ಧಾರವಾಡ: ಜಿಲ್ಲೆಯಿಂದ ಹೊರಗಿರುವ ಮಾಜಿ ಸಚಿವ ವಿನಯ್ ಕುಲಕರ್ಣಿ ಪರವಾಗಿ ಮಾಜಿ ಮುಖ್ಯಮಂತ್ರಿ ಜಗದೀಶ್ ಶೆಟ್ಟರ್ ಪ್ರಚಾರ ನಡೆಸಿದರು. ಹುಬ್ಬಳ್ಳಿ ಅಗಸಿಯಿಂದ ಪ್ರಚಾರ ಕಾರ್ಯ ಆರಂಭಿಸಿದ ಅವರು ವಿನಯ್ ಪರ ಮತಯಾಚಿಸಿದರು.
ಬಳಿಕ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ವಿನಯ ಕುಲಕರ್ಣಿ ಪರ ಪತ್ನಿ ಶಿವಲೀಲಾ ಪ್ರಚಾರದ ನೇತೃತ್ವ ವಹಿಸಿದ್ದಾರೆ. ವಿನಯ ಕುಲಕರ್ಣಿ ನೇರವಾಗಿ ಬಂದು ಚುನಾವಣೆ ಪ್ರಚಾರ ಮಾಡಲು ತೊಂದರೆಯಾಗುತ್ತಿದೆ. ಇದು ಒಂದು ಷಡ್ಯಂತ್ರ ನಡೆದಿದೆ. ಅವರ ಆಪ್ತರ ಮೇಲೆ ಐಟಿ ದಾಳಿ ಮಾಡಲಾಗುತ್ತಿದೆ. ಪ್ರಜಾತಂತ್ರ ವ್ಯವಸ್ಥೆಯಲ್ಲಿ ಅವರ ಬೆಂಬಲಿಗರಿಗೆ ಪ್ರಚಾರ ಮಾಡಲು ಹಕ್ಕಿದೆ. ಯಾರ ಅವರ ಜೊತೆ ಇದ್ದಾರೆ ಅವರ ಮೇಲೆ ಐಟಿ ದಾಳಿ ನಡೆಸಿದ್ದರಿಂದ ಮಾನಸಿಕವಾಗಿ ಎಲ್ಲರೂ ಕುಗ್ಗಿದ್ದಾರೆ ಎಂದರು.
ಹೆದರಿಸುವ ತಂತ್ರ ನಡೆದಿದೆ. ಇದು ಬಹಳ ದಿನ ನಡೆಯಲ್ಲ, ಕೇಂದ್ರದಲ್ಲಿ ಅಧಿಕಾರ ಇದೆ ಎಂದು ಇಲ್ಲಿ ಒಬ್ಬ ಕೇಂದ್ರದ ಮಂತ್ರಿಗಳು ಈ ರೀತಿ ದಾಳಿ ಮಾಡಿಸುತಿದ್ದಾರೆ. ಇದು ಜನರಿಗೆ ಹೆದರಿಸುವ ಕೆಲಸ, ಆದರೆ ಇದನ್ನು ಮೆಟ್ಟಿ ನಿಂತು ಗ್ರಾಮೀಣದ ಜನ ಸ್ಪಷ್ಟವಾಗಿ ವಿನಯ್ ಅವರನ್ನು ವಿಶ್ವಾಸದಿಂದ ಆರಿಸಿ ತರಬೇಕು. ಈ ಎಲ್ಲದಕ್ಕೆ ಮತದಾರರು 13ಕ್ಕೆ ಉತ್ತರ ಕೊಡ್ತಾರೆ. ಐಟಿ ದಾಳಿ ಮಾಡಲು ಕೇಂದ್ರ ಸರ್ಕಾರ ಕಾರಣ. ಇದು ಐಟಿ ದಾಳಿ ಮಾಡುವ ಸಮಯವಲ್ಲ. ಚುನಾವಣೆ ಸಂದರ್ಭದಲ್ಲಿ ಮಾಡ್ತಾರೆ, ಭಯದಿಂದ ಯಾರು ಪ್ರಚಾರಕ್ಕೆ ಬರದಂತೆ ಮಾಡುವ ನೀತಿ ಇದು. ಇಲ್ಲಿ ಕೇಂದ್ರ ಸಚಿವರೇ ಇದಾರಲ್ಲ, ಅವರನ್ನು ಬಿಟ್ಟು ಯಾರು ಇದನ್ನು ಮಾಡಿಸ್ತಾರೆ ಎಂದು ದೂರಿದರು.
ಶೆಟ್ಟರ್, ಸವದಿ ಕಾಂಗ್ರೆಸ್ ಬಂದಿದ್ದಕ್ಕೆ ಲಿಂಗಾಯತ ಮತಗಳು ಕಾಂಗ್ರೆಸ್ ಕಡೆ ಬರಬಹುದಾ ಎಂಬ ವಿಚಾರಕ್ಕೆ ಮಾತನಾಡಿದ ಅವರು, ನಿನ್ನೆ ನಾನು ರೋಣ, ಹಾವೇರಿ ಗಜೇಂದ್ರಗಡ ಸೇರಿ ಹಲವು ಕಡೆ ಪ್ರಚಾರ ಮಾಡಿದ್ದೇನೆ. ಮಧ್ಯಾಹ್ನ ಹೋದರೆ ಬಿಸಿಲಲ್ಲೂ ಜನ ಸೇರಿದ್ರು, ಇದನ್ನು ನೋಡಿದರೆ ನಮಗೆ ಒಳ್ಳೆ ಬೆಂಬಲ ಸಿಗುತ್ತಿದೆ ಎಂಬುದು ಗೊತ್ತಾಗುತ್ತಿದೆ. ಲಿಂಗಾಯತ ಸಮಾಜಕ್ಕೆ ಅನ್ಯಾಯ ಆಗುವುದನ್ನು ನೋಡಿ ಎಲ್ಲರೂ ಬಿಜೆಪಿಯಿಂದ ಹೊರಗೆ ಬರುತಿದ್ದಾರೆ. ಬಹಳ ಕಡೆ ಕಾಂಗ್ರೆಸ್ ಸೇರಿದ್ದಾರೆ. ಬಿಜೆಪಿಯಲ್ಲಿ ನಾನು ಅನುಭವಿಸಿ ಹೊರ ಬಂದಿದ್ದೇನೆ. ಅಪಮಾನ ಮಾಡಿ ನನಗೆ ತೊಂದರೆ ಮಾಡಿದ್ದರಿಂದ ಹೊರಗೆ ಬಂದಿದ್ದೇನೆ. ನಾನು ಕಟ್ಟಿದ ಮನೆಯಿಂದ ಹೊರಗೆ ಹಾಕಿದ್ದಾರೆ.
ಕೇಂದ್ರದಲ್ಲಿ ಇನ್ನಿತರ ಸಮಾಜದ ಸಚಿವರು ಇದ್ದಾರೆ. ನಾರಾಯಣಸ್ವಾಮಿ ದಲಿತ ಜನಾಂಗದ ಸಂಸದ, ಅವರು ಅಲ್ಲಿ ರಾಜ್ಯಮಂತ್ರಿ, ಶೋಭಾ ಕರಂದ್ಲಾಜೆ ವಕ್ಕಲಿಗರು, ಅವರು ರಾಜ್ಯ ಮಂತ್ರಿ ಲಿಂಗಾಯತ ಸಮಾಜದ ಭಗವಂತ ಖೂಬಾ ರಾಜ್ಯ ಮಂತ್ರಿ ಇದ್ದಾರೆ. ಸುರೇಶ ಅಂಗಡಿ ಕೂಡಾ ರಾಜ್ಯ ಮಂತ್ರಿ ಇದ್ದರು. ರಾಜ್ಯದಿಂದ 15 ಸಂಸದರಲ್ಲಿ ಕ್ಯಾಬಿನೆಟ್ನಲ್ಲಿ ಇರುವವರಲ್ಲಿ ಒಬ್ಬರೇ ಪ್ರಹ್ಲಾದ್ ಜೋಶಿ. ಉಳಿದವರಿಗೆ ರಾಜ್ಯ ಮಂತ್ರಿ ಮಾಡಿದ್ದಾರೆ. ಇಲ್ಲೇ ತಾರತಮ್ಯ ಎದ್ದು ಕಾಣುತ್ತಿದೆ. ಇನ್ನೊಬ್ಬರು ರಾಜ್ಯ ಸಭೆಗೆ ಆಯ್ಕೆಯಾದವರು ನಿರ್ಮಲಾ ಸೀತಾರಾಮನ್. ಇದೆಲ್ಲಾ ನೋಡಿದರೆ ಬಿಜೆಪಿಯಲ್ಲಿ ಏನು ನಡೀತಿದೆ ಎಂದು ತೋರಿಸುತ್ತಿದೆ. ಬಿಜೆಪಿ ಯಾರ ಕೈಯಲ್ಲಿದೆ ಎಂದು ಕಾಣುತ್ತಿದೆ. ಉಳಿದ ಸಮಾಜದವರು ನೊಂದಿದ್ದಾರೆ. ಅದಕ್ಕೆ ತಕ್ಕ ಪಾಠ ಚುನಾವಣೆಯಲ್ಲಿ ಸಿಗಲಿದೆ ಎಂದರು.
ಲಿಂಗಾಯತ ಸಿಎಂ ಘೋಷಣೆ ವಿಚಾರ: ಬಿಜೆಪಿಯ ಹಣೆಬರಹ ಏನು ಹೇಳಲಿ. ಮೊದಲು ಮುಂದಿನ ಸಿಎಂ ಲಿಂಗಾಯತ ಎಂದು ಹೇಳಲು ಧೈರ್ಯ ಇದೆಯಾ ನಿಮಗೆ, ಇವತ್ತು ಬೊಮ್ಮಾಯಿ ಸಿಎಂ ಇದ್ದಾರೆ. ಮುಂದೆಯೂ ಲಿಂಗಾಯತರನ್ನೇ ಸಿಎಂ ಮಾಡುತ್ತೇವೆ ಎಂದು ಹೇಳಲು ಧೈರ್ಯ ಇದೆಯಾ? ಇದು ಒಂದು ಹಿಡನ್ ಅಜೆಂಡಾ. ಸಮುದಾಯ ಹೊರಗೆ ಇಟ್ಟು ಅದರ ಬೆಂಬಲ ಇಲ್ಲದೇ ಸರ್ಕಾರ ರಚನೆ ಮಾಡಲು ಹೊರಟಿದ್ದಾರೆ. ಅವಸರವೇ ಅಪಘಾತಕ್ಕೆ ಕಾರಣ ಅಂತಾರೆ. ಇದರಿಂದ ಬಿಜೆಪಿಗೆ ಅಪಘಾತ ಆಗಲಿದೆ ಕಾಂಗ್ರೆಸ್ಗೆ ಮೊದಲಿಗಿಂತ ಹೆಚ್ಚು ಬೆಂಬಲ ಸಿಗುತ್ತಿದೆ. ಕಾಂಗ್ರೆಸ್ ಅಧಿಕಾರಕ್ಕೆ ಬರಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.
ಬಜರಂಗದಳ ಬ್ಯಾನ್ ವಿಚಾರದ ಬಗ್ಗೆ ಮಾತನಾಡಿದ ಅವರು, ಬ್ಯಾನ್ ಮತ್ತು ಮತ್ತೊಂದು ಕೇಂದ್ರ ಸರ್ಕಾರ ಮಾಡುತ್ತದೆ. ವೀರಪ್ಪ ಮೊಯ್ಲಿ ಆಗಲೇ ಹೇಳಿಕೆ ಕೊಟ್ಟಿದ್ದಾರೆ. ಬಜರಂಗದಳ ಬ್ಯಾನ್ ವಿಚಾರ ಕಾಂಗ್ರೆಸ್ ಪಕ್ಷಕ್ಕೆ ಇಲ್ಲ ಎಂದಿದ್ದಾರೆ. ಇದನ್ನು ನಾನು ಪಕ್ಷದ ವೇದಿಕೆಯಲ್ಲಿ ಚರ್ಚೆ ಮಾಡುತ್ತೇನೆ, ಸದ್ಯ ಏನು ಮಾತನಾಡಲ್ಲ. ನಾನು ಹಿಂದೆ 20 ಸಾವಿರ ಲೀಡ್ನಿಂದ ಗೆದ್ದಿದ್ದೇನೆ. ಜನರ ಆಶೀರ್ವಾದ ನನ್ನ ಮೇಲಿದೆ.
ಕಾಂಗ್ರೆಸ್ ಕೆಸರು, ಅಲ್ಲಿಗೆ ಯಾಕೆ ಹೋಗಿದ್ದು ಎಂದು ಬೊಮ್ಮಾಯಿ ಹೇಳಿದ್ದಾರೆ. 2012ರಲ್ಲಿ ಬಿಜೆಪಿ ಕೆಜೆಪಿ ಆದಾಗ, ಇದೇ ಬೊಮ್ಮಾಯಿ ಯಡಿಯೂರಪ್ಪ ಅವರಿಗೆ ಕೈ ಕೊಟ್ಟಿದ್ರು. ಬಿಜೆಪಿಯಲ್ಲಿ ನನಗೆ ಭವಿಷ್ಯ ಇಲ್ಲ, ಕೆಜೆಪಿಯಲ್ಲಿ ಕೂಡಾ ಭವಿಷ್ಯ ಇಲ್ಲಾ ಎಂದು ವಿಚಾರ ಮಾಡಿದ್ದ ಬೊಮ್ಮಾಯಿ ಆಗ ಅವರೇ ಕಾಂಗ್ರೆಸ್ಗೆ ಹೊರಟಿದ್ರು, ಕ್ಷೇತ್ರ ಸಿಗದೇ ಅನಿವಾರ್ಯವಾಗಿ ಇಲ್ಲೇ ಉಳಿದು ಸಿಎಂ ಆಗಿದ್ದಾರೆ. ಬೊಮ್ಮಾಯಿ ಯಾವ ವಿಚಾರ ಧಾರೆಯಿಂದ ಬಂದವರು, ಅವರ ತಂದೆ ಸೋಷಿಯಲಿಸ್ಟ್ ಎಂ ಎನ್ ರಾಯ್ ಅವರ ತತ್ವದ ಮೇಲೆ ಬಂದವರು. ಬಸವರಾಜ ಬೊಮ್ಮಾಯಿ ಅವರ ತತ್ವದ ಮೇಲೆಯೇ ಬಂದವರು, ಇವತ್ತು ಬಿಜೆಪಿ ನಾಯಕರು ನಾನು ಪಕ್ಷ ಬಿಟ್ಟ ಬಗ್ಗೆ ಹೇಳ್ತಾರೆ. ತತ್ವ ಆದರ್ಶ ಬಿಜೆಪಿಗೆ ಎಲ್ಲಿದೆ, ತತ್ವಕ್ಕೆ ವ್ಯತರಿಕ್ತ ಇದ್ದ ಬೊಮ್ಮಾಯಿಗೆ ಸಿಎಂ ಮಾಡ್ತೀರಿ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಹಲವಾರು ಕ್ರಿಮಿನಲ್ ಕೇಸ್ಗಳಿರುವ ವ್ಯಕ್ತಿಗಳಿಗೆ ಟಿಕೆಟ್ ಕೊಡ್ತೀರಿ. ಸಿಡಿ ಪ್ರಕರಣ ಇರುವ 6 ಜನ ಮಂತ್ರಿಗಳಿಗೆ ಟಿಕೆಟ್ ಕೊಡ್ತೀರಿ. ಯಾವ ತತ್ವ ಉಳಿದಿದೆ ನಿಮ್ಮಲ್ಲಿ? 17 ಜನ ಶಾಸಕರು ಕಾಂಗ್ರೆಸ್ಗೆ ಬಂದಾಗ, ಅದು ಪಕ್ಷದ್ರೋಹ ಆಗಲಿಲ್ಲ, ಅಂತವರಿಗೆ ಟಿಕೆಟ್ ಕೊಟ್ಟು ಆರಿಸಿ ತಂದವರು, ಈಗ ಪ್ರಮಾಣಿಕತನಕ್ಕೆ ನೀರು ಬಿಟ್ಟಿದ್ದೀರಿ. ಜನ ಈ ಚುನಾವಣೆಯಲ್ಲಿ ತಕ್ಕ ಪಾಠ ಕಲಿಸಲಿದ್ದಾರೆ ಎಂದರು.
ಇದನ್ನೂ ಓದಿ: ರಾಜ್ಯದಲ್ಲಿ ಕಾಂಗ್ರೆಸ್ ಅಧಿಕಾರಕ್ಕೆ ತಂದರೆ ತಾಲಿಬಾನ್ ಮಾದರಿ ಸರ್ಕಾರ ಬಂದಂತೆ: ಪ್ರತಾಪ್ ಸಿಂಹ
