ಗದಗ: ಪೆಟ್ರೋಲ್, ಡೀಸೆಲ್ ಬೆಲೆ ಗಗನಕ್ಕೇರುತ್ತಿದ್ದಂತೆ ಜನತೆ ಎಲೆಕ್ಟ್ರಿಕ್ ವಾಹನಗಳ ಮೊರೆ ಹೋಗುತ್ತಿದ್ದಾರೆ. ಆದರೆ ಗದಗದ ಓರ್ವ ಯುವಕ ತಾನೇ ಎಲೆಕ್ಟ್ರಿಕ್ ಸೈಕಲ್ ತಯಾರಿಸಿ ಎಲ್ಲರೂ ಹುಬ್ಬೇರುವಂತೆ ಮಾಡಿದ್ದಾನೆ.
ಗದಗ್ನ ಒಕ್ಕಲಗೇರಿ ನಿವಾಸಿ ಹಬೀಬ್ ಎಂಬಾತ ಯಾರ ಸಹಾಯವನ್ನೂ ಪಡೆಯದೆ ಸ್ವತಃ ಬ್ಯಾಟರಿ ಚಾಲಿತ ಸೈಕಲ್ ಆವಿಷ್ಕರಿಸಿದ್ದಾನೆ. ಗುಜರಿಗೆ ಸೇರಿದ್ದ ಹಳೆಯ ಸೈಕಲ್ ಬಳಸಿ ಈ ಎಲೆಕ್ಟ್ರಿಕ್ ಸೈಕಲ್ ತಯಾರಿಸಿದ್ದಾನೆ.
16 ವರ್ಷದ ಹಬೀಬ್ ಮೊದಲ ವರ್ಷದ ಡಿಪ್ಲೋಮಾ ವ್ಯಾಸಂಗ ಮಾಡುತ್ತಿದ್ದಾನೆ. ಇದೀಗ ಈತ ತಯಾರಿಸಿರುವ ಸೈಕಲ್ ಕೇವಲ 6 ರೂಪಾಯಿಗೆ 30ರಿಂದ 40 ಕಿ.ಮೀಟರ್ನಷ್ಟು ಮೈಲೇಜ್ ನೀಡುತ್ತಿದೆ. ಸೈಕಲ್ಗೆ 12 ವೋಲ್ಟ್ನ ಎರಡು ಬ್ಯಾಟರಿ, 24 ವೋಲ್ಟ್ ಗೇರ್ಡ್ ಮೋಟಾರ್ ಅಳವಡಿಸಿದ್ದು, ಬ್ಯಾಟರಿ ಸಂಪರ್ಕ ಕಲ್ಪಿಸಿ ಚಾರ್ಜ್ ಮಾಡಿದರೆ ಸೈಕಲ್ ಎಲೆಕ್ಟ್ರಿಕ್ ಸೈಕಲ್ ಆಗಿ ಬದಲಾಗುತ್ತದೆ.
ಇದರ ಇನ್ನೊಂದು ಅನುಕೂಲವೆಂದರೆ ದಾರಿಯಲ್ಲಿ ಬ್ಯಾಟರಿಯಲ್ಲಿನ ಚಾರ್ಜ್ ಮುಗಿದರೂ ಪೆಡಲ್ ಮೂಲಕ ತುಳಿದುಕೊಂಡು ಬರಬಹುದಾಗಿದೆ. ಈ ಎಲೆಕ್ಟ್ರಿಕ್ ಸೈಕಲ್ ಕೇವಲ 9 ಸಾವಿರ ರೂಪಾಯಿಯಲ್ಲಿ ತಯಾರಾಗಿದೆ. ಈ ವಿದ್ಯಾರ್ಥಿಯ ಸಾಧನೆ ಕಂಡು ಸ್ಥಳೀಯರು ಪ್ರಶಂಸೆ ವ್ಯಕ್ತಪಡಿಸುತ್ತಾರೆ.
ಇದನ್ನೂ ಓದಿ: ಲಾಕ್ಡೌನ್ ವೇಳೆ ಎಲೆಕ್ಟ್ರಿಕ್ ಬೈಕ್ ತಯಾರಿಸಿದ 10ನೇ ತರಗತಿ ವಿದ್ಯಾರ್ಥಿ.. ಖರ್ಚಾಗಿದೆಷ್ಟು ಗೊತ್ತಾ..?
