ದಾವಣಗೆರೆ: ಮಾಯಕೊಂಡ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಟಿಕೆಟ್ ಕೆ.ಎಸ್.ಬಸವರಾಜ್ (ಬಸವಂತಪ್ಪ) ಅವರ ಪಾಲಾದ ಬೆನ್ನಲ್ಲೇ ಮಹಿಳಾ ಆಕಾಂಕ್ಷಿ ಸವಿತಾ ಮಲ್ಲೇಶ್ ನಾಯಕ್ ಕಣ್ಣೀರು ಸುರಿಸಿದರು. "ನನಗೆ ಟಿಕೆಟ್ ತಪ್ಪಲು ಎಡಿಟ್ ಆದ ಫೋಟೋಗಳೇ ಕಾರಣ. ಎಐಸಿಸಿ, ಕೆಪಿಸಿಸಿಗೆ ಎಡಿಟೆಡ್ ಫೋಟೋ ತೋರಿಸಿ ಟಿಕೆಟ್ ತಪ್ಪಿಸಲಾಗಿದೆ" ಎಂದು ಅವರು ದೂರಿದರು. ಮಹಿಳೆಗೆ ಅಪಮಾನ, ಚಾರಿತ್ರ್ಯವಧೆ, ತೇಜೋವಧೆ ಮಾಡಲಾಗಿದ್ದು, ಟಿಕೆಟ್ಗಾಗಿ ಇಂಥ ಕೃತ್ಯ ನಡೆಸಿದ್ದು ಸರಿಯೇ ಎಂದು ಸ್ವಪಕ್ಷೀಯ ಮುಖಂಡರನ್ನು ಪ್ರಶ್ನಿಸಿದ್ದಾರೆ.
ಕಷ್ಟಪಟ್ಟು ಕೆಲಸ ಮಾಡಿದ್ದೇನೆ: "ನನಗೆ ಈ ಬೆಳವಣಿಗೆ ಆಘಾತ, ನೋವು ತಂದಿದೆ. ಮೂರು ವರ್ಷಗಳ ಕಾಲ ಕಷ್ಟಪಟ್ಟು ಕೆಲಸ ಮಾಡಿದ್ದೇನೆ. ಕಾರ್ಯಕರ್ತರು, ಅಭಿಮಾನಿಗಳು ನೊಂದಿದ್ದಾರೆ. ಮಹಿಳೆಯರಿಗೆ ನ್ಯಾಯ ಇಲ್ಲ, ಹೆಣ್ಣಾಗಿ ಹೊರಗೆ ಬರಬಾರದು. ಬಂದರೆ ಇಂಥ ಆರೋಪಗಳನ್ನು ಸಹಿಸಿಕೊಳ್ಳಬೇಕು. ರಾಜಕಾರಣದಲ್ಲಿ ಬೆಳೆಯುವುದು ಸುಲಭ ಅಲ್ಲ. ನನಗೆ ತುಂಬಾನೇ ಮೋಸ ಆಗಿದೆ. ಮೋಸ ಮಾಡಿ ಟಿಕೆಟ್ ಪಡೆದರೆ ಗೆಲ್ಲುತ್ತೇವೆ ಎಂಬುದು ಭ್ರಮೆ. ಜನರು ಇವರಿಗೆ ತಕ್ಕ ಪಾಠ ಕಲಿಸುವುದು ನಿಶ್ಚಿತ" ಎಂದು ಸವಿತಾ ಬಾಯಿ ಮಲ್ಲೇಶ್ ನಾಯಕ್ ಬೇಸರ ವ್ಯಕ್ತಪಡಿಸಿದರು.
ಇದನ್ನೂ ಓದಿ: ಕೈತಪ್ಪಿದ ಟಿಕೆಟ್.. ಕಾಂಗ್ರೆಸ್ ಜಿಲ್ಲಾಧ್ಯಕ್ಷ ಎಂ ಎಂ ಹಿರೇಮಠ್ ರಾಜೀನಾಮೆ, ಹಲವರಲ್ಲಿ ಅಸಮಾಧಾನ
ಪತಿಯಿಂದ ದೂರು ದಾಖಲು: ಇತ್ತೀಚೆಗೆ ಫೋಟೋಗಳು ವೈರಲ್ ಆಗಿರುವ ಸಂಬಂಧ ಸವಿತಾ ಬಾಯಿ ಅವರ ಪತಿ ಮಲ್ಲೇಶ್ ನಾಯಕ್ ದಾವಣಗೆರೆಯ ಸಿಇಎನ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲು ಮಾಡಿದ್ದರು.
ಇದನ್ನೂ ಓದಿ: ಕುರುಬರ ಸಮುದಾಯಕ್ಕೆ ಕಾಂಗ್ರೆಸ್ ಪಕ್ಷ ಅನ್ಯಾಯ ಮಾಡಿದೆ: ಸಿದ್ಧರಾಮಾನಂದಪುರ ಸ್ವಾಮೀಜಿ
