ದಾವಣಗೆರೆ: ಬದಲಾವಣೆ ಆಗಲು ಅವಕಾಶ ಇದೆ. ಅದನ್ನು ಬಿಟ್ಟು ಅಡ್ಡದಾರಿಯಲ್ಲಿ ಹೋಗಿ ಹಣ ಸಂಪಾದಿಸಿ ಹೀರೋ ಆಗೋಣ ಎಂದುಕೊಂಡಿದ್ರೇ ಬಿಟ್ಟು ಬಿಡಿ. ಇಲ್ಲ ಅಂದ್ರೆ ನಿಮ್ಮನ್ನು ಸರಿ ದಾರಿಗೆ ತರೋದು ನಮಗೆ ಗೊತ್ತಿದೆ ಎಂದು ಎಸ್ಪಿ ರಿಷ್ಯಂತ್ ಅವರು ರೌಡಿ ಶೀಟರ್ಗಳಿಗೆ ಖಡಕ್ ಎಚ್ಚರಿಕೆ ನೀಡಿದರು.
ನಗರದ ಹೈಸ್ಕೂಲ್ ಮೈದಾನದಲ್ಲಿ ರೌಡಿ ಶೀಟರ್ಗಳ ಪರೇಡ್ ನಡೆಸಿದ ಅವರು, ನೆರೆದಿದ್ದ ರೌಡಿಗಳಿಗೆ ಸರಿ ದಾರಿಯಲ್ಲಿ ನಡೆಯುವಂತೆ ಪಾಠ ಮಾಡಿದರು. ನಂತರ ಪಾಲಿಕೆ ಸದಸ್ಯ ಶ್ರೀನಿವಾಸ್ ಹಾಗೂ ಸಂತೋಷ್ ಎಂಬ ರೌಡಿ ಶೀಟರ್ಗಳನ್ನು ವಿಚಾರಿಸಿ ಮಾಹಿತಿ ಪಡೆದರು. ಅಲ್ಲದೆ, ಬಾಲ ಬಿಚ್ಚದಂತೆ ಸರಿ ದಾರಿಯಲ್ಲಿ ನಡೆಯುವಂತೆ ತಿಳಿ ಹೇಳಿದರು.
ಹೀಗೆ ಮುಂದುವರೆದ್ರೇ ನಾನು ಕೇಳಲ್ಲ: ರೌಡಿ ಶೀಟರ್ಗಳಿಗೆ ಮನವರಿಕೆ ಮಾಡಲು ಮಾತು ಆರಂಭಿಸಿದ ಎಸ್ಪಿ ರಿಷ್ಯಂತ್, ಅನಧಿಕೃತ ದಂಧೆಗಳನ್ನು ಮಾಡೋದು, ಹತ್ತು ಜನ ಹುಡುಗರನ್ನು ಹಿಂದೆ ಹಾಕಿಕೊಂಡು ಮೆರಿತೀನಿ ಅಂದ್ರೆ ನಾನು ಕೇಳಲ್ಲ. ಯಾವುದೇ ಗ್ಯಾಂಗ್ಗಳು ನಿಮಗೆ ಬೇಕಾಗಿಲ್ಲ. ನಿಮ್ಮ ಗ್ಯಾಂಗ್ ನಲ್ಲಿರುವ ಹುಡುಗರನ್ನು ಹಿಂದೆ ಹಾಕಿಕೊಂಡು ಹಾಳ್ ಮಾಡ್ಬೇಡಿ. ಹೀಗೆ ಮುಂದುವರೆದ್ರೇ ಯಾರನ್ನು ಕೂಡ ನಾವು ಬಿಡಲ್ಲ. ಎಲ್ರೂ ನೆನಪಿಟ್ಟುಕೊಳ್ಳಿ. ನೀವು ನಮ್ಮ ಲಿಸ್ಟ್ನಲ್ಲಿದ್ದಿರಾ, ಯಾರದ್ದೋ ಬೆಂಬಲ ಇಟ್ಕೊಂಡು ಹೀಗೆ ಮುಂದುವರೆದ್ರೇ ನಾನು ಕೇಳಲ್ಲ ಎಂದು ಖಡಕ್ ಆಗಿ ವಾರ್ನ್ ಮಾಡಿದರು.
