ಹುಬ್ಬಳ್ಳಿ: ದಾರಿ ತಪ್ಪಿದ ಗಂಡನಿಗೆ ಉದ್ಯೋಗ ಮಾಡಲು ಸಾಲ ಕೊಡಿಸಿ, ಮರುಪಾವತಿ ಮಾಡಲಾಗದೆ ಪರದಾಡುತ್ತಿರುವ ಮಹಿಳೆಗೆ ಮಂಜುನಾಥ ಹೆಬಸೂರು ನೇತೃತ್ವದ ಗೆಳೆಯರ ಬಳಗ ಸಹಾಯಹಸ್ತ ಚಾಚಿದೆ.
ಮಂಜುನಾಥ ಹೆಬಸೂರು ಹಾಗೂ ಗೆಳೆಯರು ಮಹಿಳೆಗೆ ಒಂದು ತಿಂಗಳಿಗೆ ಆಗುವಷ್ಟು ಆಹಾರ ಸಾಮಗ್ರಿ, ತರಕಾರಿ ಹಾಗೂ ಮಕ್ಕಳಿಗೆ ಶಾಲಾ ಬ್ಯಾಗ್ ಕೊಡಿಸುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ.
ಗಬ್ಬೂರು ನಿವಾಸಿ ಗಿರಿಜಾ ಹನುಮಂತ ನಾಯ್ಕರ ಅವರು ಕಳೆದ 15 ವರ್ಷಗಳ ಹಿಂದೆ ಕುಂದಗೋಳ ತಾಲೂಕಿನ ಬೆಟದೂರು ಗ್ರಾಮದ ಹನುಮಂತ ಎಂಬಾತನ ಜೊತೆ ವಿವಾಹವಾಗಿದ್ದರು. ದುಶ್ಚಟಗಳ ದಾಸನಾಗಿದ್ದ ಗಂಡನಿಗೆ ಏನಾದರೂ ಉದ್ಯೋಗ ಮಾಡಿಕೊಂಡಿರಲಿ ಎಂದು ಗಿರಿಜಾ ಸಾಲ ತೆಗೆಸಿಕೊಟ್ಟಿದ್ದರು. ಆದ್ರೆ ಪತಿರಾಯ ಪತ್ನಿಯಿಂದ ಹಣ ಪಡೆದು ವ್ಯವಹಾರ ಮಾಡದೆ ಇಬ್ಬರು ಮಕ್ಕಳು ಹಾಗೂ ಪತ್ನಿಗೆ ಕೈಕೊಟ್ಟು ಪರಾರಿಯಾಗಿದ್ದಾನೆ. ಇದರಿಂದ ಅತ್ತ ಸಾಲ ತುಂಬಿಸಲಾಗದೆ ಇತ್ತ ಜೀವನಕ್ಕೂ ಬೇರೆ ದಾರಿಯಿಲ್ಲದೆ ಮಹಿಳೆ ಪರದಾಡುತ್ತಿದ್ದರು.
ಈ ಕುರಿತು ಈಟಿವಿ ಭಾರತ ವರದಿ ಪ್ರಕಟಿಸಿತ್ತು. ಸುದ್ದಿ ವೀಕ್ಷಿಸಿದ ಮಂಜುನಾಥ ಹೆಬಸೂರು ಹಾಗೂ ಗೆಳೆಯರು ಮಹಿಳೆಗೆ ಸಹಾಯ ಮಾಡುವ ಮೂಲಕ ಆತ್ಮಸ್ಥೈರ್ಯ ತುಂಬುವ ಕೆಲಸ ಮಾಡಿದ್ದಾರೆ.
