ಟೊಮೆಟೊ ಆರಿಸಿಕೊಳ್ಳಲು ಹೋದವಳ ಮೇಲೆ ಹರಿದ ವಾಹನ: ಸ್ಥಳದಲ್ಲೇ ಮಹಿಳೆ ಸಾವು

ಕೆಳಗೆ ಬಿದ್ದಿರುವ ಟೊಮೆಟೊ ಆರಿಸಿಕೊಳ್ಳುವಾಗ, ಮಹಿಳೆ ಮೇಲೆ ವಾಹನ ಹರಿದ ಪರಿಣಾಮ ಸ್ಥಳದಲ್ಲೇ ಸಾವನ್ನಪ್ಪಿರುವ ಘಟನೆ ಚಿಂತಾಮಣಿ ಎಪಿಎಂಸಿ ಮಾರುಕಟ್ಟೆಯಲ್ಲಿ ನಡೆದಿದೆ.

ಚಿಂತಾಮಣಿ: ನಗರದ ಎಪಿಎಂಸಿ ಮಾರುಕಟ್ಟೆಯಲ್ಲಿ ಕೆಳಗೆ ಬಿದ್ದ ಟೊಮೆಟೊಗಳನ್ನು ಆರಿಸಿಕೊಳ್ಳಲು ಬಂದಿದ್ದ ಮಹಿಳೆಯ ಮೇಲೆ ಈಚರ್ ವಾಹನ ಹರಿದ ಪರಿಣಾಮ ಮಹಿಳೆ ಸ್ಥಳದಲ್ಲೇ ಮೃತಪಟ್ಟಿರುವ ಘಟನೆ ನಡೆದಿದೆ. ನಗರದ ಜೆ.ಜೆ ಕಾಲೋನಿಯ ನಿವಾಸಿ ಗಂಗಮ್ಮ (55) ಮೃತ ದುರ್ದೈವಿ.

ಎಪಿಎಂಸಿ ಮಾರುಕಟ್ಟೆಯಲ್ಲಿ ಕೆಳಗೆ ಬಿದ್ದಿರುವ ಟೊಮೆಟೊವನ್ನು ಮಹಿಳೆ ಆರಿಸಿಕೊಳ್ಳುವಾಗ ಈ ದುರ್ಘಟನೆ ನಡೆದಿದೆ. ಚಾಲಕ ತನ್ನ ವಾಹನ ಲೋಡ್ ಮಾಡಲು ಮುಂದೆ ಬಂದಾಗ ವಾಹನದ ಕೆಳಗೆ ಟೊಮೊಟೊ ಆರಿಸಿಕೊಳ್ಳುತ್ತಿದ್ದ ಮಹಿಳೆಯ ಮೇಲೆ ಮುಂದಿನ ಚಕ್ರ ಹರಿದ ಪರಿಣಾಮ ಮಹಿಳೆ ಸ್ಥಳದಲ್ಲೇ ಸಾವನ್ನಪ್ಪಿದ್ದಾಳೆ.

ಇನ್ನೂ ಟೊಮೊಟೊ ಹಣ್ಣುಗಳು ಆಯ್ದು ಮಾರಾಟ ಮಾಡುವ ಸಲುವಾಗಿ ನಿತ್ಯ ಹಲವರು ವಾಹನಗಳ‌ ಕೆಳಗೆ ಟೊಮೊಟೊ ಆರಿಸಿಕೊಳ್ಳುತ್ತಿರುತ್ತಾರೆ. ಇಂತಹ ದುರ್ಘಟನೆಗಳು ನಡೆಯದಂತೆ ಸೂಕ್ತ ಕ್ರಮ ವಹಿಸುವಂತೆ ರೈತರು ಆಗ್ರಹಿಸಿದ್ದಾರೆ. ಸ್ಥಳಕ್ಕೆ ನಗರ ಠಾಣೆಯ ಪೊಲೀಸರು ಭೇಟಿ ನೀಡಿ ಮೃತದೇಹವನ್ನು ಸಾರ್ವಜನಿಕರ ಆಸ್ಪತ್ರೆಯ ಶವಾಗಾರಕ್ಕೆ ರವಾನಿಸಿದ್ದು, ಮುಂದಿನ ಕ್ರಮ ಕೈಗೊಂಡಿದ್ದಾರೆ.