ಮಂಗಳೂರು: ಕೋವಿಡ್ ಆರ್ಭಟ ಜೋರಾಗಿ ಹಲವು ಸಮಸ್ಯೆಗಳನ್ನು ಸೃಷ್ಟಿಸಿದೆ. ಕೋವಿಡ್ ತಡೆಗೆ ರಾಜ್ಯದಲ್ಲಿ ಜನತಾ ಕರ್ಫ್ಯೂ ಜಾರಿಗೊಳಿಸಿ ಇದೀಗ ಲಾಕ್ಡೌನ್ ಜಾರಿಯಲ್ಲಿದೆ. ಅನೇಕ ಉದ್ಯಮಗಳ ಮೇಲೆ ಕೋವಿಡ್ ತನ್ನ ಪರಿಣಾಮ ಬೀರಿದೆ. ಇದೀಗ ಮಂಗಳೂರಿನಲ್ಲಿ ಹೋಂ ಸರ್ವೀಸ್ ಸೇವೆ ಕೂಡ ಸ್ಥಗಿತಗೊಂಡಿದೆ.
ಕೋವಿಡ್ ಭೀತಿ ಜೋರಾಗಿದೆ. ಜನರು ಮತ್ತೊಬ್ಬರತ್ತ ಸುಳಿಯಲು ಭಯ ಪಡುವಂತಾಗಿದೆ. ಮನೆಯ ಎಲೆಕ್ಟ್ರಾನಿಕ್ ವಸ್ತುಗಳು ಕೆಟ್ಟು ಹೋದರೆ ಅದನ್ನು ಸರಿಪಡಿಸಲು ಮನೆಗೆ ಬಂದು ಸೇವೆ ನೀಡುವವರು ಕೊರೊನಾ ಹಾವಳಿ ಸಂದರ್ಭದಲ್ಲಿ ಭಯದಿಂದಲೇ ಸೇವೆ ಸಲ್ಲಿಸುತ್ತಿದ್ದರು. ಆದ್ರೆ ಜನತಾ ಕರ್ಫ್ಯೂ, ಲಾಕ್ಡೌನ್ ಬಳಿಕ ಹೋಮ್ ಸರ್ವೀಸ್ ಕೂಡ ಬಂದ್ ಆಗಿದೆ.
ಮನೆಯಲ್ಲಿನ ಫ್ರಿಡ್ಜ್, ವಾಷಿಂಗ್ ಮಷಿನ್, ಎ.ಸಿ, ಮಿಕ್ಸರ್ ಗ್ರೈಂಡರ್, ಟಿವಿ, ಪಂಪ್ ಸೆಟ್ ಹೀಗೆ ಮೊದಲಾದ ಎಲೆಕ್ಟ್ರಾನಿಕ್ ಕೆಟ್ಟು ಹೋದರೆ ಆಯಾ ಕಂಪೆನಿಗಳ ಸೇವೆ ನೀಡುವ ಪ್ರತಿನಿಧಿಗಳು ಅಥವಾ ಮೆಕ್ಯಾನಿಕ್ಗಳು ಬಂದು ಸರಿಪಡಿಸಿ ಹೋಗುತ್ತಿದ್ದರು. ಕೊರೊನಾ ಎರಡನೇ ಅಲೆ ವ್ಯಾಪಕವಾದ ಬಳಿಕ ಈ ಸೇವೆ ನೀಡುವವರು ಆತಂಕದಲ್ಲಿಯೇ ಹೋಂ ಸರ್ವಿಸ್ ನೀಡುತ್ತಿದ್ದರು. ಆದರೆ ಕೊರೊನಾ ಲಾಕ್ಡೌನ್ ಬಳಿಕ ಇದು ಕೂಡ ನಿಂತಿದೆ.
ಕೊರೊನಾ ಲಾಕ್ಡೌನ್ ಕಟ್ಟು ನಿಟ್ಟಿನಲ್ಲಿ ನಡೆಯುತ್ತಿರುವುದರಿಂದ ಜನರ ಓಡಾಟಕ್ಕೆ ಪೊಲೀಸರು ಅವಕಾಶ ನೀಡುತ್ತಿಲ್ಲ. ಇದರ ನಡುವೆ ಹೋಂ ಸರ್ವಿಸ್ ಸೇವೆ ನೀಡುವ ಉಸಾಬರಿ ಬೇಡವೆಂದು ಹಲವು ಮಂದಿ ದೂರವಾಣಿಗೂ ಲಭ್ಯರಾಗುತ್ತಿಲ್ಲ.
ಇದನ್ನೂ ಓದಿ: ಆಯುಷ್ಮಾನ್ ಭಾರತ ಯೋಜನೆಯಡಿ ಕೋವಿಡ್ ಚಿಕಿತ್ಸೆಗೆ ಅವಕಾಶ ನೀಡಿ: ಹೆಚ್ಡಿಕೆ
ಇನ್ನೂ ಮನೆಗೆ ಅವಶ್ಯಕತೆ ಇರುವ ವಸ್ತುಗಳು ಕೆಟ್ಟು ಹೋಗುತ್ತಿರುವುದರಿಂದ ಅದನ್ನು ಸರಿಪಡಿಸಲಾಗದೆ ಹಲವರು ಸಂಕಷ್ಟದಲ್ಲಿದ್ದಾರೆ. ಒಟ್ಟಿನಲ್ಲಿ ಭೀತಿಯ ನಡುವೆ ಕಾರ್ಯಾಚರಿಸುತ್ತಿದ್ದ ಹೋಂ ಸರ್ವಿಸ್ ಸೇವೆ ಲಾಕ್ ಡೌನ್ ನಲ್ಲಿ ಸಂಪೂರ್ಣ ಲಾಕ್ ಆಗಿ ಜನರಿಗೆ ಸಂಕಷ್ಟ ತಂದಿದೆ.
