ಟಾಟಾ ಏಸ್​ ವಾಹನವನ್ನೇ ಮನೆ ಮಾಡಿಕೊಂಡು ಬಾಣಂತಿ, ಹಸುಗೂಸು ಆರೈಕೆ

ಲಾಕ್​​ಡೌನ್​​ ಪರಿಣಾಮ ಟಾಟಾ ಏಸ್​ ವಾಹನದಲ್ಲೇ ಬಾಣಂತಿ ಹಾಗೂ ಹಸುಗೂಸು ಆರೈಕೆ ಮಾಡಿಸಿಕೊಳ್ಳುತ್ತಿರುವ ಘಟನೆ ಬೆಳಕಿಗೆ ಬಂದಿದೆ.

ಧಾರವಾಡ: ಕೊರೊನಾ ಲಾಕ್‌ಡೌನ್ ಮಾಡಿರುವುದರಿಂದ ಜಿಲ್ಲೆಯಲ್ಲಿ ತನ್ನ 2 ವಾರದ ಹಸುಗೂಸಿನೊಂದಿಗೆ ಬಾಣಂತಿ ಟಾಟಾ ಏಸ್ ವಾಹನದಲ್ಲಿ ದಿನ ದೂಡುವ ಪರಿಸ್ಥಿತಿ ಎದುರಾಗಿದೆ.

ಜಿಲ್ಲೆಯ ಬಣದೂರ ಗ್ರಾಮದ ಹೊರವಲಯದಲ್ಲಿ ಗೂಡ್ಸ್ ವಾಹನವನ್ನೇ ಮನೆ ಮಾಡಿಕೊಂಡು ಅದರಲ್ಲಿ ‌ತನ್ನ ಹಸುಗೂಸು ಪಾಲನೆ ಮಾಡುತ್ತಿರುವ ಮನಕಲುಕುವ ದೃಶ್ಯ ಕಂಡು‌ ಬಂದಿದೆ.

ಲಾಕ್​​ಡೌನ್​​ಗೂ ಮುಂಚೆ ಧಾರವಾಡ ಹಾಗೂ ಹಾವೇರಿ ಭಾಗದ ಹೆಳವರು ಧಾರವಾಡ ಜಿಲ್ಲೆಯ ಹಳಿಯಾರ ರಸ್ತೆಯ ಹಳ್ಳಿಗಳಲ್ಲಿ ಸಂಚಾರ ಮಾಡುತ್ತ ಬಣದೂರ ಗ್ರಾಮದ ಹೊರ ವಲಯದಲ್ಲಿ ಕ್ಯಾಂಪ್‌ ಹಾಕಿಕೊಂಡಿದ್ದರು. ಇನ್ನೇನು ತಮ್ಮ‌ ಊರುಗಳನ್ನು ಸೇರಬೇಕು ಎನ್ನುವಾಗ ‌ ಕೊರೊನಾ ಲಾಕ್​ಡೌನ್​​​ ಜಾರಿಯಾಗಿ ಇವರೆಲ್ಲ ಬಣದೂರ ಬಯಲಿನಲ್ಲಿ ಲಾಕ್ ಆಗಿ ಬಿಟ್ರು.‌ ಇದೇ ವೇಳೆ ಕ್ಯಾಂಪ್​​ನಲ್ಲಿದ್ದ ಬಸವ್ವ ಎಂಬುವವರ ಮಗಳು ಸರಸ್ವತಿ ತುಂಬು ಗರ್ಭಿಯಾದ್ದರಿಂದ ಕಳೆದ 2 ವಾರಗಳ ಹಿಂದೆ ಆಸ್ಪತ್ರೆಯಲ್ಲಿ ಹೆರಿಗೆ ಕೂಡ ಆಗಿದೆ.
ಹೀಗಾಗಿ ಟಾಟಾ ಏಸ್​​ ಹಿಂಭಾಗಕ್ಕೆ ಕೌದಿಗಳನ್ನು ಹಾಕಿ ಕೋಣೆಯನ್ನಾಗಿ ಮಾಡಿ ಅದರಲ್ಲೇ ಬಾಣಂತಿ ಹಾಗೂ ಮಗುವಿನ ಆರೈಕೆ ನಡೆಯುತ್ತಿದೆ.