ಚಿಕ್ಕಮಗಳೂರು: ಹದಿನೈದು ಎಕರೆ ವಿಸ್ತಾರವಾದ ಜಿಲ್ಲಾ ಕಾರಾಗೃಹದಲ್ಲಿ ಸುಮಾರು 269 ವಿಚಾರಣಾಧೀನ ಕೈದಿಗಳಿದ್ದಾರೆ. ಇವರಲ್ಲಿ ಸುಮಾರು 160 ಕ್ಕೂ ಹೆಚ್ಚು ಕೈದಿಗಳಿರುವುದು ಪೋಕ್ಸೋ ಪ್ರಕರಣದಲ್ಲಿ ಬಂಧಿತರಾದವರು ಎಂಬುದು ಆತಂಕಕಕ್ಕೆ ಕಾರಣವಾಗಿದೆ.
ಜಿಲ್ಲೆಯ ಶೃಂಗೇರಿಯಲ್ಲಿ 10 ನೇ ತರಗತಿ ವಿದ್ಯಾರ್ಥಿನಿ ಮೇಲೆ ಮೂರು ತಿಂಗಳ ಅವಧಿಯಲ್ಲಿ ಲೈಂಗಿಕ ದೌರ್ಜನ್ಯ ನಡೆಸಿದ ಆರೋಪಿಗಳೇ 50ಕ್ಕೂ ಹೆಚ್ಚು ಜನರಿದ್ದಾರೆ. ಇನ್ನುಳಿದಂತೆ ಜಿಲ್ಲೆಯ ಬೇರೆ-ಬೇರೆ ಭಾಗದ ಪೋಕ್ಸೋ ಕೇಸಲ್ಲಿ ಬಂಧಿತರಾಗದವರೇ 100 ಕ್ಕೂ ಹೆಚ್ಚು ಜನರಿದ್ದಾರೆ. ಅಂದು ಹೆಸರು-ಮರ್ಯಾದೆ ಎರಡೂ ಹಾಳಾಗುವಂತಹ ಮಣ್ಣು ತಿನ್ನುವ ಕೆಲಸ ಮಾಡಿದವರು ಇಂದು ಜೈಲಲ್ಲಿ ಪಶ್ಚಾತ್ತಾಪ ಪಡುತ್ತಿದ್ದಾರೆ.
ಮಲೆನಾಡು ಭಾಗದಲ್ಲೇ ಹೆಚ್ಚಳ: ಜೈಲಿನಲ್ಲಿರುವ ಆ 160 ಪೋಕ್ಸೋ ಪ್ರಕರಣದ ಕೈದಿಗಳಲ್ಲಿ ಮಲೆನಾಡಿಗರೇ ಹೆಚ್ಚು ಅನ್ನೋದು ಮತ್ತೊಂದು ಆತಂಕಕಾರಿ ಬೆಳವಣಿಗೆ. ಅರಣ್ಯ ಹಾಗೂ ಅರಣ್ಯದಂತಹ ಕಾಫಿ ತೋಟಗಳೇ ಹೆಚ್ಚಾಗಿರುವ ಮಲೆನಾಡು ಭಾಗದಲ್ಲೇ ಪೋಕ್ಸೋ ಪ್ರಕರಣಗಳು ಹೆಚ್ಚು ದಾಖಲಾಗಿವೆ. ಇವರಲ್ಲಿ ಬೇರೆ-ಬೇರೆ ಊರುಗಳಿಂದ ದುಡಿಮೆ ಅರಸಿ ಬರುವ ಆರೋಪಿಗಳೂ ಇದ್ದಾರೆ. ಹಾಗಾಗಿ, ಜನ ಕೂಡ ಮಕ್ಕಳ ಬಗ್ಗೆ ಎಚ್ಚರದಿಂದಿರಬೇಕಾಗಿದೆ. ಈ ಮಧ್ಯೆ ಜೈಲಿನಲ್ಲಿ ಪಶ್ಚಾತ್ತಾಪ ಪಡುತ್ತಿರುವ ಕೈದಿಗಳ ಮನ ಪರಿವರ್ತನೆಯ ಕಾರ್ಯ ನಡೆಯುತ್ತಿದೆಯಂತೆ.
'ಕೈದಿಗಳದ್ದು ಏನೇ ಅಪರಾಧದ ಹಿನ್ನೆಲೆ ಇರಬಹುದು. ಆದರೆ ನಾವು ಅವರನ್ನು ಮಾನವೀಯ ನೆಲೆಗಟ್ಟಿನಲ್ಲೇ ನೋಡುತ್ತೇವೆ. ಹಾಗಾಗಿ ಅವರು ಈ ಕಾರಾಗೃಹಕ್ಕೆ ಬಂದ ನಂತರ ಮನಪರಿವರ್ತನೆ ಕಾರ್ಯಕ್ರಮಗಳನ್ನು ಕೈಗೊಳ್ಳುತ್ತೇವೆ. ಹಾಗೆಯೇ, ಅವರಿಗೆ ಯೋಗ, ಧ್ಯಾನ ಮುಂತಾದ ಚಟುವಟಿಕೆಗಳಲ್ಲಿ ಅವರನ್ನು ತೊಡಗಿಸಿ ಸ್ವಾಸ್ಥ್ಯ ಸಮಾಜದ ನಿರ್ಮಾಣಕ್ಕೆ ಸಹಾಯಕವಾಗುವಂತೆ ತರಬೇತಿ ನೀಡುತ್ತಿದ್ದೇವೆ' ಎಂದು ಜೈಲರ್ ರಾಕೇಶ್ ಕಾಂಬಳೆ ಹೇಳಿದರು.
ಓದಿ: ಮದ್ಯ ಕುಡಿಯಲು ಹಣ ನೀಡದ್ದಕ್ಕೆ ಸಿಟ್ಟು.. ಮೈಸೂರಲ್ಲಿ ಸಾಕು ತಾಯಿಯನ್ನ ಕೊಚ್ಚಿ ಕೊಂದ ಮಗ!
