದಾರೆ. ಜಿಲ್ಲೆಯ ರೆಸಾರ್ಟ್ಸ್ಗಳನ್ನು ಜಿಲ್ಲಾಧಿಕಾರಿಗಳ ಮೂಲಕ ಮುಚ್ಚಲು ಇನ್ನೊಂದು ವಾರದೊಳಗೆ ಆದೇಶ ಕೊಡಲಾಗುವುದು ಎಂದರು.
ಹತ್ತು ದಿನಗಳಿಂದ ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲೂ ಕೊರೊನಾ ಸೋಂಕು ಹೆಚ್ಚು ಹರಡುತ್ತಿದ್ದು, ನಿಯಂತ್ರಣಕ್ಕೆ ಕಟ್ಟುನಿಟ್ಟಾಗಿ ಕ್ರಮ ತೆಗೆದುಕೊಳ್ಳಬೇಕಾಗಿದೆ. ಈ ರೋಗದ ಬಗ್ಗೆ ಆರು ತಿಂಗಳಾದರೂ ಎಚ್ಚರಿಕೆಯಿಂದ ಇರುವಂತೆ ಅಧಿಕಾರಿಗಳಿಗೂ ಸೂಚನೆ ನೀಡಲಾಗಿದೆ ಎಂದರು.
ಸ್ವಯಂಪ್ರೇರಿತವಾಗಿ ಲಾಕ್ಡೌನ್ ಮಾಡುವವರು ರಾಜ್ಯ ರಸ್ತೆ, ರಾಷ್ಟ್ರೀಯ ಹೆದ್ದಾರಿ ಬಂದ್ ಮಾಡುವಂತಿಲ್ಲ. ನಿಮ್ಮ ಪ್ರದೇಶವನ್ನು ಬ್ಲಾಕ್ ಮಾಡಲು ನೀವು ಸ್ವತಂತ್ರರು. ಆದರೆ, ಇದಕ್ಕೂ ಒಪ್ಪಿಗೆ ಬೇಕಾಗುತ್ತದೆ. ಹೆದ್ದಾರಿ ಬಂದ್ ಮಾಡುವಂತಿಲ್ಲ ಎಂದು ಎಚ್ಚರಿಸಿದರು.
