ಲೋಕಲ್​ ಕಣದ ಫಲಿತಾಂಶ: ಚಿಕ್ಕಬಳ್ಳಾಪುರ ಜಿಲ್ಲೆಯ ಎರಡು ನಗರಸಭೆಗಳು ಅತಂತ್ರ

ಚಿಂತಾಮಣಿ ಹಾಗೂ ಗೌರಿಬಿದನೂರು ನಗರಸಭೆಯ ಫಲಿತಾಂಶಗಳು ಅತಂತ್ರ ಸ್ಥಿತಿಗೆ ತಲುಪಿದ್ದು, ನಗರಸಭೆಯ ಅಧಿಕಾರ ಯಾರ ಪಾಲಾಗಲಿದೆ ಎಂಬುದು ಎಲ್ಲರಲ್ಲೂ ಕುತೂಹಲ ಕೆರಳಿಸಿದೆ.

ಚಿಕ್ಕಬಳ್ಳಾಪುರ: ಜಿಲ್ಲೆಯ ಎರಡು ನಗರಸಭೆಯ ಚುನಾವಣೆಯ ಫಲಿತಾಂಶ ಇಂದು ಪ್ರಕಟವಾಗಿದೆ. ಚಿಂತಾಮಣಿ ಹಾಗೂ ಗೌರಿಬಿದನೂರು ನಗರಸಭೆಯ ಫಲಿತಾಂಶಗಳು ಅತಂತ್ರ ಸ್ಥಿತಿಗೆ ತಲುಪಿದ್ದು, ನಗರಸಭೆಯ ಅಧಿಕಾರ ಯಾರ ಪಾಲಾಗಲಿದೆ ಎಂಬುದು ಬಹಳ ಕುತೂಹಲ ಮೂಡಿಸಿದೆ.

ಚಿಂತಾಮಣಿ ನಗರಸಭೆಯಲ್ಲಿ ಹಾಲಿ ಮತ್ತು ಮಾಜಿ ಶಾಸಕರ ನಡುವಿನ ಪೈಪೋಟಿ ಫಲಿತಾಂಶದಲ್ಲೂ ಒಂದೇ ಆಗಿದ್ದು, ಅತಂತ್ರ ಸ್ಥಿತಿಗೆ ತೆರಳಿದೆ. ಜೆಡಿಎಸ್ ಪಕ್ಷ 14, ಭಾರತೀಯ ಪ್ರಜಾ ಪಕ್ಷ 14, ಕಾಂಗ್ರೆಸ್ 1, ಪಕ್ಷೇತರ 2 ಸ್ಥಾನಗಳನ್ನು ಪಡೆದುಕೊಂಡಿದ್ದರೆ ಬಿಜೆಪಿ ಶೂನ್ಯ ಸಾಧನೆ ಮಾಡಿದೆ. ಒಟ್ಟಾರೆ ಚಿಂತಾಮಣಿ ನಗರಸಭೆ ಯಾರ ಪಾಲಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಇನ್ನು ಗೌರಿಬಿದನೂರು ನಗರಸಭೆಯ 31 ವಾರ್ಡ್​ಗಳ ಚುನಾವಣೆಯ ಫಲಿತಾಂಶ ಸಹ ಅತಂತ್ರ ಸ್ಥಿತಿಯಲ್ಲಿದ್ದು,‌ ಕಾಂಗ್ರೆಸ್ 15 ,ಜೆಡಿಎಸ್ 7, ಪಕ್ಷೇತರ 6, ಬಿಜೆಪಿ 3 ಸ್ಥಾನಗಳನ್ನು ಪಡೆದುಕೊಂಡಿದೆ.

ಹಾಲಿ, ಮಾಜಿ ಶಾಸಕರು ನಗರಸಭೆ ಯಾರ ಪಾಲಿಗಲಿದೆ ಎಂಬ ಚರ್ಚೆಯಲ್ಲಿ ಮುಳುಗಿದ್ದರೆ. ಇತ್ತ ಗೆದ್ದ ಅಭ್ಯರ್ಥಿಗಳು ವಿಜಯೋತ್ಸವವನ್ನು ಆಚರಿಸಿಕೊಂಡು ಬೀಗಿದ್ದಾರೆ.