ಮಂಗಳೂರು: ಇಂಧನ ಉತ್ಪಾದನೆಯನ್ನು ಇತ್ತೀಚೆಗೆ ವಿವಿಧ ಮೂಲಗಳಿಂದ ನಡೆಸಲು ಸಾಧ್ಯವಾಗಿದೆ. ಇದೇ ರೀತಿಯಲ್ಲಿ ಆಹಾರ ಮತ್ತು ತರಕಾರಿ ತ್ಯಾಜ್ಯಗಳಿರುವ ಬಯೋ ವೇಸ್ಟ್ನಿಂದಲೂ ಬಯೋ ಗ್ಯಾಸ್ ಉತ್ಪಾದನೆ ಮಾಡಲಾಗುತ್ತದೆ. ಇದನ್ನು ಮಂಗಳೂರಿನ ಎನ್ಐಟಿಕೆ ಸಂಸ್ಥೆ ತನ್ನ ಪ್ಲಾಂಟ್ನಲ್ಲಿ ಆರಂಭಿಸುವ ಮೂಲಕ ಇಂಧನ ಬಳಕೆಯಲ್ಲಿ ಸ್ವಾವಲಂಬಿಯಾಗಲು ಮುಂದಾಗಿದೆ.
ಮಂಗಳೂರಿನ ಸುರತ್ಕಲ್ನಲ್ಲಿರುವ ಎನ್ಐಟಿಕೆಯಲ್ಲಿ ಬಯೋ ವೇಸ್ಟ್ ರೀಸೈಕ್ಲಿಂಗ್ ಪೈಲಟ್ ಘಟಕ ಆರಂಭಿಸಲಾಗಿದೆ. ನೈಸರ್ಗಿಕ ಸಂಪನ್ಮೂಲಗಳನ್ನು ಪರಿವರ್ತಿಸುವಲ್ಲಿ ಜಾಗತಿಕ ಮಟ್ಟದಲ್ಲಿ ಹೆಸರಾದ ಇಟಲಿಯ ಮೈರೆ ಟೆಕ್ನಿಮಾಂಟ್ ಗ್ರೂಪ್ ಮಂಗಳೂರಿನ ಎನ್ ಐ ಟಿ ಕೆ ಯಲ್ಲಿ ಬಯೋ ವೇಸ್ಟ್ ಪುನರ್ ಬಳಕೆ ಪೈಲಟ್ ಘಟಕ ಆರಂಭಿಸಿದೆ. ಮಂಗಳೂರಿನ ಎನ್ ಐ ಟಿ ಕೆಯಲ್ಲಿ ನಡೆದ ಸಮಾರಂಭದಲ್ಲಿ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಖಾತೆ ಸಚಿವ ಧರ್ಮೆಂದ್ರ ಪ್ರಧಾನ್ ವಿಡಿಯೋ ಮೂಲಕ ಉದ್ಘಾಟಿಸಿದರು.
ಈ ಬಯೋ ಗ್ಯಾಸ್ ಪೈಲಟ್ ಘಟಕವು ಕ್ಯಾಂಪಸ್ನೊಳಗೆ ಇಂಧನ ಸ್ವಾವಲಂಬನೆಯನ್ನು ಸಾಧಿಸುವುದಕ್ಕೆ ಮೀಸಲಾಗಿದೆ. ಎನ್ಐಟಿಕೆ ಕ್ಯಾಂಪಸ್ನೊಳಗೆ ಇರುವ ಕ್ಯಾಂಟೀನ್ ಮತ್ತು ಹಾಸ್ಟೆಲ್ ಬ್ಲಾಕ್ಗಳಲ್ಲಿ ಉತ್ಪಾದನೆಯಾಗುವ ಆಹಾರ ಮತ್ತು ತರಕಾರಿ ತ್ಯಾಜ್ಯಗಳನ್ನು ಬಳಸಿ ಬಯೋ ಗ್ಯಾಸ್ ಉತ್ಪಾದನೆ ಮಾಡಲಿದೆ.
ಇದನ್ನೂ ಓದಿ: ವಿಮ್ಸ್ನಲ್ಲಿ ವಿಕಿರಣ ಚಿಕಿತ್ಸಾ ವಿಭಾಗ ಪುನಾರಂಭ: ತಪ್ಪಿತು ಕ್ಯಾನ್ಸರ್ ರೋಗಿಗಳ ಅಲೆದಾಟ
ಎನ್ಐಟಿಕೆ ಕ್ಯಾಂಪಸ್ನಲ್ಲಿ ಪ್ರತಿದಿನ 500 ಕೆ ಜಿ ಯಷ್ಟು ಬಯೋ ತ್ಯಾಜ್ಯ ಉತ್ಪಾದಿಸುತ್ತದೆ. ಈ ತ್ಯಾಜ್ಯದಿಂದ ವಾರ್ಷಿಕವಾಗಿ 35,400 ಯೂನಿಟ್ ವಿದ್ಯುತ್ ಉತ್ಪಾದನೆ ಮಾಡುವಷ್ಟು ಬಯೋ ಗ್ಯಾಸ್ ಉತ್ಪಾದಿಸಲಾಗುತ್ತದೆ. ಈ ಬಯೋ ಗ್ಯಾಸ್ನನ್ನು ಎನ್ಐಟಿಕೆಯ ಹಾಸ್ಟೆಲ್ ಮತ್ತು ಕ್ಯಾಂಟೀನ್ನಲ್ಲಿ ಉಪಯೋಗಿಸುವ ಗ್ಯಾಸ್ಗೆ ಪರ್ಯಾಯವಾಗಿ ಬಳಸಲು ನಿರ್ಧರಿಸಲಾಗಿದೆ. ಇದರಿಂದಾಗಿ ವಾರ್ಷಿಕವಾಗಿ ಎನ್ಐಟಿಕೆಗೆ 2.42 ಲಕ್ಷ ರೂಪಾಯಿ ಉಳಿತಾಯವಾಗಲಿದೆ ಎಂದು ಅಂದಾಜಿಸಲಾಗಿದೆ.
