ಮಂಗಳೂರು : ತುಳುವನ್ನು ಸಂವಿಧಾನದ 8ನೇ ಪರಿಚ್ಛೇದಕ್ಕೆ ಸೇರಿಸುತ್ತೇವೆ ಎಂದು ತುಳು ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷರುಗಳು ಹೇಳಿದಾಕ್ಷಣ ಸೇರಿಸಲು ಸುಲಭ ಸಾಧ್ಯವಿಲ್ಲ. ಯಾರೂ ಈ ಬಗ್ಗೆ ಭ್ರಮೆಯಲ್ಲಿ ಬದುಕುವ ಅವಶ್ಯಕತೆ ಇಲ್ಲ, ಎಂದು ಜೆಎನ್ ಯು ಕನ್ನಡ ವಿಭಾಗದ ಮುಖ್ಯಸ್ಥ, ಹಿರಿಯ ವಿದ್ವಾಂಸ ಡಾ.ಪುರುಷೋತ್ತಮ ಬಿಳಿಮಲೆ ಹೇಳಿದರು.
ಮಂಗಳೂರಿನ ತುಳು ಜೋಕುಲೆ ಕೂಟ ಆಯೋಜಿಸಿರುವ "ಇಲ್ಲ ಜಾಲದ ಪಾತೆರಕತೆ" ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು ತುಳು ವಿದ್ವಾಂಸ ಡಾ. ವಿವೇಕ ರೈಗಳು ಹಿಂದೆ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷರಾಗಿದ್ದ ಕಾಲದಲ್ಲಿ ತುಳು ಭಾಷೆಯನ್ನು 8ನೇ ಪರಿಚ್ಛೇದಕ್ಕೆ ಯಾಕೆ ಸೇರಿಸಬಾರದು ಎಂದು ಕೇಂದ್ರ ಸರ್ಕಾರಕ್ಕೆ ಸಲ್ಲಿಸಲು ಸುಮಾರು 600 ಪುಟಗಳ ಮೆಮರಾಂಡಮನ್ನು ರಚಿಸಿದ್ದರು. ಅದನ್ನು ಅನುಮೋದಿಸಿ ಅಂದಿನ ಮುಖ್ಯಮಂತ್ರಿ ಎಸ್.ಎಂ ಕೃಷ್ಣರವರು ಕೇಂದ್ರ ಸರಕಾರಕ್ಕೆ ಸಲ್ಲಿಸಿದ್ದರು. ಅದು 2004ರವರೆಗೂ ಯಾರೂ ಕೇಳುವವರಿಲ್ಲದೆ ನೆನೆಗುದಿಗೆ ಬಿದ್ದಿತ್ತು, ಆ ಕಾಲದಲ್ಲಿ ಈ ಬಗ್ಗೆ ಕೇಂದ್ರ ಸರ್ಕಾರದಲ್ಲಿ ನಿಂತು ಮಾತನಾಡಬಲ್ಲ ಧರ್ಮಸ್ಥಳದ ಡಾ.ವೀರೇಂದ್ರ ಹೆಗ್ಗಡೆಯವರು, ಕೇಂದ್ರದ ಮಂತ್ರಿಯಾಗಿದ್ದ ಡಾ.ಎಂ.ವೀರಪ್ಪ ಮೊಯ್ಲಿ, ಆಸ್ಕರ್ ಫರ್ನಾಂಡೀಸ್ ಮುಂತಾದವರು ಚಕಾರತ್ತಿಲ್ಲ ಎಂದರು.
ಅಂದು ಯಾವುದೇ ಭಾಷೆ ಸಂವಿಧಾನದ 8ನೇ ಪರಿಚ್ಛೇದಕ್ಕೆ ಸೇರಬೇಕಾದರೆ ಅದು ರಾಜ್ಯದ ಅಧಿಕೃತ ಭಾಷೆಯಾಗಿರಬೇಕು ಎಂಬ ಕಾನೂನು ಇತ್ತು, ಆದ್ದರಿಂದ ತುಳುವನ್ನು ಕರ್ನಾಟಕ ರಾಜ್ಯವು ಅಧಿಕೃತ ಭಾಷೆಯೆಂದು ಪರಿಗಣಿಸಬೇಕಿತ್ತು, ನಮ್ಮ ದೇಶದ ಹೆಚ್ಚಿನ ರಾಜ್ಯಗಳು ಒಂದಕ್ಕಿಂತ ಅಧಿಕ ಭಾಷೆಯನ್ನು ರಾಜ್ಯದ ಅಧಿಕೃತ ಭಾಷೆಯೆಂದು ಒಪ್ಪಿದೆ, ಆದರೆ ಕರ್ನಾಟಕದಲ್ಲಿ ಕನ್ನಡ ಒಂದೇ ಅಧಿಕೃತ ಭಾಷೆಯಾಗಿದ್ದು, ತುಳುವನ್ನು ಈವರೆಗೆ ಅಧಿಕೃತ ಭಾಷೆಯೆಂದು ಒಪ್ಪಿಲ್ಲ ಎಂದು ಪುರುಷೋತ್ತಮ ಬಿಳಿಮಲೆ ಹೇಳಿದರು.
2006ರಲ್ಲಿ ತುಳುವನ್ನು ಸಂವಿಧಾನದ 8ನೇ ಪರಿಚ್ಛೇದಕ್ಕೆ ಸೇರಿಸಬೇಕೆಂಬ ಬಹುದೊಡ್ಡ ಅಭಿಯಾನ ನಡೆಯಿತು. ಇದೇ ಸಂದರ್ಭದಲ್ಲಿ ಬೋಡೋ, ಮೈಥಿಲಿ, ಸಂತಾಲಿ, ಡೋಗ್ರಿ ಭಾಷೆಗಳನ್ನು 8ನೇ ಪರಿಚ್ಛೇದಕ್ಕೆ ಸೇರಿಸಬೇಕೆಂಬ ಅಭಿಯಾನ ನಡೆಯುತ್ತಿತ್ತು, ಆದರೆ ತುಳು ಹೊರತು ಪಡಿಸಿ ಉಳಿದೆಲ್ಲಾ ಭಾಷೆಗಳಿಗೆ ರಾಜಕಾರಣಿಗಳ ಬೆಂಬಲವಿತ್ತು, ಆದರೆ ತುಳುವಿನ ಬಗ್ಗೆ ಮಾತನಾಡಲು ಅಂದಿನ ಸಂಸತ್ ಸದಸ್ಯ ಧನಂಜಯ ಕುಮಾರ್ ಮಾತ್ರ ಇದ್ದರು. ಹಾಗಾಗಿ ತುಳುವನ್ನು 8ನೇ ಪರಿಚ್ಛೇದದಿಂ ಬದಿಗಿರಿಸಲಾಯಿತು ಎಂದು ಖೇದ ವ್ಯಕ್ತಪಡಿಸಿದರು.
