ಮಂಗಳೂರು (ದಕ್ಷಿಣ ಕನ್ನಡ): ಹೃದಯ ಕವಾಟು ಬದಲಿಸುವ ಚಿಕಿತ್ಸೆ ಬೈಪಾಸ್ ಸರ್ಜರಿಯ ಮೂಲಕ ನಡೆಯುವುದು ಸಾಮಾನ್ಯ. ಆದರೆ ಮಂಗಳೂರಿನಲ್ಲಿ ಕೀನ್ಯಾ ದೇಶದ ಮಹಿಳಾ ರೋಗಿಗೆ ಬೈಪಾಸ್ ಸರ್ಜರಿ ರಹಿತ ಹೃದಯ ಕವಾಟು ಬದಲಿ ಮಾಡುವ ಅಪರೂಪದ ಚಿಕಿತ್ಸೆ ಯಶಸ್ವಿಯಾಗಿ ನಡೆದಿದೆ.
ಕೀನ್ಯಾ ಮಹಿಳೆಗೆ ಹೃದಯ ಸಂಬಂಧಿ ಕಾಯಿಲೆ: ಕೀನ್ಯಾ ದೇಶದ 65 ವರ್ಷದ ಮಹಿಳೆಯೋರ್ವರು ಮೈಟ್ರಲ್ ವಾಲ್ವ್ ಎಂಬ ಹೃದಯ ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿದ್ದರು. 2014 ರಲ್ಲಿ ಈ ಮಹಿಳಾ ರೋಗಿ ಅಹಮದಾಬಾದ್ನಲ್ಲಿ ಬೈಪಾಸ್ ಹಾರ್ಟ್ ಸರ್ಜರಿಗೆ ಒಳಗಾಗಿದ್ದರು. ಆ ಸಂದರ್ಭದಲ್ಲಿ ಅವರ ಹೃದಯಕ್ಕೆ ಕೃತಕ ಕವಾಟನ್ನು ಅಳವಡಿಸಲಾಗಿತ್ತು. ಈ ಕೃತಕ ಕವಾಟು 8 ವರ್ಷಗಳ ಬಳಿಕ ಕಾರ್ಯ ನಿರ್ವಹಿಸಲು ಅಸಮರ್ಪಕ ಎನಿಸಿದೆ. ಪರಿಣಾಮ, ಮಹಿಳೆಯ ಹೃದಯ ಸಂಬಂಧಿ ಕಾಯಿಲೆ ಮತ್ತಷ್ಟು ಉಲ್ಭಣಗೊಂಡಿತ್ತು. ಇದರಿಂದಾಗಿ ಅವರಿಗೆ ತೀವ್ರ ತರವಾದ ಉಸಿರಾಟದ ಸಮಸ್ಯೆ ಮತ್ತು ತೀವ್ರ ರಕ್ತದೊತ್ತಡದ ಸಮಸ್ಯೆ ಕಾಣಿಸಿಕೊಳ್ಳತೊಡಗಿತು.
ಮಂಗಳೂರಿನ ಇಂಡಿಯಾನ ಆಸ್ಪತ್ರೆ: ಈ ಹಿನ್ನೆಲೆಯಲ್ಲಿ ಅವರು ಮೊದಲು ಶಸ್ತ್ರಚಿಕಿತ್ಸೆ ಮಾಡಿಕೊಂಡಿದ್ದ ಅಹಮದಾಬಾದ್ನ ಅದೇ ಆಸ್ಪತ್ರೆಗೆ ಭೇಟಿಯಾದಾಗ, ಅಲ್ಲಿನ ವೈದ್ಯರು ಪುನಃ ಬೈಪಾಸ್ ಸರ್ಜರಿಯನ್ನೇ ಮಾಡಬೇಕು. ಇದರ ಹೊರತು ಬೇರೆ ದಾರಿ ಇಲ್ಲ ಎಂದು ತಿಳಿಸಿದ್ದರು. ಎರಡನೇ ಬಾರಿ ನಡೆಯುವ ಬೈಪಾಸ್ ಸರ್ಜರಿ ಬಹಳ ಅಪಾಯಕಾರಿ. ಅದರಲ್ಲಿ ಬದುಕುಳಿಯುವ ಅವಕಾಶ ತೀರಾ ಕಡಿಮೆ ಇತ್ತು. ಈ ಅಪಾಯಕಾರಿ ಚಿಕಿತ್ಸೆಗೆ ಪರ್ಯಾಯವಾಗಿ ಚಿಕಿತ್ಸೆಯನ್ನು ಶೋಧ ಮಾಡಿದಾಗ ಈ ಹಿಂದೆ ಬೈಪಾಸ್ ಸರ್ಜರಿ ರಹಿತ ಹೃದಯ ಕವಾಟು ಬದಲು ಮಾಡಿದ ಮಂಗಳೂರಿನ ಇಂಡಿಯಾನ ಆಸ್ಪತ್ರೆ ಬಗ್ಗೆ ತಿಳಿದು ಆಸ್ಪತ್ರೆಯನ್ನು ಸಂಪರ್ಕಿಸಿದ್ದಾರೆ.
ಮಂಗಳೂರಿನಲ್ಲಿ ಯಶಸ್ವಿ ಚಿಕಿತ್ಸೆ: ಕೀನ್ಯಾ ದೇಶದ ಮಹಿಳೆಯನ್ನು ಪರೀಕ್ಷಿಸಿದ ಇಂಡಿಯಾನ ಆಸ್ಪತ್ರೆಯ ಡಾ. ಯೂಸುಫ್ ಕುಂಬ್ಳೆ ಮತ್ತು ತಂಡ ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ಬೈಪಾಸ್ ಸರ್ಜರಿ ರಹಿತ ಹೃದಯ ಕವಾಟು ಬದಲಿ ಶಸ್ತ್ರಚಿಕಿತ್ಸೆ ನಡೆಸಿದ್ದಾರೆ. ಬೈಪಾಸ್ ಶಸ್ತ್ರಚಿಕಿತ್ಸೆಗೆ ಒಳಗಾಗದೇ ಇಂಟರ್ ವೆನ್ಷನಲ್ ಟೆಕ್ನಿಜ್ ಮೂಲಕ (ಹಳೆಯ ಕವಾಟನ್ನು ತೆಗೆಯದೇ ಬೇರೆ ಕವಾಟನ್ನು ಅಳವಡಿಸುವ ಮಧ್ಯಂತರ ಪರ್ಯಾಯ ಚಿಕಿತ್ಸೆ) ಚಿಕಿತ್ಸೆಯನ್ನು ನಡೆಸಿದ್ದಾರೆ.
ಇದನ್ನೂ ಓದಿ: ವಿಜಯನಗರದಲ್ಲಿ ಕಲುಷಿತ ನೀರು ಸೇವಿಸಿ ಮಹಿಳೆ ಸಾವು : 40ಕ್ಕೂ ಹೆಚ್ಚು ಜನ ಅಸ್ವಸ್ಥ
ಈ ಬಗ್ಗೆ ಮಾತನಾಡಿದ ಇಂಡಿಯಾನ ಆಸ್ಪತ್ರೆ ಮುಖ್ಯಸ್ಥ ಡಾ. ಯೂಸುಫ್ ಕುಂಬ್ಳೆ ಅವರು, ಕವಾಟದೊಳಗೆ ಕವಾಟವನ್ನು ಅಳವಡಿಸುವ ಹೃದಯ ಚಿಕಿತ್ಸೆ ಕಾರ್ಯವಿಧಾನ ಅಪರೂಪದ್ದಾಗಿದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ಟ್ರಾನ್ಸ್ ಕ್ಯಾತಿಟರ್ ಪಲ್ಮ್ ನರಿ ವಾಲ್ವ್ ರಿಪ್ಲೇಸ್ಮೆಂಟ್ ಎಂದು ಹೇಳುತ್ತಾರೆ. ಯಾವುದೇ ಸರ್ಜರಿ ಮಾಡದೇ ಕಾಲಿನ ಮೂಲಕ ಕವಾಟವನ್ನು ಹೃದಯದಲ್ಲಿಗೆ ಕಳುಹಿಸಿ ಅಲ್ಲಿ ಅಳವಡಿಸುವ ಅಪರೂಪದ ಶಸ್ತ್ರಚಿಕಿತ್ಸೆ. ಈ ಹಿಂದೆ ಈ ಅಪರೂಪದ ಶಸ್ತ್ರ ಚಿಕಿತ್ಸೆ ಯಶಸ್ವಿಯಾಗಿ ಮಾಡಲಾಗಿತ್ತು. ಇದನ್ನು ತಿಳಿದು ಇದೀಗ ಬಂದಿರುವ ಕೀನ್ಯಾ ದೇಶದ ಮಹಿಳೆಗೂ ಯಶಸ್ವಿಯಾಗಿ ಚಿಕಿತ್ಸೆ ನಡೆಸಲಾಗಿದೆ ಎಂದು 'ಈಟಿವಿ ಭಾರತ'ಕ್ಕೆ ಅವರು ತಿಳಿಸಿದರು.
ಇದನ್ನೂ ಓದಿ: ರಾಷ್ಟ್ರೀಯ ಯುವಜನೋತ್ಸವಕ್ಕೆ ಸಿಂಗಾರಗೊಂಡ ಹುಬ್ಬಳ್ಳಿ: ಗಮನ ಸೆಳೆಯುತ್ತಿರುವ ಕಟೌಟ್ಗಳು
ಕಿನ್ಯಾ ಮಹಿಳೆಯಿಂದ ವೈದ್ಯರಿಗೆ ಕೃತಜ್ಞತೆ.. ಚಿಕಿತ್ಸೆಗೊಳಗಾದ ಮಹಿಳೆ ಕೂಡ ಆಸ್ಪತ್ರೆಗೆ ಧನ್ಯವಾದ ಸಲ್ಲಿಸಿದ್ದಾರೆ. ಕೇವಲ ಒಂದು ಗಂಟೆಯ ಅವಧಿಯಲ್ಲಿ ಈ ಅತ್ಯಾಧುನಿಕ ಚಿಕಿತ್ಸೆಯನ್ನು ಡಾ ಯೂಸುಫ್ ಕುಂಬ್ಳೆ ಮತ್ತು ತಂಡ ಮಾಡಿ ಮುಗಿಸಿದೆ. ಈ ಮೂಲಕ ಹೊಸ ಸಾಧನೆಯನ್ನು ಮಾಡಿದೆ.
