ಮಂಗಳೂರು : ನಾಯಿಗಳ ದಾಳಿಯಿಂದಾಗಿ 10 ಕಾಡುಕುರಿಗಳು ಬಲಿಯಾಗಿ, ಐದು ಕಾಡುಕುರಿಗಳು ಗಾಯಗೊಂಡ ಘಟನೆ ಪಿಲಿಕುಳ ನಿಸರ್ಗಧಾಮದಲ್ಲಿ ಗುರುವಾರ ರಾತ್ರಿ ನಡೆದಿದೆ.
ರಾತ್ರಿ ವೇಳೆ 5 ನಾಯಿಗಳ ಹಿಂಡು ದಾಳಿ ನಡೆಸಿವೆ. ತಡೆಗೋಡೆ ಕುಸಿದಿರುವ ಭಾಗದಿಂದ ಒಳ ನುಸುಳಿರುವ ನಾಯಿಗಳ ಹಿಂಡು ಕಾಡುಕುರಿಗಳ ಮೇಲೆ ತೀವ್ರ ದಾಳಿ ನಡೆಸಿವೆ. ಪರಿಣಾಮ 10 ಕಾಡುಕುರಿಗಳು ಮೃತಪಟ್ಟಿವೆ. ಅಲ್ಲದೆ ಐದು ಕಾಡುಕುರಿಗಳು ಗಾಯಗೊಂಡಿವೆ. ಪಶುವೈದ್ಯಾಧಿಕಾರಿಗಳು ಗಾಯಗೊಂಡ ಕಾಡುಕುರಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದಾರೆ.
ಪಿಲಿಕುಳ ನಿಸರ್ಗಧಾಮ
ಈ ಕುರಿತು ಈಟಿವಿ ಭಾರತದೊಂದಿಗೆ ಮಾತನಾಡಿದ ಪಿಲಿಕುಳ ನಿರ್ದೇಶಕ ಜಯಪ್ರಕಾಶ್ ಭಂಡಾರಿ, ಪಿಲಿಕುಳದಲ್ಲಿ ಹಿಂದೆ ಕೇವಲ ನಾಲ್ಕೈದು ಕಾಡು ಕುರಿಗಳಿದ್ದವು, ಈಗ ಅವುಗಳ ಸಂಖ್ಯೆ 40 ರಷ್ಟು ಆಗಿದೆ. ಅವುಗಳಲ್ಲಿ ಕೆಲವನ್ನು ನಾವು ಕಾಡಿಗೆ ಬಿಡಬೇಕೆಂದು ಚಿಂತನೆ ನಡೆಸುತ್ತಿದ್ದೆವು, ಅಷ್ಟರಲ್ಲಿ ಈ ದಾಳಿ ನಡೆದಿದೆ. ಆದಷ್ಟು ಶೀಘ್ರದಲ್ಲಿ ಹತ್ತು ಕುರಿಗಳನ್ನು ಕಾಡಿಗೆ ಬಿಡಲಿದ್ದೇವೆ ಎಂದರು.
