ಚಾಮರಾಜನಗರ: ಅರ್ಧ ತಾಸು ವಿದ್ಯುತ್ ಕೈ ಕೊಟ್ಟರೆ ಪರಿತಪಿಸುವವರ ನಡುವೆ ಭಾರತ ಸ್ವತಂತ್ರಗೊಂಡ ಮುಕ್ಕಾಲು ಶತಮಾನದ ಬಳಿಕ ಚಾಮರಾಜನಗರದ ಪೌರ ಕಾರ್ಮಿಕರ ಕಾಲೊನಿ ವಿದ್ಯುತ್ ಬೆಳಕು ಪಡೆದಿದೆ.
ಚಾಮರಾಜನಗರ ನಗರಸಭೆ ವ್ಯಾಪ್ತಿಯ 9 ನೇ ವಾರ್ಡಿನಲ್ಲಿರುವ ಪೌರ ಕಾರ್ಮಿಕರ ಕಾಲೋನಿಯು 75 ವರ್ಷಗಳ ಬಳಿಕ ಬೀದಿದೀಪ ಕಂಡಿದೆ. ಈ ಕಾಲೋನಿಯಲ್ಲಿ 90ಕ್ಕೂ ಹೆಚ್ಚು ಮನೆಗಳಿದ್ದು, ನಾಲ್ಕು ಬೀದಿಗಳಿಗೆ ಕೇವಲ ಎರಡು ಕಂಬಗಳ ಮೂಲಕ ಮನೆಗಳಿಗೆ ವಿದ್ಯುತ್ ಸಂಪರ್ಕ ಕಲ್ಪಿಸಲಾಗಿತ್ತು. ಬೀದಿ ದೀಪಗಳಿಲ್ಲದೆ ಸಂಜೆ 7 ಗಂಟೆಯಾದರೆ ಯಾರೂ ಓಡಾಡಲಾಗದ ಭಯದ ವಾತಾವರಣ ನಿರ್ಮಾಣವಾಗುತ್ತಿತ್ತು.
ಇದನ್ನೂ ಓದಿ: ಜಾಗದ ವಿಚಾರ.. ನ್ಯಾಯಕ್ಕಾಗಿ ಅಧಿಕಾರಿಗಳ ಮುಂದೆಯೇ ವಿಷ ಸೇವಿಸಿದ ಯುವಕ- ವಿಡಿಯೋ
ಪೌರ ಕಾರ್ಮಿಕರ ಕಷ್ಟ ಕಂಡ ನಗರಸಭಾ ಸದಸ್ಯ ಗಾಳಿಪುರ ಮಹೇಶ್, ಸಫಾಯಿ ಕರ್ಮಚಾರಿ ಆಯೋಗದ ಸದಸ್ಯರೊಟ್ಟಿಗೆ ನಿರಂತರವಾಗಿ ಮಾತುಕತೆ ನಡೆಸಿದ ಫಲವಾಗಿ ಈಗ 8 ಬೀದಿ ದೀಪ ಕಂಬಗಳನ್ನು ಅಳವಡಿಸಿ ವಿದ್ಯುತ್ ಸಂಪರ್ಕ ನೀಡಲಾಗಿದೆ. ಇದರಿಂದ ಇಡೀ ಕಾಲೋನಿ ಬೆಳಗಿದೆ.
ಸುಮಾರು 125 ವರ್ಷಗಳ ಇತಿಹಾಸವಿರುವ ಈ ಕಾಲೋನಿಗೆ, ಭಾರತ ಸ್ವಾತಂತ್ರ್ಯಗೊಂಡು 75 ವರ್ಷಗಳ ದಾರಿ ದೀಪದ ಭಾಗ್ಯ ಬಂದಿದೆ. ಕೊನೆಗೂ ದಾರಿ ದೀಪ ವ್ಯವಸ್ಥೆ ಆಯ್ತಲ್ಲ ಎಂಬುವುದು ಸಂತಸದ ವಿಚಾರವಾದರೂ, 75 ವರ್ಷಗಳ ತನಕ ಸೌಲಭ್ಯ ದೊರೆಯದಿರುವುದು ವಿಪರ್ಯಾಸ.
