ಹಾಸನ: ಮಲೆನಾಡಿನಲ್ಲಿ ದಿನದಿಂದ ದಿನಕ್ಕೆ ಮುಂಗಾರಿನ ಅಬ್ಬರ ಹೆಚ್ಚಾಗುತ್ತಿದ್ದು, ಜಿಲ್ಲೆಯ ಜೀವನದಿ ಹೇಮಾವತಿ ಡ್ಯಾಂಗೆ ಒಳಹರಿವಿನ ಪ್ರಮಾಣವೂ ಏರಿಕೆಯಾಗಿದೆ.
ಪಶ್ಚಿಮ ಘಟ್ಟಗಳಾದ ಬಿಸಿಲೆ, ಮೂಡಿಗೆರೆ, ಚಿಕ್ಕಮಗಳೂರು ಭಾಗದಲ್ಲಿ ಮಳೆರಾಯನ ಅಬ್ಬರ ಜೋರಾಗಿದ್ದು, ಎರಡು ದಿನಗಳಿಂದ ಒಂದೇ ಸಮನೆ ಮಳೆ ಸುರಿಯುತ್ತಿರುವುದರಿಂದ ಜನಜೀವನ ಅಸ್ತವ್ಯಸ್ತವಾಗಿದೆ.
ಹೇಮಾವತಿಗೆ ಎರಡು ದಿನದಲ್ಲಿ ಎರಡು ಟಿಎಂಸಿಯಷ್ಟು ನೀರು ಶೇಖರಣೆಯಾಗಿದೆ. ಇಂದು ಕೂಡಾ 17ಸಾವಿರ ಕ್ಯೂಸೆಕ್ ನೀರು ಹರಿದು ಬರುತ್ತಿದ್ದು, ಜೀವನದಿ ತನ್ನೊಡಲಿಗೆ ನೀರನ್ನ ತುಂಬಿಕೊಳ್ಳುತ್ತಿದೆ. ಹೇಮಾವತಿ ನದಿ ಪಾತ್ರದ ಕೆಂಪುಹೊಳೆ ಸೇರಿದಂತೆ ಹಳ್ಳಕೊಳ್ಳ, ಕೆರೆ ಕಟ್ಟೆಗಳು ತುಂಬಿ ಹರಿಯುತ್ತಿವೆ.
ಈ ಬಾರಿ ನಿಗದಿತ ಪ್ರಮಾಣದಲ್ಲಿ ಮುಂಗಾರು ಮಳೆಯಾಗದೆ ಕೃಷಿ ಚಟುವಟಿಕೆಗೆ ತೀವ್ರ ಹಿನ್ನಡೆಯಾಗಿತ್ತು. ಅಗಾಗ್ಗೆ ಬಿದ್ದ ಅಲ್ಪಸ್ವಲ್ಪ ಮಳೆಯನ್ನು ನಂಬಿ ಬಿತ್ತನೆ ಮಾಡಿದ್ದ ರೈತರು ಮಳೆ ಕೈಕೊಟ್ಟಿದ್ದರಿಂದ ಆತಂಕಕ್ಕೆ ಒಳಗಾಗಿದ್ದರು. ಈಗ ಅಬ್ಬರಿಸುತ್ತಿರುವ ಮಳೆಯಿಂದ ರೈತರು ಒಂದು ಕಡೆ ಸಂತಸ ಪಟ್ಟುಕೊಂಡರೂ ಅತಿಯಾದ ಮಳೆ ಕೆಲವೆಡೆ ಆತಂಕ ಸೃಷ್ಟಿಸಿದೆ.
ಮಳೆಯ ಪ್ರಮಾಣ:
ಸಕಲೇಶಪುರ ತಾಲೂಕಿನಲ್ಲಿ ಜುಲೈ 4 ರಿಂದ ಸರಾಸರಿ 140 ಮಿ.ಮೀ. ಮಳೆಯಾಗಿದೆ. ಹೆತ್ತೂರು, ಯಸಳೂರು, ಹಾನುಬಾಳು ಹಾಗೂ ಕಸಬಾ ಹೋಬಳಿ ವ್ಯಾಪ್ತಿಯಲ್ಲಿ ಸರಾಸರಿ 120 ಮಿ.ಮೀ, ಬೆಳಗೋಡು ಹೋಬಳಿ ವ್ಯಾಪ್ತಿಯಲ್ಲಿ 60 ಮಿ.ಮೀ. ಮಳೆಯಾಗಿದ್ದು, ರೈತರ ಮೊಗದಲ್ಲಿ ಸಂತಸ ಮೂಡಿದೆ.
ಹಾಗೆಯೇ ಅರಕಲಗೂಡು 12 ಮಿ.ಮೀ, ಕೊಣನೂರು 12.2ಮಿ.ಮೀ, ದೊಡ್ಡಮಗ್ಗೆ 9.2 ಮಿ.ಮೀ, ಮಲ್ಲಿಪಟ್ಟಣ 27 ಮಿ.ಮೀ, ರಾಮನಾಥಪುರದಲ್ಲಿ 3.1 ಮಿ.ಮೀ ಮಳೆ ಸುರಿದಿದೆ.
ಸಕಲೇಶಪುರದ ಹೇಮಾವತಿ ಹೊಳೆ ಭಾಗಶಃ ಭರ್ತಿಯಾಗಿ ಹೊಂದಿಕೊಂಡಂತಿರುವ ಶಿವನ ದೇವಾಲಯದ ಬಾಗಿಲಿನ ತನಕ ನೀರು ಹರಿದು ಬಂದಿದೆ. ಇನ್ನೆರಡು ದಿನ ಇದೇ ರೀತಿ ಮಳೆಯಾದ್ರೆ, ದೇವಾಲಯ ಸಂಪೂರ್ಣ ಮುಳುಗುವ ಸಾಧ್ಯತೆಯಿದೆ.
ಮುನ್ನೆಚ್ಚರಿಕೆಯಾಗಿ ಜಿಲ್ಲಾಡಳಿತ ಈಗಾಗಾಲೇ ಸಕಲೇಶಪುರ, ಆಲೂರು ತಾಲೂಕಿನ ಹೊಳೆಯಂಚಿನ ಭಾಗದಲ್ಲಿ ಎಲ್ಲಾ ಶಾಲಾ ಕಾಲೇಜುಗಳಿಗೆ ರಜೆ ಘೋಷಿಸಿದೆ. ಆ ಭಾಗದ ಜನರಿಗೆ ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ಸೂಚನೆ ಸಹ ನೀಡಲಾಗಿದೆ.
