ಚಾಮರಾಜನಗರ: ಗಂಡನನ್ನು ಸಹೋದರರ ಜೊತೆಗೂಡಿ ಹೆಂಡತಿಯೇ ಕೊಲೆ ಮಾಡಿರುವ ಘಟನೆ ಮೈಸೂರಿನ ವಿಜಯನಗರ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ಕೊಳ್ಳೇಗಾಲದ ನಿವಾಸಿ ನಾಗೇಂದ್ರಸ್ವಾಮಿ ಎಂಬುವರ ಮಗ ಸುಬ್ರಹ್ಮಣ್ಯ ಕೊಲೆಯಾದ ವ್ಯಕ್ತಿ. ಮೈಸೂರಿನ ವಿಜಯನಗರ ನಿವಾಸಿಯಾದ ಪತ್ನಿ ರಶ್ಮಿ ಮತ್ತು ಆಕೆಯ ಮೂವರು ಸಹೋದರರು ಕೊಲೆ ಆರೋಪ ಹೊತ್ತವರಾಗಿದ್ದಾರೆ.
ವಿಚ್ಛೇದಿತ ರಶ್ಮಿಯನ್ನು ಸುಬ್ರಹ್ಮಣ್ಯ ಫೇಸ್ಬುಕ್ ಮೂಲಕ ಪರಿಚಯವಾಗಿ ಅದು ಪ್ರೀತಿಗೆ ತಿರುಗಿತ್ತು. ಕೆಲವು ವರ್ಷಗಳ ಹಿಂದೆ ಇಬ್ಬರೂ ಮದುವೆಯಾಗಿ ಸಂಸಾರ ನಡೆಸುತ್ತಿದ್ದರು. ತವರು ಮನೆಯವರು ಆಸ್ತಿ ಮಾರಿ ರಶ್ಮಿ ಪಾಲಿನ 1.10 ಕೋಟಿ ರೂ. ಹಣವನ್ನು ಆಕೆಯ ಬ್ಯಾಂಕ್ ಖಾತೆಗೆ ಹಾಕಿದ್ದರು. ಈ ವಿಚಾರ ತಿಳಿದ ಸುಬ್ರಹ್ಮಣ್ಯ ಷೇರು ಮಾರುಕಟ್ಟೆಯಲ್ಲಿ ಹಣ ಹೂಡುತ್ತೇನೆಂದು ಹಣ ಪಡೆದು 83 ಲಕ್ಷ ರೂ.ಗಳನ್ನು ಪಡೆದು ನಷ್ಟ ಹೊಂದಿದ್ದ ಎನ್ನಲಾಗಿದೆ.
83 ಲಕ್ಷ ಹಣದ ವಿಚಾರಕ್ಕೆ ಗಂಡ-ಹೆಂಡಿರ ನಡುವೆ ಪದೇ ಪದೆ ಜಗಳವಾಗುತ್ತಿತ್ತಂತೆ. ಬಳಿಕ, ನ್ಯಾಯ ಪಂಚಾಯಿತಿ ಮೂಲಕ ನಾಗೇಂದ್ರಸ್ವಾಮಿ ತಂದೆ ಆಸ್ತಿ ಮಾರಿ ಹಣ ಕೊಡಬೇಕೆಂದು ನಿರ್ಧಾರವಾಗಿತ್ತು. ಆದರೆ, ನಾಗೇಂದ್ರಸ್ವಾಮಿ ಮನೆಯವರು ತಲೆ ಕೆಡಿಸಿಕೊಳ್ಳದಿದ್ದರಿಂದ ಕುಪಿತಗೊಂಡ ರಶ್ಮಿ, ತನ್ನ ಸಹೋದರರಾದ ರಾಕೇಶ್, ರಾಕೇಶ್ ಪಡಗೂರು ಹಾಗೂ ಪ್ರದೀಪ್ ಎಂಬುವರ ಜೊತೆಗೂಡಿ ಜ. 10ರಂದು ಸುಬ್ರಹ್ಮಣ್ಯನ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ್ದರು ಎನ್ನಲಾಗಿದೆ. ಗಂಭೀರವಾಗಿ ಗಾಯಗೊಂಡ ಸುಬ್ರಹ್ಮಣ್ಯನನ್ನು ಮೈಸೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಜ. 26ರಂದು ಆತ ಮೃತಪಟ್ಟಿದ್ದರಿಂದ ತಂದೆ ನಾಗೇಂದ್ರಸ್ವಾಮಿ ಮೈಸೂರಿನ ವಿಜಯನಗರ ಠಾಣೆಯಲ್ಲಿ ದೂರು ನೀಡಿದ್ದಾರೆ.
ತನ್ನ ಮನೆಗೆ ಬಂದು ದಾಂಧಲೆ ನಡೆಸಿ ಮಗನನ್ನು ಅಪಹರಿಸಿ ಉಗುರು ಕಿತ್ತು ಚಿತ್ರಹಿಂಸೆ ನೀಡಿ ಕೊಲೆ ಮಾಡಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ. ಸದ್ಯ, ವಿಜಯನಗರ ಸಿಪಿಐ ಬಾಲಕೃಷ್ಣ, ರಶ್ಮಿ ಸೇರಿದಂತೆ ಐವರು ಆರೋಪಿಗಳನ್ನು ಬಂಧಿಸಿ ವಿಚಾರಣೆ ಕೈಗೊಂಡಿದ್ದಾರೆ.
