ಹುಬ್ಬಳ್ಳಿ: ಕಾಂಗ್ರೆಸ್ನವರು ಚುನಾವಣೆಗೆ ಮುಂಚೆ ಬಹಳಷ್ಟು ಭರವಸೆಗಳನ್ನು ಕೊಡ್ತಾರೆ. ಆದರೆ ಚುನಾವಣೆ ಮುಗಿದ ಬಳಿಕ ಏನೂ ಮಾಡುವುದಿಲ್ಲ. ಅವರದ್ದು ಕೇವಲ ಓಟ್ ಬ್ಯಾಂಕ್‌ ಪಾಲಿಟಿಕ್ಸ್ ಎಂದು ಎಐಎಂಐಎಂ ರಾಷ್ಟ್ರೀಯ ಅಧ್ಯಕ್ಷ ಅಸಾದುದ್ದಿನ್ ಓವೈಸಿ ಟೀಕಿಸಿದರು.
ಪಕ್ಷದ ಅಭ್ಯರ್ಥಿಯ ಪರ ಪ್ರಚಾರಕ್ಕೆ ಹುಬ್ಬಳ್ಳಿಗೆ ಆಗಮಿಸಿ ಮಾತನಾಡಿದ ಅವರು, ಕಾಂಗ್ರೆಸ್ ಪ್ರಣಾಳಿಕೆಯಲ್ಲಿ ಬಜರಂಗದಳ ನಿಷೇಧ ಪ್ರಸ್ತಾಪದ ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದರು. ಈ ಹಿಂದೆ ಅಯೋಧ್ಯೆಯಲ್ಲಿ ಬಾಬರಿ ಮಸೀದಿ ನಿರ್ಮಿಸುತ್ತೇವೆ ಎಂದು ಕಾಂಗ್ರೆಸ್ನವರು ನಿರ್ಣಯ ಪಾಸ್ ಮಾಡಿದ್ದರು. ಆದರೆ ನಂತರದಲ್ಲಿ ಮಾಡಿದ್ದೇನು ಎಂದು ಕೇಳಿದರು.
ಜಗದೀಶ್ ಶೆಟ್ಟರ್ ಅವರ ಜೀವನ ಆರ್‌ಎಸ್‌ಎಸ್‌ನಿಂದ ಆರಂಭವಾಯಿತು. ಅಂಥವರನ್ನು ಕಾಂಗ್ರೆಸ್ ಪಕ್ಷಕ್ಕೆ ಸೇರಿಸಿಕೊಂಡಿದೆ. ಅವರನ್ನು ಕರೆದುಕೊಂಡು ಬಂದ ಬಳಿಕ ಅವರು ಜಾತ್ಯತೀತರಾಗಿ ಬಿಟ್ಟಿದ್ದಾರಾ? ಕಾಂಗ್ರೆಸ್ ಪಕ್ಷದವರು ಜಾತ್ಯಾತೀತ ಎನ್ನುವ ಪ್ರಮಾಣ ಪತ್ರ ಮಾಡುವ ನೋಟರಿಯವರಾ ಎಂದು ವ್ಯಂಗ್ಯವಾಗಿ ಹೇಳಿದರು.
ಮುಸ್ಲಿಮರ ಮತಗಳನ್ನು ವಿಭಜಿಸಲು ಬಿಜೆಪಿ ಓವೈಸಿಯನ್ನು ಕರೆದು ತಂದಿದ್ದಾರೆ ಎಂಬ ಆರೋಪಕ್ಕೆ ಪ್ರತಿಕ್ರಿಯಿಸಿ, ಹಾಗಿದ್ದರೆ ರಾಹುಲ್ ಗಾಂಧಿ ಸೋಲಿಗೂ ನಾನೇ ಕಾರಣವೇ? ಕರ್ನಾಟಕದಲ್ಲಿ ಎರಡು ಕಡೆ ಅಭ್ಯರ್ಥಿಗಳನ್ನು ನಿಲ್ಲಿಸಿದ್ದೇವೆ ಎಂದು ತಿಳಿಸಿದರು.
ನಿಮ್ಮ ಚುನಾವಣೆ ನೀವು ಮಾಡಿ, ನಮ್ಮ ಚುನಾವಣೆಯನ್ನು ನಾವು ಮಾಡುತ್ತೇವೆ. ನಮ್ಮ ಪಕ್ಷದ ತಂತ್ರಗಾರಿಕೆಗೆ ಅನುಗುಣವಾಗಿ ಚುನಾವಣೆ ಮಾಡುತ್ತೇವೆ. ಯಾರನ್ನೋ ಗೆಲ್ಲಿಸಲು ಯಾರನ್ನೋ ಸೋಲಿಸಲು ಚುನಾವಣೆ ಮಾಡುವುದಿಲ್ಲ. ನಾವು ಗೆಲ್ಲಲು ಚುನಾವಣೆ ಎದುರಿಸುತ್ತೇವೆ. ಇನ್ನೊಬ್ಬರನ್ನು ಗೆಲ್ಲಿಸುವುದರಿಂದ ನಮಗೇನು ಲಾಭ? ಎಂದು ಓವೈಸಿ ತಿರುಗೇಟು ಕೊಟ್ಟರು.
ಇದನ್ನೂ ಓದಿ: ಹನುಮನ ಭಕ್ತರು ಈ 40% ಕಮಿಷನ್ ಸರ್ಕಾರದ ವಿರುದ್ಧ ಗದಾಪ್ರಹಾರ ನಡೆಸಲಿದ್ದಾರೆ: ಎಐಸಿಸಿ ವಕ್ತಾರ ಗೌರವ್ ವಲ್ಲಭ್
ಹಳೇ ಹುಬ್ಬಳ್ಳಿ ಗಲಭೆ ಪ್ರಕರಣದಲ್ಲಿ ಬಂಧನಕ್ಕೊಳಗಾದವರಲ್ಲಿ ಶೇ 90ರಷ್ಟು ಅಮಾಯಕರಿದ್ದಾರೆ. ಅವರನ್ನು ಸಮಾಜ ದ್ರೋಹಿಗಳು ಎಂದು ಕರೆಯುವ ಕಾಂಗ್ರೆಸ್ನವರು ಮತ ಕೇಳಲು ಹೋಗಬಾರದು ಎಂದರು.
ದೇಶದಲ್ಲಿ ಏಕರೂಪದ ನಾಗರಿಕ ಸಂಹಿತೆ ಜಾರಿ ವಿಚಾರವಾಗಿ ಮಾತನಾಡಿ, ಬೇರೆ ಬೇರೆ ರಾಜ್ಯಗಳಲ್ಲಿ ಬಿಜೆಪಿ ವಿವಿಧ ನಿಲುವು ಹೊಂದಿದೆ. ಮುಸ್ಲಿಂ ಸಮುದಾಯದ ಶೇ 4 ರಷ್ಟು ಮೀಸಲಾತಿ ತೆಗೆದು ಹಾಕಿದ್ದು ಕಾನೂನು ಬಾಹಿರ ಕ್ರಮ. ಬಿಜೆಪಿ ನೇತೃತ್ವದ ರಾಜ್ಯ ಸರ್ಕಾರ ಬಡ ಮುಸ್ಲಿಮರಿಗೆ ಸಿಗಬೇಕಿದ್ದ ಮೀಸಲಾತಿ ಕಿತ್ತುಕೊಂಡು, ಬೇರೆ ಸಮುದಾಯಗಳಿಗೆ ಹಂಚಿ ಅನ್ಯಾಯ ಮಾಡಿದೆ ಎಂದು ಕಿಡಿ ಕಾರಿದರು.
ದೇಶದ ಸಂವಿಧಾನದ ಪ್ರಥಮ ಪ್ರತಿಯಲ್ಲಿ ಟಿಪ್ಪು ಸುಲ್ತಾನ್ ಭಾವಚಿತ್ರವಿದೆ. ಅದನ್ನು ನಾನು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ತೋರಿಸುತ್ತೇನೆ. ಸಾಧ್ಯವಿದ್ದರೆ, ಟಿಪ್ಪು ಭಾವಚಿತ್ರ ಇರುವ ಸಂವಿಧಾನದ ಪ್ರತಿಯನ್ನು ತೆಗೆದು ಹಾಕಲಿ ನೋಡೋಣ ಎಂದರು.
ಇದನ್ನೂಓದಿ: ನಾಲಾಯಕ್, ವಿಷಕನ್ಯೆ, ಅರೆಹುಚ್ಚ, ವಿಷಸರ್ಪ..: ಬೈಗುಳ ರಾಜಕೀಯಕ್ಕೆ ಚು.ಆಯೋಗ ಹೇಳಿದ್ದೇನು?
