ಮಂಗಳೂರು: ಸರ್ಜಿಕಲ್ ಗ್ಲೌಸ್ ಕಳುಹಿಸಿಕೊಡಲಾಗುತ್ತದೆ ಎಂದು 2,68,800 ರೂ. ಪಡೆದು ಬಳಿಕ ವಂಚಿಸಿದ ಆರೋಪದ ಮೇಲೆ ವ್ಯಕ್ತಿ ಮೇಲೆ ಸೈಬರ್ ಕ್ರೈಮ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಮಂಗಳೂರಿನ ಅತ್ತಾವರದಲ್ಲಿ ಕರ್ನಾಟಕ ಡೆಂಟಲ್ ಆ್ಯಂಡ್ ಸರ್ಜಿಕಲ್ ಎಂಬ ಸರ್ಜಿಕಲ್ ಮಾರಾಟದ ಮಳಿಗೆಯ ವ್ಯಾಟ್ಸ್ಆ್ಯಪ್ ಸಂಖ್ಯೆಗೆ ಏಪ್ರಿಲ್ 22ರಂದು ಸಂಜೆ 4 ಗಂಟೆಗೆ ಓಂ ಸಾಯಿ ಎಂಟರ್ ಪ್ರೈಸಸ್ ಕಂಪನಿಯಿಂದ 1 ಬಾಕ್ಸ್ ಗ್ಲೌವ್ಸ್ಗೆೆ ರೂ.358.4 ರಂತೆ ಒಟ್ಟು 750 ಬಾಕ್ಸ್ಗೆ ರೂ. 2,68,800 ಕೊಡುವುದಾಗಿ ಆಫರ್ ಬಂದಿದೆ.
ಇದನ್ನು ನಂಬಿದ ಅಂಗಡಿ ಮಾಲೀಕ ಅದೇ ದೂರವಾಣಿ ಸಂಖ್ಯೆಗೆ ಕರೆ ಮಾಡಿ ಮಾತನಾಡಿದ್ದಾರೆ. ಆಗ ಮುಂಗಡ ಹಣ ನೀಡಿ ನಿಮ್ಮ ವಸ್ತುಗಳನ್ನು ಕಳುಹಿಸಿಕೊಡುತ್ತೇವೆ ಎಂದು ಹೇಳಿದ್ದಾರೆ. ಅದರಂತೆ ಮರುದಿನ ಓಂ ಸಾಯಿ ಎಂಟರ್ ಪ್ರೈಸಸ್ನ ಐ.ಡಿ.ಎಫ್.ಸಿ ಖಾತೆಗೆ ನೆಟ್ ಬ್ಯಾಂಕಿಂಗ್ ಮೂಲಕ 25 ಸಾವಿರ ರೂ. ಕಳುಹಿಸಲಾಗಿತ್ತು.
ಏಪ್ರಿಲ್ 24ರಂದು ಮತ್ತೆ 1,09,400 ರೂ. ಹಣ ಕಳುಹಿಸಿದರೂ ಸರ್ಜಿಕಲ್ ಗ್ಲೌವ್ಸ್ ಬಾರದೇ ಇದ್ದುದರಿಂದ ಕರೆ ಮಾಡಿ ವಿಚಾರಿಸಿದಾಗ ಪೂರ್ತಿ ಹಣವನ್ನು ವರ್ಗಾಯಿಸುವಂತೆ ತಿಳಿಸಲಾಗಿದೆ. ಆದರೆ ಪೂರ್ತಿ ಹಣ ಕಳುಹಿಸಿದ ಬಳಿಕ ಪೋನ್ ಮಾಡಿದಾಗ ದೂರುದಾರರ ಪೋನ್ ನಂಬರ್ವನ್ನು ಬ್ಲಾಕ್ ಮಾಡಿ ವಂಚನೆ ಮಾಡಲಾಗಿದೆ ಎಂದು ಸೈಬರ್ ಕ್ರೈಮ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
